[香港Staycation] 渡假至愛嘅無邊際泳池 黃竹坑雅格酒店
黃竹坑一直都係一個傳統工業區，但近年有唔少商廈落成，令呢區出現翻天覆地嘅改變。而作為一個嶄新嘅商業區，又點少得酒店呢？位於黃竹坑嘅雅格酒店（The Arca）喺2021年6月開幕，雅格酒店（The Arca）嘅設計風格行木系無印風，加上設於頂樓嘅無邊際泳池及多元化嘅藝術作品，帶俾大家有一種放鬆嘅渡假心情，係一個唔錯嘅staycation選擇！
預訂網址：www.kkday.com
酒店大堂
雅格酒店（The Arca）位於黃竹坑，基本上所有途經香港仔隧道往香港仔嘅巴士都會路過雅格酒店（The Arca）。至於，由雅格酒店（The Arca）步行10分鐘就可以到達南港島線嘅黃竹坑港鐵站。酒店附近都係商廈同工廈為主，附近嘅餐廳選擇唔多，相信要等黃竹坑站隔離嘅港島南岸商場開咗之後，飲飲食食會更加方便。另外，黃竹坑站旁邊設有親民嘅熟食中心，大家想搵食嘅可以參考以下嘅推介。
抵食吉豬沙牛麵 黃竹坑南朗山發記：詳情
非洲吃甚麼 Africa Coffee & Tea：詳情
普普通通泰國菜 黃竹坑青咖哩屋：詳情
雅格酒店（The Arca）嘅lobby設於3樓，整個check-in過程麻麻哋啦，因為幫我哋check-in嘅職員毫無笑容，亦同我哋無任何交流，只可以話第一印象唔係特別驚喜，但亦無任何挑剔。另外，lobby有唔少公共空間，大家可以喺旁邊嘅Arca Society買杯咖啡，慢慢嘆都唔錯。雅格酒店（The Arca）3樓嘅露天平台除咗放有藝術展品，仲可以喺呢度chill吓，不過，今日因為落雨，我哋就未有出去喇！
房間區域
雅格酒店（The Arca）共設有187間客房及套房，樓高35層，我哋今日就住喺35樓嘅City Signature。酒店嘅lobby設計以炭灰色磚牆、琉璃瓦片同金屬做細節，營造出強烈嘅質感同色調對比，展現簡潔嘅現代工業風。相反，房間就以木系為主調，形成簡潔無印風。雙人床超超超大張，真係點碌都得。床褥軟硬適中，床單柔軟，非常舒服；枕頭總共有4個，2個係偏軟2個係偏硬。兩邊都有床頭櫃，兩邊都有插頭、USB插頭、燈掣同窗簾掣，夠晒方便。
房間嘅設備一啲都唔花巧，特別鍾意房間內掛上唔同嘅畫作同放有唔同嘅陶瓷，增添房間嘅舒適感。至於窗外嘅景色以附近嘅商廈同山景為主，窗簾嘅遮光度十足，第二朝可以瞓到自然醒。另外，靠窗嘅位置亦都放有一張書枱，打開書枱嘅枱面，更可以變身成為梳妝台添。至於，房間亦有smart TV，電視除咗提供本地嘅頻道，亦有電影台、新聞台、體育台同外語頻道，選擇都幾多；另外，仲可以連接自己部電話，想煲劇聽歌都可以自己話事啦！
值得一讚嘅係，房間靠窗邊同衣帽間都有座位，啱晒我哋呢種唔沖涼唔換衫就唔攤上床嘅人啦！另外，房間內亦有雪櫃同capsule咖啡機，除咗兩支免費蒸餾水，仲有茶包同capsule咖啡添。
整體嚟講，房間嘅空間感十足，夠晒光猛，唯一挑剔係冷氣出風位有啲嘈姐。
浴室區域
浴室乾濕分離，個人用品齊全，除咗牙膏、牙刷，仲有棉花棒、浴帽、化妝棉等。至於洗頭水、沐浴露、護髮素同潤膚露就用上自家品牌。至於衣櫃入面亦放有浴袍、拖鞋、夾萬、雨傘、熨斗、燙衫板同風筒，設施尚算齊全。
娛樂設施
雅格酒店（The Arca）設有gallery、健身室同無邊際游泳池，不過喺疫情期間全部都冇開，我哋亦都無影到任何嘅相。
餐飲服務
雅格酒店（The Arca）設有一間餐廳：Arca Society，不過喺疫情期間，餐廳同樣無開，所以staycation包嘅早餐同下午茶，都只可以喺房間內享用。
Be my strawberry下午茶
以雀籠擺盤嘅下午茶主題係Be my strawberry（日本士多啤梨下午茶盛宴），用嚟打卡確實唔錯。鹹同甜嘅茶點都以士多啤梨為主題，除咗兩杯意大利氣泡酒，食物分別有香煎鵝肝多士伴焦糖閃亮香士多啤梨、慢煮雞肉酥盒伴甜王士多啤梨果蓉、英式提子鬆餅配奶油忌廉及甜王士多啤梨果蓉、夢之香士多啤梨煙燻三文魚三文治、夢之香士多啤梨煙燻鴨胸三文治、夢之香士多啤梨雜莓蛋撻、迷你白朱古力熊紅士多啤梨冬甩、熊紅士多啤梨夾心凍餅、紅莓撻。整體嚟講味道唔錯，不過略嫌士多啤梨嘅比例太少喇！
早餐
喺Arca Society攞嘢食再拎上房食。呢個早餐嘅食物選擇唔多，非常簡單。不過，M佬就盛讚佢個粥好好味喇！
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
雅格酒店 The Arca
地址：黃竹坑香葉道43號
預訂網址：www.kkday.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
