感受不一樣的……澳門 – 與Monchhichi發現真相
2月同3月將會好難過，因為一日公眾假期都無呀！想去轉旅行？惟有近近哋過大海啦！繼上次帶A姐睇「P.I.B.G.：踩界」展覽之後，我終於發掘到佢除咗港女性格之外（A姐：想死呀！），原來仲有少少文化藝術氣質架。好啦！今次一於再同佢閃遊澳門啦！
一個鐘頭就嚟到氹仔喇，而嚟到氹仔，又點少得木糠布甸呢！之但係，想氹A姐，一個普通嘅木糠布甸又點滿足到佢！所以我哋一於行多幾步，再轉多個彎，就會嚟到亞洲首間以Monchhichi為主題嘅木糠布甸咖啡店。A姐一見到Monchhichi，佢嘅心心眼即時離開咗我，喺呢一刻，我諗佢嘅世界就只有Monchhichi…
嚟到Monchhichi咖啡店就一定要試印有Monchhichi頭像嘅木糠布甸啦！呢度嘅木糠布甸有3種口味，除咗原味，仲有抹茶同Oreo口味，A姐話望見個Monchhichi頭像，真係唔捨得食落肚，概然你唔捨得，我決定幫你食第一啖啦！呢度嘅木糠布甸比較實淨，仲好有口感添！
除咗木糠布甸當然唔少得各款特色飲品啦！另外，仲可以選購各式各樣嘅Monchhichi紀念品同手信添！A姐第一時間就買咗印有Monchhichi嘅瑪麗餅乾，好彩佢都有定力，無買到隻大大隻嘅毛公仔姐！
另外，咖啡店2樓，仲設有影相區，身為A姐粉絲嘅Monchhichi，又點可以唔同A姐影多幾張相呢！
食飽飽就行去氹仔舊城區扮吓文青，嚟到氹仔舊城區藝術空間仲睇到由葡美裔攝影藝術家Hugo Teixerira嘅攝影展！今次嘅攝影展主要係想紀錄澳門喺發展過程中，一班默默耕耘嘅工人喺竹棚之中，好似蜘蛛咁飛簷走壁，險象環生卻無畏無懼！而Hugo Teixeira仲同我哋分享利用玻璃版印刷及氰印嘅照片，從而記錄出施工中建築物嘅美感。
M：點解會有今次嘅攝影展？
H：想通過拍攝施工中嘅樓宇，捕足時間嘅飛逝，以及那些無名嘅工人，他們以常人無法企及嘅勇氣喺竹棚上建起令人目眩嘅高樓。呢啲樓宇被尼龍網格包圍住，好似繭一樣，等待最終破繭而出，展示其真正嘅面目同形態。
M：今次嘅攝影展有咩技術上嘅賣點？
H：用嚴謹嘅舊式攝影技術，並展示兩種影像：
玻璃版照相──以玻璃濕版創造的正片效果
氰印照相──經過青藍色印刷過程製成
所以今次採用重型視像照相機，運用紙張、金屬和玻璃塗層，等觀眾穿越時光隧道回到遠在數碼時代來臨前，踏上發現19世紀攝影魅力嘅懾人旅程。
M：今次嘅攝影展籌備咗幾耐？
H：年半。
M：今次嘅攝影展有無咩難度？
H：因為用咗舊式攝影技術，所以喺運送咁大部相機係有一定難度；加上好多哂相嘅相紙、零件都已經無再出產，除咗令成本上升，仲要直接聯絡廠家去供應，所以更加要小心處理！
呢個攝影展雖然面積唔大，但就睇到澳門城市化嘅過程，及對一班寂寂無名嘅工人作出致敬！
Monchhichi Serradura 木糠布甸主題咖啡店
地址：澳門氹仔客商街 7 號
營業時間：早上 12 時至晚上 9 時〔逢星期二休息〕
電話：+853 6239 9754
攝影展：「暫態：蠻勇者與高聳網」
地址：氹仔舊城區藝術空間（澳門氹仔木鐸街10號）
營業時間：1月13日至3月31日 12:00-20:00〔逢星期二至星期日〕
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：aandmdiaryhk@gmail.com
