【郵輪攻略】挪威非凡號首航出發，即睇必玩、必食、航線等郵輪懶人包
近年新下水嘅郵輪都提供多元化嘅餐飲美食同娛樂設施，而且坐郵輪去旅行更可以一次過解決住宿、交通等旅行繁瑣嘅問題，輕輕鬆鬆就可以前往唔同嘅地方觀光，令郵輪旅遊除咗適合一家大細同年長旅客之外，更越嚟越多年青人以郵輪為旅遊出行嘅選擇。如果想體驗更成熟嘅郵輪旅程，歐美嘅郵輪選擇其實比香港更多，所以今次就飛去歐洲，體驗挪威郵輪公司（Norwegian Cruise Line）旗下嘅挪威非凡號（Norwegian Viva）首航旅程。郵輪上嘅設施非常豐富，絕對媲美五星級嘅度假村，即睇挪威非凡號必玩、必食、航線、優惠等郵輪懶人包。
挪威非凡號（Norwegian Viva）郵輪攻略：郵輪資料
挪威郵輪公司（Norwegian Cruise Line，簡稱：NCL）現時共有19艘郵輪，係世界三大郵輪公司之一，航線遍佈南北美洲、夏威夷、加勒比海、歐洲、地中海、亞洲等超過300個目的地。亦係首間郵輪公司打破傳統郵輪嘅規限，旅客可以完全按照自己嘅喜好，安排用餐同使用娛樂設施嘅時間，而且亦無任何服裝規定，讓郵輪旅程更輕鬆更大眾化。至於挪威非凡號（Norwegian Viva）係挪威郵輪公司（Norwegian Cruise Line，簡稱：NCL）旗下最新啟航嘅郵輪，屬於全新嘅領途級（Prima Class） 級別，排水量為143,535噸，所以郵輪航行時非常穩定。
甲板樓層：20層
首航年份：2023年8月
客房數量：1,586間
最高載客量：3950人
最高船員數目：1506人
（資料來源：挪威郵輪公司）
挪威非凡號（Norwegian Viva）郵輪攻略：客房推介
以前坐郵輪俾人嘅感覺都係奢侈嘅旅行體驗，但其實坐郵輪絕對係豐儉由人。大家可以根據預算選擇合適嘅房型，而挪威非凡號（Norwegian Viva）設有Studio、Inside、Ocean View、Balcony、Club Balcony Suite、Suite、The Heaven等多種房型。其中Studio更加係郵輪少見嘅單人客房，旅客更可使用特設嘅Studio Lounge。
Balcony
我哋今次入住嘅房型係Balcony，房間面積約為250呎，設有一張大床（可轉換成兩張單人床）及一張雙人梳化床，最多可供4位旅客入住。另外，房間嘅浴室同露台都非常寬敞，而且每朝起身都可以望到一望無際嘅大海，真係非常寫意。
The Haven
至於郵輪上最高級別嘅房型就係The Haven！The Haven嘅客房分佈於10至15樓，更設有專屬嘅電梯前往房間。另外，The Haven嘅住客更可使用尊享嘅餐廳、酒吧、無邊際泳池、甲板、管家、禮賓等服務同設施，除咗充滿優越嘅氣派，更可享私人嘅寧靜空間。
挪威非凡號（Norwegian Viva）郵輪攻略：餐廳推介
更多詳情：【郵輪攻略：美食篇】挪威非凡號免費餐廳多達16間？邊5間餐廳係必食心水推介
平時大家一日最多食5餐？但郵輪嘅房費已包括郵輪上嘅餐飲美食，所以上郵輪玩真係一日食足12餐呀，而且挪威非凡號（Norwegian Viva）嘅免費餐廳更多達16間，真係要帶多幾個胃上郵輪玩先得呀！
免費餐廳：Indulge Food Hall
挪威非凡號（Norwegian Viva）嘅免費餐廳可以話係呢架郵輪嘅一大賣點，其中我哋最鍾意嘅就係food court形式嘅Indulge Food Hall！Indulge Food Hall內設有11間唔同選擇嘅國際菜式，除咗西班牙菜、意大利菜、美式漢堡包等歐美選擇之外，估唔到喺呢架主打歐美航線嘅郵輪都搵到唔少亞洲菜式！例如新加坡嘅星洲炒米、泰國嘅Pad Thai、中國同印尼嘅湯河等等，絕對能夠滿足到擁有亞洲胃嘅我哋。
收費餐廳：Hasuki
雖然挪威非凡號（Norwegian Viva）嘅免費餐廳選擇非常多，但挪威非凡號（Norwegian Viva）嘅收費餐廳同酒吧亦極具特色！郵輪上超過20間收費餐廳同酒吧，就連習慣每朝一杯Starbucks，都可以喺挪威非凡號（Norwegian Viva）搵到。所以如果想試吓郵輪上嘅收費餐廳同酒吧，建議大家可以預先購買Speciality Dining Package同Beverage Package，咁就可以用更優惠價錢享用郵輪上嘅特色餐飲選擇。其中，挪威非凡號（Norwegian Viva）最具人氣嘅收費餐廳就係食日式鐵板燒嘅Hasuki，想食嘅話，真係要一上郵輪就book枱呀！Hasuki嘅日式鐵板燒有牛扒、雞肉、海鮮等食材，最正當然係坐喺鐵板前面，同廚師嘅互動同佢嘅功架啦！
更多詳情：【郵輪攻略：美食篇】挪威非凡號免費餐廳多達16間？邊5間餐廳係必食心水推介
挪威非凡號（Norwegian Viva）郵輪攻略：設施推介
更多詳情：【郵輪攻略：娛樂設施篇】挪威非凡號有咩玩？5個郵輪上不可錯過嘅娛樂項目推介
Viva Speedway
水上樂園、百老匯歌劇都係郵輪常見嘅娛樂項目，但有無諗過喺郵輪上都可以玩賽車呢？賽車可以話係挪威郵輪公司（Norwegian Cruise Line）近年郵輪上必備嘅標誌性娛樂設施，而挪威非凡號（Norwegian Viva）更設有三層賽道，堪稱海上最大型嘅賽道。Viva Speedway嘅最高時速大約只有35公里，但因為賽道上有唔少上落斜，加上多個轉彎位，所以都非常刺激！想喺郵輪上玩賽車只需要附合高度要求，戴上提供嘅安全頭盔，就算無車牌都玩得架！
The Drop & The Rush
知唔知有咩方法，可以用5秒就由18樓去到8樓呢？答案係瀡滑梯呀！挪威非凡號（Norwegian Viva）設有3條滑梯，其中The Drop更加係剌激嘅選擇。大家要先進入The Drop嘅滑梯管道，工作人員隨即會倒數並按掣，然後你就會隨即滑下，其實過程唔算太快太刺激，反而等待工作人員按掣嘅時間，真係好緊張。
Viva Theater & Club
除咗以上動態嘅活動，挪威非凡號（Norwegian Viva）當然都有唔少靜態嘅設施。其中Viva Theater每晚都會上映唔同嘅娛樂節目，包括棟篤笑、音樂會等，而最精彩嘅當然係挪威非凡號（Norwegian Viva）皇牌嘅百老匯舞台劇：《Beetlejuice: The Musical》。呢個百老匯舞台劇改編自美國經典電影《Beetlejuice》（陰間大法師），故事主要講述一對因事故去世並變成鬼魂嘅年輕夫婦想住喺其在生時嘅住所，於是請咗一位嚟自陰間嘅驅魔師試圖將新住戶嚇走嘅搞笑故事。
更多詳情：【郵輪攻略：娛樂設施篇】挪威非凡號有咩玩？5個郵輪上不可錯過嘅娛樂項目推介
挪威非凡號（Norwegian Viva）郵輪攻略：航線推介
無論郵輪嘅設施幾豐富，航線同目的地先係取決於選擇郵輪嘅重要一環。挪威非凡號（Norwegian Viva）喺2023年至2025年嘅航線以歐洲、地中海、跨大西洋、加納比海航線為主，每個港口將會停留平均10.5小時，時間非常充裕，抵港後，大家可以參加郵輪上安排嘅岸上一日遊行程或自由行。
更多詳情：挪威非凡號（Norwegian Viva）航線詳情
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
挪威郵輪公司 – 挪威非凡號 Norwegian Cruise Line – Norwegian Viva
立即預訂：www.ncl.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
