[香港Staycation] 日本浴衣和牛之旅 灣仔諾富特世紀酒店
上年生日，我答應過你今年會帶你去日本旅行，著住浴衣，參加花火大會。就算因為疫情，我都會履行我嘅承諾，所以我就選擇咗雅高酒店集團 Accor 旗下位於灣仔嘅香港諾富特世紀酒店 Novotel Century Hong Kong，同A姐玩吓Staycaton啦！呢個以日本為主題嘅「尋和味」一泊二食住宿Staycation，雖然無花火大會，但都可以著住浴衣，食吓和牛魚生，飲住清酒欣賞維港景色，當然，我仲會學幾句日文，等佢身在香港都有日本旅行feel啦！
預訂網址：www.klook.com
提提你：喺酒店房度慶祝，除咗要保持乾淨，記住都有限聚令同消防條例，唔好好似啲KOL咁，叫成廿個人上房慶祝呀！當然，我同A姐都係prefer二人世界啦！
酒店大堂
酒店位於灣仔謝斐道，由灣仔港鐵站A2出口，步行5至8分鐘就到喇；另外，距離灣仔渡輪碼頭都只係10分鐘嘅路程，交通位置非常方便！酒店嘅大堂當然唔少得體溫檢測，以確保大家入住安全。酒店樓高23層，提供509間客房同套房。酒店職員嘅服務態度好好，仲主動問我哋需唔需要延遲退房添。
套房
因為今次係慶祝A姐生日，所以我特登Upgrade咗去套房，等佢有更舒服嘅Staycation體驗。根據酒店資料，套房面積有大概460呎，分為客廳、睡房同浴室三個部份，景觀主要係灣仔市景同維多利亞港嘅部份海景。
客廳區域
一打開房門就係客廳，客廳佔整個套房大約一半嘅面積，景觀主要係維多利亞港嘅部份海景，最遠可以睇到九龍灣嘅Megabox添！客廳有2大張梳化、茶几、電視配上音響系統，而minibar就有電熱水壺，免費嘅capsule咖啡、茶包同蒸溜水，仲有收費嘅汽水等。
睡房區域
睡房區域佔整個套房大約4份1嘅面積，雙人床床褥屬於適中偏硬，床單好柔軟，至於枕頭總共有4個，兩個較軟，兩個較硬，總有啱你嘅選擇。
床嘅兩邊都有閱讀燈，瞓覺前想睇吓書，就夠晒方便。雖然床嘅旁邊未有提供插頭充電，但就有JBL智能鬧鐘，設有兩個USB充電位，亦可以用藍芽接駁電話播放音樂，音質相當唔錯。
另外，睡房區域內亦設有大大張書檯，正對住維多利亞港嘅部份海景，夠晒開揚。至於，睡房同客廳以門分隔，早起身嘅A姐，就可以出去客廳區域睇電視，唔會騷擾我。
浴室區域
浴室區域佔整個套房大約4份1嘅面積，而整個浴室區域分為兩部份，一邊係衣帽間位置，另一邊就係以玻璃分隔嘅浴室範圍。衣帽間嘅衣櫃內放有2件浴袍，同今次主打日式主題嘅2件浴衣，當然仲有保險箱、拖鞋、熨衫板同熨斗等，夠晒貼心！
另外，浴室好光猛，仲有浴缸，可以帶埋日本浴鹽嚟，嚟一個和風浸浴。至於沐浴用品係使用酒店自家品牌，我覺得味道都算唔錯，但如果用唔慣就記住自行準備喇！至於其他個人用品都齊全，包括：剃鬆刀，女性用品、指甲銼等。
泳池及健身室
酒店設有露天游泳池同健身中心，喺疫情期間會按時段清潔同消毒，想去做運動嘅就要留意時間安排喇！
餐飲服務
酒店另設有多間餐廳，包括：LE CAFÉ（詳情按此）、PEPINO 意大利餐廳同AK’S 酒廊。
客房用餐：和牛日式料理晚餐
今次呢個「尋和味」一泊二食嘅晚餐，就係喺房內用餐，我同A姐當然就係著住浴衣嘆呢個和風晚餐啦！
呢個晚餐包括：松葉蟹棒味噌蟹籽沙律、壽司拼盤（加州壽司卷、火炙鰻魚壽司、北寄貝壽司）、魚生拼盤（北海道帶子、油甘魚、吞拿魚、三文魚、紅蝦）、關東煮、慢煮醬燒和牛肩胛肉眼、炸吉列和牛、和牛串燒、迷你甜薯串、南瓜片、菇串、宇治抹茶木糠布甸同清酒。呢個餐真係好誇張，好豐富呀！
和牛日式料理晚餐：魚生拼盤
拼盤有北海道帶子、油甘魚、吞拿魚、三文魚同紅蝦，全部都勁新鮮，仲要係厚切，好鮮甜呀！
和牛日式料理晚餐：慢煮醬燒和牛肩胛肉眼、炸吉列和牛、和牛串燒
呢個和牛set實在係太豐富喇！慢煮醬燒和牛肩胛肉眼同炸吉列和牛各有4大塊，厚切嘅和牛好有口感，加上肥瘦分明，唔會太嚡太乾！
和牛日式料理晚餐：關東煮
就算送埋上房，關東煮仍然熱辣辣，除咗有獅子狗同鳴門卷，仲有關東煮嘅靈魂：大根！大根好入味，又鮮甜，非常好味！
客房用餐：早餐
Check-in嘅時候，酒店職員已為我哋安排送餐時間！早餐以西式為主，如果係日式嘅早餐，會更加加分！早餐有牛角包、煙肉、火腿、腸仔、炒蛋、水果同果汁，份量一啲都唔少。但如果早餐習慣飲杯茶或咖啡，就可以喺minibar度自己沖喇。
世界各地／香港景點門票邊度買至平？
–> 詳情請睇：https://wp.me/p8vzXP-6G <–
香港諾富特世紀酒店 Novotel Century Hong Kong
地址：香港灣仔謝斐道238號
預訂網址：www.klook.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
