伯明翰旅行酒店篇 伯明翰萬豪酒店

近年，我哋無論去旅行定玩Staycation都好鍾意住萬豪酒店集團旗下嘅酒店，除咗因為萬豪集團有唔少品牌深得我哋歡心，更因為我哋想成為佢哋更高級嘅會員，享受更多會員禮遇。所以今次嚟到伯明翰，我哋就入住伯明翰萬豪酒店（Birmingham Marriott），呢間伯明翰萬豪酒店雖然離市中心遠少少，但入住期間都有小驚喜呀！

酒店大堂
伯明翰萬豪酒店（Birmingham Marriott）位於伯明翰市中心嘅邊皮位置，由Birmingham New Street火車站要行大約20分鐘先到達酒店。伯明翰萬豪酒店喺1990年開幕，2008年就進行過一次大翻新，所以無論酒店嘅外觀定大堂嘅風格都充滿歷史嘅痕跡，充滿懷舊嘅感覺。

客房區域
伯明翰萬豪酒店樓高5層，共設有104間客房及套房，我哋今次就被入住5樓嘅豪華雙人床房。景觀本身都幾開陽，不過，因為窗口有窗框阻擋，視野就會受到影響。另外，房間面積比較細，加上窗口亦較小，所以房間嘅空間感唔大，如果攞大件行李，更加會有擠迫嘅感覺。

房間唔大，所以床亦都唔大。呢張床係標準雙人床，如果大隻少少都會覺得迫。床褥軟硬適中，枕頭總共有4個，2個係偏軟2個係偏硬。由於屬於舊款酒店，所以所有燈制都會喺返電器嘅旁邊，臨瞓嘅時候，熄燈就會比較麻煩。好彩窗簾遮光唔錯，絕對可以瞓到自然醒。

伯明翰萬豪酒店嘅房間亦有提供茶包、咖啡包、風筒、熨斗、燙衫板同夾萬，不過，雪櫃竟然無囉！

雖然伯明翰萬豪酒店嘅硬件好似一般般，但驚喜在於呢度嘅職員非常爽手，特別係我哋嚟咗英國咁耐，遇上好多非常hea嘅英國人，曾經喺另一間酒店試過夜晚10點問佢攞沖涼液，結果佢第二朝八點先送到。不過，伯明翰萬豪酒店嘅服務標準相當高，10分鐘內必定送到。

浴室區域
浴室面積唔大，乾濕分離，更設有浴缸！個人用品方面，只有洗頭水、沐浴露、護髮素、潤膚露同番梘。因為酒店響應環保，所以其他用品例如：牙刷、牙膏、拖鞋、剃鬚刀等等，就要打電話叫職員另外送上。

娛樂設施
伯明翰萬豪酒店設有健身室同室內游泳池，不過，因為唔影得相，所以我哋就未能同大家分享。

餐飲服務 – 自助早餐
伯明翰萬豪酒店設有一間餐廳同一間酒吧，朝早嘅自助早餐都算豐富，不過就無egg station，但都有煎蛋及炒蛋提供。其他食物仲有乳酪、沙律、煙三文魚、雞肉腸、煙肉、薯餅同多款麵包等等，絕對可以自製一份All Day Breakfast！

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

伯明翰萬豪酒店 Birmingham Marriott
地址：Five Ways, 12 Hagley Rd B16 8SJ
預訂網址：hk.trip.com

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com