親近大自然 假日遊鴨州

以前去鴨州除咗跟團,唯一嘅方法就係去到位於禁區內嘅沙頭角公眾碼頭坐街渡喇。但最近船公司聲威就開設咗新航線,由馬料水往返吉澳同鴨洲,方便遊客。航線逢星期六、日及公眾假期服務,來回票價$90,單程$50。而我哋上次去咗沙頭角玩,就順便去埋鴨州玩啦!

由沙頭角去鴨州,單程船飛$20。不過,來往鴨州嘅班次唔多,記住check清楚航班時間
離開碼頭後,沿岸嘅景色就係中方嘅沙頭角同鹽田港嘅繁華,反之,另一邊就係香港嘅離島,保留住大自然嘅景色。
而鴨洲嘅命名係因為好似一隻半浮於水面嘅鴨仔,所以航行途中,見到鴨州就記住加多7分想像,睇睇呢隻鴨仔喇。
船程約20分鐘,終於嚟到鴨州喇!原來鴨州係香港263個島嶼當中,有人居住嘅最細島嶼,面積只有0.016平方公里,最興盛時有過千人居住,但後來大部份都移民去英國,剩低吉屋同三個村民。
鴨州故事館
鴨州除咗碼頭、涼亭、公廁,籃球場、村公所同村校之外,基本上都無咩設施,而鴨州當年由傳教士傳教,所以島民都係信奉真耶穌教會,係香港少數嘅離島只有教堂而無天后廟。
但鴨州最新嘅景點當然要數鴨州故事館啦!不過,只限團體提前預約或星期日及公眾假期向公眾開放,我哋今日係星期六,遺憾未能入內參觀。
其實鴨洲故事館係由鴨洲漁民子弟學校改建而成,內有展板、居民生活舊照、工具、仲有獨特鴨洲話同鴨洲漁歌教學等等,介紹鴨州嘅聚落同生活方式,展示蜑家嘅文化遺產。
海蝕地貌
鴨州之所以似鴨,係因為海蝕地貌,令鴨州有鴨眼同鴨頸。
鴨洲由多種沉積岩組成,其中包括角礫岩,礫岩及砂岩。而沉積岩經過年代同歲月嘅變化,一層層叠起,又再經歷風同水嘅侵蝕,而形成多個典型嘅海蝕地貌。鴨頭成了海蝕柱、鴨身佈滿了大大小小嘅海蝕洞,而鴨眼位置就係海蝕拱,仲有海蝕崖、海蝕平台同海蝕凹地。大家記住一定要愛護同保護環境,絕對唔可以執走任何石頭貝殻同破壞大自然呀。
鴨州觀景臺
位於鴨背部份,就係鴨州最高嘅地方。呢個28米高嘅觀景臺,行5分鐘就到山頂,睇到成個鴨州,仲可以遠眺印州塘、吉澳同中國鹽田港,真係好靚呀!
上到嚟鴨州嘅最高點,吹吓海風,仲有大地在我腳下嘅感覺。睇番船期,又係時候回程返去沙頭角喇。

世界各地/香港景點門票邊度買至平?
–> 詳情請睇:https://wp.me/p8vzXP-6G <–

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:keepintouch@aandmdiary.com

Leave a Reply

Your email address will not be published. Required fields are marked *