藝文青閒遊澳門

去澳門仲去例牌景點行程？就算唔厭，都怕咗同自由行迫啦！所以今次A姐M佬拍拖去到澳門，睇吓藝術品之餘，去埋又靚又有格調嘅Cafe嘆吓，嚟個藝文青半日遊，享受澳門寧靜嘅一面！

打卡點1：氹仔舊城區藝術空間 － 唐娜阿拉岡 (Ana Aragão)插圖展覽：「幻想世界」

隔一排就有新update嘅氹仔舊城區藝術空間，呢期就有葡萄牙插畫藝術家安娜阿拉岡 (Ana Aragão) 首次喺澳門嘅個人展覽 － 【幻想世界】。佢嘅作品只係用上簡單嘅黑色墨水筆同水彩，刻畫出一系列獨特嘅建築物。

作品以抽象插圖，無限嘅想像空間，加上童話嘅感覺，令每座建築物都變得好得意，好有新鮮感。

作品經過特別修整，分為3個系列：
「結構」以黑色墨水筆畫成，係由獨立細胞式房子組成嘅模塊結構；

「Hrönir」係一組共44幅圖拼出彩虹顏色嘅作品，運用水彩同黑色墨水筆，畫出充滿力量嘅物體；

「幾乎藍色」系列係進化版本，虛構怪物嘅形成反映演變嘅創作過程。

地址：氹仔舊城區藝術空間（澳門氹仔木鐸街10號）
營業時間：2017年12月6日至2018年2月21日 12:00-20:00〔逢星期二至星期日〕

打卡點2：Common Room

三盞燈出名多嘢食，啱晒為食嘅A姐M佬！食飽飽散步行到去柯利維喇街，呢間係正角落頭嘅Common Room好有日系文青風呀！

一大塊落地玻璃，引入充足嘅自然光，令室內光猛舒服。而室內設計採以日本簡約嘅木系家具，簡單得嚟又不失型格，啱晒我哋呢啲文青打卡啦。

店內分為兩層，除咗咖啡同茶類飲品之外，仲有小食、主菜同甜品。不過，我哋之前食得太飽，所以入嚟飲杯嘢，享受一吓澳門嘅恬靜生活。

地址：澳門柯利維喇街47D號
營業時間：星期一至日 12:00-22:00

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：keepintouch@aandmdiary.com