感受不一樣的……澳門 – 五大熱點窮遊攻略

話說有一日,我同A姐喺無約過嘅情況之下齊齊放假,又遇著A姐生日月,所以買澳門船飛有平,成就咗今次嘅旅程。不過,去賭錢不嬲都唔啱我哋,咁澳門又有咩景點呢?

A姐:我唔去大三巴、觀音像、媽閣廟架。
M佬:咁我哋一於望下山,望下海,Macau旅行。

數吓數吓,原來我哋兩個自相識以嚟,去得最多嘅就係日本,第二位原來就係澳門,所以身邊都有唔少朋友問我哋有咩好玩嘅推介,所以今次嘅澳門之旅,就去啲大家可能唔知原來係免費嘅最新景點啦!如果受歡迎嘅,下次再同大家分享旅遊日本嘅心得啦!

氹仔舊城區藝術空間 - 王瑞麟錄像裝置作品展:「我是誰」

嚟到氹仔舊城區藝術空間,又點少得睇藝術品呢!繼之前同A姐睇過【踩界】、【真相】同【生生不息】之後,今期就有由王瑞麟先生嘅錄像裝置作品展 - 【我是誰】。今次嘅作品用幻影轉盤嘅手法,融入中式鳥籠,呈現錄像裝置同混合裝置嘅技術。而王瑞麟先生更希望透過佢嘅作品表達出生活嘅矛盾同掙扎。

好多人都話澳門係文化沙漠、藝術沙漠,但呢個細細嘅藝術空間,每隔2個月都會轉換題材,同A姐次次嚟到都會有新發現架!

地址:澳門氹仔舊城區藝術空間(澳門氹仔木鐸街10號)
營業時間: 2017年10月11日至11月29日 12:00-20:00〔逢星期二至星期日〕

大潭山斜行升降機

2017年10月1日正式啟用嘅大潭山斜行升降機,啟用首日已經吸引大量澳門人同遊客試搭,所以我哋都不甘示弱,喺10日後都嚟試試呢個小玩意先。

除咗搭的士直到目的地之外,其實可以由威尼斯人酒店出發,使用自動步行系統,再行到龍環葡韻盡頭,步程大概10-15分鐘,就會見到呢部斜行升降機喇,由山下到山上,全程唔駛45秒。

上到去瞭望台,可以見到氹仔同路氹城全景,好天氣嘅話,仲可以睇到珠海橫琴。除咗瞭望台,如果想2個人靜靜哋拍吓拖或者做吓運動,不妨行埋環山徑啦。

地址:澳門大潭山
營業時間: 每日07:00 – 18:00

永利皇宮纜車

永利皇宮酒店新開嗰時,部纜車已經好吸睛,但如果想坐一圈,短短8至10分鐘車程,盛惠每人澳門幣100蚊,心諗真係唔好去搶?!

數學題:一圈要100蚊,咁半圈呢?
答案係:免費!FREE!

只要由表演湖纜車站上車,坐到永利皇宮站落車(半圈),就係免費架喇!不過,無論你坐半圈定一圈,記住check埋表演湖嘅表演時間,咁就可以邊坐纜車,邊睇好澎湃嘅噴泉表演啦。

表演湖表演時間
星期一至五: 11:00 – 00:00
星期六和日: 10:00-00:00
每 20分鐘一場(00分、20分、40分)

地址:澳門路氹體育館大馬路
營業時間: 每日11:00 – 00:00
網址:www.wynnpalace.com

澳門巴黎鐵塔

按照法國巴黎鐵塔 1:2 比例興建嘅澳門版,成為近期去澳門玩嘅呃like熱點。如果想上去觀景台,又再盛惠每人澳門幣100蚊。如果想唔駛錢就去到7樓嘅觀景台,你需要嘅係一張金光飛航船飛(媽呀,我坐噴射飛航架)!由依家至2017年12月15日,只要持有當日金光飛航嘅船飛,就可以免費上到巴黎鐵塔7樓嘅觀景台。

 

想去7樓嘅觀景台,首先要喺巴黎人商場嘅5樓,經過歷史長廊,再去到售票處出示金光飛航船飛。上到7樓就見到好近嘅澳門版巴黎鐵塔,經過接駁鐵塔嘅天橋,仲見到好多愛情鎖,其實如果一個鎖就可以留住愛情,咁呢個世界就唔會再有失戀嘅滋味啦。

喺7樓嘅觀景台已經可以環迴整個路氹城嘅風景,但如果想更上一層樓,去到37樓嘅觀景台,咁你仍然需要買飛!

順帶一提,每日18:15-00:00,每15分鐘都會有澳門版巴黎鐵塔嘅燈光show,就啱時間嘅都可以睇睇。

地址:澳門巴黎人澳門路氹金光大道連貫公路
營業時間:每日 11:00 – 23:00
網址:hk.cotaiwaterjet.com

百老匯奇幻秀

去到澳門呢個東方威尼斯,唔睇show又點得呢。仲水舞間?out唔out啲,不如睇百老匯奇幻秀啦!當VIP位賣緊澳門幣380蚊、A區賣緊澳門幣280蚊、而不設劃位嘅B區都賣緊澳門幣150蚊,想平可以上Klook買,每位都係HK$65。但講到明今次係介紹免費景點,所以睇show都係唔駛錢!

方法好簡單,只要用wechat關注GalaxyMacauCN嘅微信,再㩒多兩吓確認,你就會免費得到2張B區嘅門飛。之後就要去到售票處領取門飛,每日13:00開始換飛同只限100個名額,不過,其實知道呢個優惠嘅人唔多,所以我哋3點先換飛都仲有好多quota。不過B區係不設劃位,所以想坐靚位,就要早少少入場喇。

講番個表演,除咗唱歌熱舞,仲有超驚喜嘅百變換裝、阿根廷牛仔馬蘭博舞蹈、流星錘同我哋覺得最精采嘅激光表演。大概45分鐘嘅表演,都好值得一睇。

睇完表演唔好咁快揼咗張飛呀,因為憑票尾去百老匯美食街食嘢仲有8折優惠架!

地址:澳門百老匯百老匯舞台
營業時間:每日 16:00 (星期二除外)
網址:www.broadwaymacau.com.mo

Klook
Klook購買來回澳門船飛

Klook.com


網址:www.klook.com

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:keepintouch@aandmdiary.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *