[香港Staycation] 充滿度假feel 西貢白沙灣The Pier
呢一年玩咗唔少staycation，大部份都係選擇位於鬧市嘅品牌酒店，但其實The Pier一直都係喺我哋stayaction嘅bucket list之內。The Pier位於西貢白沙灣，擁有先天性嘅無敵海景，真係好有度假feel㗎！不過，The Pier嘅服務同房間保養確實麻麻，令今次整體嘅入住體驗減咗唔少分。
預訂網址：hk.trip.com
前往方法
1.自駕遊：酒店設有收費停車場，價錢唔平，但勝在可以無限次數出入；另外，酒店旁邊設有唔少咪表停車位，但如果假日嚟到，就記住記住記住一定要準時入錶，因為抄牌非常嚴重
2.免費穿梭巴士：酒店提供往返坑口港鐵站及西貢市中心嘅接送服務（詳情）
3.公共交通工具：前往白沙灣巴士站嘅巴士及惠線小巴（詳情）
酒店大堂
大堂設計雖然簡約，但一塊正對住大海嘅落地玻璃已讓人充滿放假嘅心情。可惜放假嘅喜悅心情唔係維持好耐，就被check-in嘅過程大打折扣喇！話晒check-in係入住酒店嘅第一站，理應留下一個好印象。可惜因為疫情期間，酒店員工都戴上口罩，已經極難感受佢哋嘅笑容，當我哋嚟到櫃檯，佢哋依舊坐喺度，迎接我哋嘅方法就只係岳高個頭，連起身呢啲咁基本嘅尊重同禮貌都無。另外，櫃檯因為放有分隔板，加上員工聲量太細，我哋好有禮貌咁希望佢重複講一次，點知佢就表現得勁唔耐煩，雖然大聲唔代表惡，但我哋完全感受唔到服務性行業嘅基本禮儀喇！此外，大家一定要留意，The Pier嘅check-in時間係15:00，就算我哋係平日入住，亦只係早咗15分鐘嚟到，酒店都會以房間好full為理由，未能安排提早入住，結果見到lobby都係坐滿辦理好手續嘅住客，直到準時15:00，職員就會分派房卡；同樣地check-out時間係12:00，亦無任何走盞位，我哋有一剎那以為自己去咗時鐘酒店，每一個鐘頭都係咁寶貴。
房間區域
The Pier 樓高3層，提供7種房型合共40間客房，而我哋今次入住嘅就係豪華露台房。房間面積非常大，空間感十足。雙人床屬於King size，床褥軟硬度適中，而床單非常柔軟，枕頭總共有4個，略嫌較扁，但如果將2個疊起嚟瞓就啱啱好喇。床嘅兩邊都有床頭櫃，亦有插頭位方便充電，但要留意成間房只有一個藍牙喇叭附設嘅USB充電位。另外，呢個藍牙喇叭嘅鬧鐘清晨5點響起，相信係上一手留低嘅大整蠱，但執房嘅房務員，理應執房時要重新reset，搞到我哋無端端就被叫醒。
除咗雙人床之外，房間嘅偏廳位置仲有一張小梳化同餐枱，二人世界煮完飯仔，就可以喺度飲吓嘢、傾吓計。
值得一讚嘅係，電視內設有Youtube同Netflix，有唔少電影同劇集選擇，留喺房度煲劇就絕對唔怕悶啦！
浴室區域
至於浴室嘅清潔衛生都係麻麻，仲有唔少前住客嘅頭髮呀！浴室乾濕分離，而酒店大部份房型都係採用企缸。至於個人用品亦十分齊全，包括牙刷、牙膏、梳、浴帽、化妝棉等，而洗頭水、沐浴露、護髮素同潤膚露就用自家品牌，質素ok啦，如果有需要就自行攜帶啦！另外，亦有提供浴袍、拖鞋、體重磅、風筒、夾萬同收費嘅洗衫服務。
廚房區域
但講到全間房最污糟嘅地方就係廚房！廚房面積唔大，設備亦唔多，但應有嘅都齊全，例如碗、碟、餐具、煲、平底穫、鍋鏟、雪櫃同焗爐，但全部都係淋痴痴，一定要徹底洗乾淨，先可以使用！如果大家真係諗住煮飯嘅，就要記住自備埋調味品喇！
另外，雪櫃內亦有mini bar，收費雖然唔平，但由於酒店附近並無任何便利店，只有士多，而士多嘅收費比mini bar仲要貴，所以價錢算係可接受，但都係建議大家預備好入住所需要嘅物品啦！
露台區域
由於酒店樓高只有三層，所以房間望出去嘅大海以遊艇停泊處同碼頭為主，唔算係開陽嘅無敵大海景。另外，酒店嘅硬件保養亦麻麻，好似我哋房間嘅露台門嘅門鎖係壞，門係唔可以完全閂埋，除咗有保安問題之外，亦飛咗唔少蚊入房喇！
至於露台放有兩張凳同一張枱，喺度chill吓其實都唔錯㗎！不過，豪華露台房間嘅露台係連接住左右兩邊房間嘅露台，所以私隱度唔高，喺chill嘅時候亦要留意聲量。另外，相信房務員亦少有打理露台上面嘅植物，我哋眼見泥土乾裂，植物枯萎，其實都幾影響景觀。
娛樂設施
酒店設有健身室同游泳池。健身室設備唔多，只有跑步機、單車機、划艇機同兩個啞鈴。至於，泳池設於酒店嘅頂層，水深1.2米，喺度曬吓太陽同輕輕鬆鬆游下水都唔錯㗎！
餐飲服務
酒店設有1間日本餐廳，我哋嘅staycation package就包左喺呢度食半自助早餐。主菜分為西式、日式同素菜三個選擇，我哋就揀咗西式同日式各一。可能係日本餐廳，所以佢個日式早餐值得推介，呢個西京燒三文魚好好味呀！至於自取區就有多士、咖啡同茶。
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
The Pier
地址：香港西貢白沙灣街9號
預訂網址：hk.trip.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
