[香港Staycation] 全新品牌定位 香港逸東酒店

逸東酒店喺1990年開業，自此成為佐敦地標之一。逸東酒店喺2018年進行翻新工程，除咗設計改為型格路線，亦不失本土色彩，更重要係將品牌重新定位，以人為本，更關注種族、人權及LGBT等性別議題，融入香港社區。就係因為呢種香港少見嘅市場定位，所以吸引咗我哋去到逸東酒店玩Staycation喇！

酒店大堂
逸東酒店位於佐敦彌敦道，巴士嘅路線選擇非常多，鄰近佐敦港鐵站，附近仲有唔少地道特色嘅餐廳小食，仲可以順便去埋附近嘅廟街食煲仔飯，做一日香港遊客添。

逸東酒店前身為普慶戲院，喺1990年開業。逸東酒店一開始行傳統嘅酒店風格，直至2018年嘅更換管理層，逸東酒店亦一改以往風格，除咗設計改為型格路線，亦不失本土色彩，更重要係將品牌重新定位，以人為本，更關注種族、人權及LGBT等性別議題，融入香港社區。就係因為呢種獨特嘅市場定位，吸引唔少年青人關注。喺逸東酒店嘅大堂就融入藝術元素，亦有唔少本土特色。而整個check-in過程非常快速順暢，逸東酒店嘅職員服務態度非常好，仲主動幫我哋late check-out至13:00添！

房間區域
我哋今次入住位於11樓嘅逸‧尚客房，由逸東酒店嘅大堂前往客房，需要成坐玻璃觀光電梯。呢部觀光電梯首先會經過酒店室內嘅酒吧，再通往外面，可以欣賞到佐敦彌敦道一帶繁忙嘅景色，非常獨特。

逸東酒店共提供465間客房，房間喺2018年進行翻新，以木為主調，簡約得嚟又有格調！雙人床係標準size，床褥軟硬適中，床單柔軟，非常舒服；枕頭總共有4個，2個係偏軟2個係偏硬。兩邊都有床頭櫃，兩邊都有插頭，其中一邊床頭，更設有多功能鬧鐘，可以透過鬧鐘附設嘅USB充電。逸東酒店以趟門取代窗簾，所以非常遮光，第二朝完全唔會俾陽光整醒，瞓得好好，真係差足電呀！

我哋房間嘅景觀以對面學校為主，景觀都算開陽。而房間亦有smart TV，電視除咗提供本地嘅頻道，亦有電影台、新聞台、體育台同外語頻道，選擇非常多；另外，亦可以連接自己部電話，想煲劇聽歌都可以自己話事啦！除咗書枱之外，房間內亦有一個迷你雪櫃，提供一大支免費嘅飲用水、茶包同咖啡包。

浴室區域
浴室係成間房比較失望嘅地方，因為浴室係未有翻新，真係好舊啊！浴室乾濕分離，設有浴缸，可以浸浴。個人用品就只有牙刷同牙膏，如果需要其他個人物品亦可以向逸東酒店查詢。至於洗頭水、沐浴露就用上品牌：ZEN。至於衣櫃入面就放有浴袍、拖鞋、夾萬同風筒。

娛樂設施
逸東酒店設有健身中心同游泳池，不過喺疫情期間全部都冇開，我哋亦都無影到任何嘅相。

餐飲服務
逸東酒店設有三間餐廳同一個設有10間餐廳嘅food court，其中逸東軒更加係米芝蓮一星食府。

至於今次staycation嘅早餐，就嚟到逸東酒店嘅普慶餐廳。普慶餐廳之所以叫普慶，係紀念前身嘅普慶戲院。普慶餐廳嘅自助午餐同自助晚餐一直以高CP值而大受歡迎，好難book位架！至於普慶餐廳嘅自助早餐食物非常豐富，除咗西式同egg station之外，仲有近年越嚟越少見嘅麵檔、中式點心、乳酪、沙律、水果。比較驚喜嘅係提供少量嘅印度菜式選擇，另外，酒店亦融入本地特色，有雞蛋仔呀！總括來講，呢度嘅早餐選擇真係非常豐富，夠晒驚喜。

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

香港逸東酒店 Eaton HK
地址：香港佐敦彌敦道380號

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com