【旅行唱錢攻略】7個方法靚Rate唱錢 旅行從此更簡單

各國政府開放旅遊入境限制，就連香港都逐步取消入境隔離政策，大家係時候執行李，向世界出發喇！去旅行除咗買機票、book酒店，當然仲要唱錢啦！近期日元、英鎊、歐羅等都持續下跌，不如就趁靚rate換定錢。我哋就綜合咗7個唱錢方法，大家下次旅行就可以玩得更抵啦！

旅遊優惠碼：[旅遊酒店優惠碼] 持續更新 一文睇清各大機票/酒店/旅遊活動優惠碼

旅遊景點優專：Klook｜Trip.com｜KKday

1. 旅行唱錢攻略：本地找換店

講到傳統嘅唱錢方法，當然係去本地找換店啦！喺香港有唔少找換店，但曾經大受歡迎嘅百年找換店喺疫情期間已經執咗笠，依家相對熱門嘅找換店有以下四間，牛記、發達鳥、堅成、多福。除咗熱門嘅貨幣，一啲冷門嘅貨幣都有，例如：印度盧比、沙特阿拉伯里亞爾、阿曼里亞爾等都有。不過，遇著旅遊旺季就會大排長龍，部份找換店可以打電話預約，咁就可以慳番啲唱錢時間喇！

牛記找換有限公司

匯率：www.nkcl.com.hk
地址：香港上環急庇利街1號長達大廈地下

發達鳥找換店

匯率：www.richbirdhk.com
地址：九龍深水埗長沙灣道261A號地舖

堅成找換有限公司

匯率：www.ksme.hk
地址：九龍尖沙咀36-44彌敦道重慶大廈87號鋪地下

多福找換店

匯率：www.dfexchange.com
地址：觀塘巧明街106號冠力工業大廈地下2號舖
地址：尖沙咀梳士巴利道18號K11 Musea B107A店號
地址：九龍荔枝角青山道676號W668地下6號舖
地址：九龍灣常悅道19號福康工業大廈地下1A舖

2. 旅行唱錢攻略：ebanking

拎住現金去銀行唱錢，肯定係最傳統嘅唱錢方法，但除咗要去銀行排隊，個rate仲要勁差。所以如果你有ebanking又有外幣戶口，成件事即刻唔同晒，除咗可以慳時間，唱錢對換價更以電匯價結算，成個rate即刻靚晒！至於，唱完錢之後，大家就可以喺香港嘅銀行或香港嘅外幣提款機（只限恒生銀行、匯豐銀行、花旗銀行用戶）拎錢，至於花旗銀行嘅Citi Plus同匯豐銀行嘅HSBC One+戶口，仲可以去到目的地之後，經當地提款機免手續費提款*或當Debit Card用，消費直接扣當地貨幣。不過，經ebanking唱錢，大部份銀行只支援以下貨幣：澳元、加元、瑞郎、歐元、英磅、日圓、紐元、人民幣、新加坡元、美元同泰銖，另外，每日拎外幣有上限，如果你係大富翁，可能就要分幾日拎錢喇！

電匯價：www.ttrate.com
立即申請花旗銀行Citi Plus戶口：www.citibank.com.hk（並無最低存款要求）

*花旗銀行Citi Plus免手續費提款櫃員機：全球Citi櫃員機、全球Circus或Mastercard網絡
*匯豐銀行HSBC One+免手續費提款櫃員機：全球HSBC櫃員機

3. 旅行唱錢攻略：外幣提款機

恒生銀行、匯豐銀行、花旗銀行戶口
如果你持有恒生銀行、匯豐銀行、花旗銀行戶口，而戶口內有外幣結餘，就可以直接去到香港嘅外幣提款機提款。但如果戶口內只有港幣，亦可以轉換，不過匯價就無ebanking咁好喇！

4. 旅行唱錢攻略：當地櫃員機

港元提款卡
如果玩到無晒錢，而你嘅港元提款卡有Plus或Circus或銀聯嘅標誌，就可以透過當地櫃員機提取當地貨幣（要使用呢個功能，離港前要去銀行或經ebanking開通）。透過當地櫃員機拎錢，係會有手續費（銀聯：HK$25-HK$50一次；Plus/Circus會收1.95%）。不過，銀聯個rate比Plus/Circus靚啲，所以有得揀，就梗係揀銀聯啦！

花旗銀行Citi Plus或匯豐銀行HSBC One+提款卡
如果你嘅花旗銀行Citi Plus戶口同匯豐銀行HSBC One+內有當地貨幣，當然可以免手續費真接提款。但如果戶口內只有港幣，亦可以透過Plus或Circus或銀聯嘅匯價，免手續費提款*。當然，呢兩個戶口亦可以直接當Debit Card用，消費直接扣當地貨幣。

立即申請花旗銀行Citi Plus戶口：www.citibank.com.hk（並無最低存款要求）
*花旗銀行Citi Plus免手續費提款櫃員機：全球Citi櫃員機、全球Circus或Mastercard網絡
*匯豐銀行HSBC One+免手續費提款櫃員機：全球HSBC櫃員機

5. 旅行唱錢攻略：當地找換店

去到目的地先唱錢係最唔抵嘅手法，因為個rate唔靚又有手續費，咁點解仲要去到當地找換店唱錢呢？因為如果你去一啲冷門嘅國家旅行，香港嘅銀行或者找換店未必有當地貨幣唱，所以就要去到目的地先可以唱錢。而另一個好處係，當你喺當地找換店唱錢，可以keep起張收據，回程時可以用當日嘅匯價換返港幣。

6. 旅行唱錢攻略：Interactive Brokers（IB）

好多移民嘅朋友都會用Interactive Brokers（IB）唱錢，因為匯價勁靚！如果想用Interactive Brokers（IB）唱錢就要先透過手機應用程式開通Interactive Brokers（IB）戶口，成功開通之後，就可以用港元兌換美金或人民幣，再將外幣轉帳至你嘅外幣戶口；如果要提取其他外幣，就需要去Interactive Brokers（IB）嘅辦事處，進行一次性嘅簽名驗證。聽落好似好煩，但其實開通咗之後，一勞永逸。

雖然匯價靚，但用Interactive Brokers（IB）要留意以下魔鬼細節：
– 每次兌換都會收約HK$15手續費，所以大家用Interactive Brokers（IB）唱錢要一次過
– 每個月只有一次免費由Interactive Brokers（IB）轉帳至你的外幣戶口，所以大家用Interactive Brokers（IB）轉帳要一次過
– 大部份香港銀行嘅外幣戶口，只接受以下貨幣：澳元、加元、瑞郎、歐元、英磅、日圓、紐元、人民幣、新加坡元、美元同泰銖，如果轉帳其他貨幣至香港銀行嘅外幣戶口，就會直接變返做港幣呀

7. 旅行唱錢攻略：銀行員工兌換價

如果你有親朋好友喺銀行返工，就可以麻煩佢哋幫手check吓銀行嘅員工兌換價，呢個兌換價都有唔少驚喜架！

旅遊優惠碼：[旅遊酒店優惠碼] 持續更新 一文睇清各大機票/酒店/旅遊活動優惠碼

更多食玩優惠：Klook ｜ Trip.com ｜ KKday

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com