洗滌心靈之行 遊大埔慈山寺Tsz Shan Monastery

每次搭巴士經過吐露港,總會隱隱約約見到一座觀音,今日我哋A姐M佬決定入去參觀朝聖吓先!去到先發現,原來係…要!預!約!哈哈,只好打道回府即刻預約啦!

以個人名義預約參觀慈山寺嘅朋友就要留意喇,每日只接受7至30日前預約,每次最多可為6人預約(包括申請者本人及BB亦作一人計算)。預約以先到先得為原則,所以如果想星期六、日、公眾假期或特別日子出發,就要喺30日前上網預約參觀喇!(提提你:網站每天早上8時開始接受下個月之預約)

先選擇人數
再選擇日子
再選擇參觀時段
輸入個人資料

當所有資料輸入後,你就會收到email同SMS嘅確認通知,咁就要好慢長咁一個月喇!

終於到達出發前一日喇,有咩要準備先!

  • 參觀慈山寺必須穿著莊重的服裝(如有袖上衣、長褲、七分裙或七分褲),記住唔可以著無袖上衣、迷你裙、熱褲、短褲皆被視為不莊重的服裝。
  • 交通方法:大埔墟站開出之巴士75K、275R;小巴20B、20C、20T,可參考詳細資料;或可以預約時一拼預留泊車位。

坐小巴20B係行得最短嘅上山方法,喺洞梓路同普門路交界落車,行大概10分鐘就去到慈山寺大門口。而其他路線就要喺䃟頭角站落車,行大概20分鐘就去到慈山寺大門口。去到大門口,有保安人員核對資料,再分發參學證畀各位。

如果想參觀導賞團或行禪活動,就要先去參學服務處索取留位票,因為我哋係14:15入場,所以都已經Full晒,咁唯有攞張地圖自行參觀啦!

經過大門口嘅正前方就係大雄寶殿,我哋先去到右邊,經過洛迦池同普門,就會見到兩旁總共18棵羅漢樹同76米高嘅觀音聖像,由於呢度不設點香,取而代之就可以去到千處應「供水」畀觀音聖像。原來「供水」係最簡單嘅禮佛方式,大家只要月木缽注水,然後一步步行去觀音聖像前嘅巨缽內倒下水祈願。寺方話:「供水的修持,以水喻心,提醒我們最珍貴的,往往是最基本的,垂手可得。在供水的時候,我們不再向外追求,當下回歸初心,照顧自己真正的需要……透過照顧水,去照顧自己的心,你會體驗到:滴水不漏的關鍵就在於覺察、專注和放鬆。澄淨如水的心,方向明晰,能讓我們踏上快樂之道。」

 

慈山寺觀音聖像高76米(大概為25層樓)嘅戶外青銅、合金觀音像,係僅次於108米高嘅海南海上觀音聖像,列為全球第二高,位處坐北向南,同大嶼山嘅天壇大佛遙遙相對。

 

離開觀音聖像,去到大雄寶殿,殿內正進行行禪活動,我哋雖然無宗教背景,但都感受到個種莊嚴。

臨走前,去到普門抄心經,殿內好安靜,每個人都好靜心好平靜去抄寫,抄完後,會有寺員幫你蓋章,仲會連埋post card俾你留念。

提提大家,寺內無中式齋菜供應,只有簡單嘅西式茶點同飲品,所以建議各位食飽之後先入寺參學;另外,寺內一定要保持安靜呀!

慈山寺 Tsz Shan Monastery
地址:香港新界大埔普門路88號
時間:早上九時半至下午五時
門票:免費
網址:www.tszshan.org

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!

Facebook:A姐M佬 玩樂日記
Instagram:AandMdiary
Pinterest:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *