週末遊長洲 四大美食推介

嚟緊嘅weekend,唔知你地plan咗邊度玩呢?長洲又會唔會係你嘅選擇呢?其實,我哋都好多年無去過長洲喇,因為上次去長洲發覺仲多人過去旺角,“長洲賓客人數多” 呢句說話真係名不虛傳。但嚟長洲,除咗食大魚蛋、芒果糯米糍,又或者紅豆餅、手卷,其實仲有咩推介呢?今次,A姐同M佬各自推介兩個必食推介,由午餐食到晚餐!

A姐推介:通記/陳通記
冬菇亭越嚟越少見,所以嚟到長洲一齊集體回憶吓啦!喺長洲嘅冬菇亭除咗有海鮮食,通記(亦稱:陳通記)嘅港式茶餐廳美食絕對推介。見到隔離枱叫咗西多士、鮮油多,好吸引呀!但係如果你要留肚嘅,喺通記最緊要食:沙嗲鮮牛肉通粉。

沙嗲牛肉通粉
一上枱已經被佢嘅濃香沙嗲所吸引!佢既沙嗲唔係sell辣,係佢嘅花生味好濃,帶出沙嗲嘅香!湯底仲有好多花生碎粒,好有口感!而牛肉當然同沙嗲好夾,入晒味同夠軟腍,而麵底有好多選擇,但我哋強烈推介通粉/米通,因為通粉/米通嘅通心部份會索晒啲沙嗲汁,份量又夠多,好滿足架!

通記/陳通記 Tung Kee Noodle Restaurant
地址:長洲海傍街熟食中心13號舖
營業時間:星期二至日 05:00 – 17:00
電話:+852 2981 8877

A姐推介:康蘭餅店
“康蘭餅店?平安包麻,成日食架啦!” 話說,好多人對康蘭嘅認識,都係佢嘅平安包,我哋都唔例外,今日路過都只係想買隻平安包,但撞啱佢嘅蛋撻仔出爐,一試難忘!

蛋撻仔
蛋撻仔HK$10就有4隻,好抵食呀!新鮮出爐嘅蛋撻仔,熱辣辣,蛋嘅部份好滑,蛋香十足。而曲奇皮超脆,口感一流!一啖一隻,啱啱好!

康蘭餅店
地址:長洲海傍道91號B地下
營業時間:星期一至日 06:00 – 19:30
電話:+852 2981 5218

M佬推介:冰廠豆腐花
冰廠豆腐花鄰近長洲消防局,網上見到有人話,呢度嘅豆腐花每日都係限量供應,想食嘅當然唔可以太遲去,但太早去都唔得架喎,因為老闆娘又無咁早開門,我哋今日大概3點左右,終於試到呢碗豆腐花啦。

冰凍薑汁豆腐花
行到熱辣辣,食番碗冰凍薑汁豆腐花真係最高享受!豆腐花夠滑就唔多講,因為佢嘅更大賣點係個豆味超超超濃!加埋薑汁,簡值就係絕配!

冰廠豆腐花
地址:長洲冰廠路6號地舖
營業時間:星期一至五下午二時半後營業;星期六日及公眾假期十一點半後營業

M佬推介:鈴小町
大家去過長洲咁多次,有可能試過BBQ,但打邊爐又好似真係未聽過喎,又或者根本係無火鍋店。但今次我哋嚟到長洲,一落船就見到個易拉架介紹日式火鍋放題,鍾意打邊爐嘅我哋,就決定今晚嘅晚餐就食鈴小町啦!“去長洲打邊爐?得唔得架?” 我哋都半信半疑,但去到嘅時候已座無虛席(想食記住book枱),更重要係肥老闆駐場,睇得出佢對食材嘅個份堅持。

坐低嘅第一件事當然係叫湯底先啦,呢度嘅湯底有兩款,分別係蕃茄薯仔湯同壽喜燒,我哋就叫咗壽喜燒!

叫完湯底,當然就要去混醬啦!有日本萬字醬油、芝麻醬、仲有蒜蓉、炸蒜、蔥、芫茜同辣椒粒等,一啲都唔馬虎求其。而旁邊仲有白飯添。

呢度嘅肉類有兩款,分別係美國肥牛同日本黑豚肉。兩款s肉都切得夠薄,輕輕一盪就食得。美國肥牛嘅牛肉味香濃,油花分佈平均,接近入口即熔;而更大驚喜係日本黑豚肉(要知道豚肉嘅驚喜一向都比牛肉少),超鮮嫩而豚肉香味一流,值得一再encore!

而本身已經好入味嘅雞翼,估唔到用嚟打邊爐可以咁好味。

除咗肉類,冰櫃仲有好多自取選擇,除咗蔬菜、丸類,仲有好多海鮮,真係輕易回本。

海鮮有青口、帶子、帆立貝、魚腩同廣島蠔。啲帆立貝比好多日式壽司刺身店仲要大粒同肥美,就嚟忍唔住想生食一粒呀。帆立貝輕輕灼熟就食得,而灼熟咗後當然會細粒咗,但依然好彈牙,好有口感!而廣島蠔飽滿又大隻,蠔肉超鮮甜,輕易就每人食咗半打。

而丸類嘅選擇都好多,有廚師腸、芝士腸、餃子、魚腐、魚皮餃、芝士獅子狗、魚蛋、貢丸、蟹籽丸等等。連港人大愛嘅響鈴、生根,甚至係油揚都有,索湯一流,好好味呀。

而蔬菜今日就有蓮藕、冬瓜、蘿蔔、金菇、生菜、油麥菜同西洋菜等等,夠晒鮮嫩。

飲品方面,除咗啤酒、韓式同日式罐裝飲品之外,連梅酒、椰子水都有,好抵呀。

最後,仲有雪米糍做甜品,連少見嘅榴槤味都有,呢個晚餐好豐富,好滿足呀!

鈴小町 SUZUKOMACHI
地址:長洲建新里6號海景樓B座地舖
電話:+852 5565 2065

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
報料或合作:keepintouch@aandmdiary.com

Leave a Reply

Your email address will not be published. Required fields are marked *