感受不一樣的……澳門 – P.I.B.G.：踩界
每次話想同A姐去澳門行吓，佢都耍手擰頭，佢話除咗賭場之外，諗唔到有咩咁好玩！仲話唔通真係去大三巴，媽閣廟同觀音像咩？真係同大陸人迫餐死架！咁一於等我睇睇有咩新開又夠型嘅景點啦！
近期大家講起氹仔，點都離不開巴黎人、新濠影滙，但原來氹仔舊城區靜靜雞起革命，銳意推動澳門文化同創意產業。一講到創意產業，鐘意藝術嘅A姐就即刻攞身份證起行喇！
一個鐘頭就嚟到氹仔喇！A姐唔好掛住買手信啦，依家嚟到氹仔舊城區，又點可以唔去氹仔藝術空間呢？呢度有由澳門塗鴉先驅林家豪先生（街頭作品署名 P.I.B.G.）首次舉辦嘅個人作品展，名為「P.I.B.G.：踩界」，除咗有室內嘅藝術展品，仲有喺城區內嘅戶外塗鴉！絕對係首次將街頭嘅塗鴉藝術同舊城區活化連繫起一體（至少香港就完全唔接受塗鴉喇）！
今次嘅展覽最大型嘅作品就係「純真·狡猾」，聽P.I.B.G講，呢個作品最大靈感係嚟自佢個仔，表面就好似好純真好似小天使咁，實質係帶住一個面具嘅狡猾小魔怪！哈哈，無論係天使定魔怪，M佬都好想同A姐擁有一個小可愛，要努力加油先得（A姐耍手擰頭囉-_-）！
另外，氹仔藝術空間成立之後，活化嘅舊城區同金光大道賭場區形成強烈對比，舊城區除咗匯聚中葡文化，仲會有好多特色節慶活動、傳統葡萄牙土風舞表演、展覽等等，所以話呢，去澳門又點只得賭場喎！
除咗文化藝術，嚟到澳門舊城區又點少得美食呢？由傳統餅店、街頭小食攤檔，以至西葡傳統歐陸菜都一應俱全。今次嚟到就試吓西班牙嘅特色小食同嘆番杯香檳啦！
食完小食，仲俾A姐見到P.I.B.G添，A姐眼尾都無望我一眼，就飛樸埋去，話要了解一吓佢嘅藝術世界喎！
A：點解你叫P.I.B.G呢？
P：呢個係Pat Is Bombing Graffiti嘅縮寫，姐係Pat在轟炸塗鴉。
A：點解會開始畫塗鴉？
P：鐘意畫畫，不過初時搵唔到方向，而畫塗鴉就有刺激感，試過偷人噴漆，被警察捉，但就得到好多人欣賞佢嘅作品，從而有成功感。
A：點解會有今次嘅創作？
P：今次得到澳門氹仔城區嘅邀請，佢地希望活化呢個舊社區，將街頭藝術同傳統藝術合二為一，而我就希望送一份禮物被呢個城市，好彩街坊都好好支持！
A：你嘅靈感係點樣得嚟？
P：我平時好少睇其他人嘅作品，怕無咗自己嘅畫風，而我通常嘅靈感都係自然景物同動物為主，而近年就嚟自我個仔，就好似呢幅塗鴉，就係我覺得我個仔係戴住面具嘅小魔怪！另外，我嘅作品好多時都會包含心同鑽石，代表住愛同珍而重之！
A：今次呢啲作品畫咗幾耐？
P：超過1個月，喺呢段時間，好彩得到街坊大力支持，佢哋行過，都會關心吓我，所以話，澳門真係充滿人情味！
好喇好喇！M佬呷醋喇，Byebye喇P.I.B.G.！Byebye喇澳門！
P.I.B.G.：踩界
地址：澳門氹仔木鐸街10號
營業時間：10月5日至12月15日 12:00-20:00
電話：+853 2857 6118
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：aandmdiaryhk@gmail.com
