火鍋壽司全35品放題 倫敦日式放題Eat Tokyo

Eat Tokyo係倫敦其中一間CP值較高嘅日本餐廳，整體價錢唔貴，而且質素都有保證。如果想食得更盡興，當然就係食放題啦。位於倫敦Golders Green嘅Eat Tokyo就推出35品火鍋及壽司放題，人均消費約£30，即刻睇睇有咩係必食，又有咩係伏嘅食物啦！

湯底
日本火鍋湯底當然唔少得壽喜燒湯底啦！不過，呢度係無壽喜燒湯底架，勁失望囉！至於呢度嘅湯底就有鏗魚湯、蕃茄湯、辣面豉湯同清湯，我哋就叫咗蕃茄湯，酸酸甜甜都幾醒胃。但值得留意嘅係湯底係要另外收費架！

牛肉
喺英國打咗唔少邊爐放題，大部份牛肉都係冰鮮n年嘅牛肉卷，所以絕對會令你失望。不過喺Eat Tokyo嘅放題，牛肉用上安格斯牛肉，切到一片片，肉味香濃，係encore再encore嘅選擇。

豚肉
至於豬肉就比較瘦，所以食嘅時候會嚡口，唔夠滑溜，勝在肉味濃香。

火鍋配料
除咗牛肉同豚肉，呢度仲有海蝦、魷魚圈、豆腐、紅蘿蔔、金菇、木耳、冬菇、大葱、西蘭花、 蟹柳、凍豆腐、白菜、生菜、麵條。落咗order之後，店員會按人數給予一碟火鍋配料，當中海蝦同魷魚圈都真係好好味，不過，蟹柳就超級難食喇。

牛油果配炸蝦天婦羅卷
餐廳提供6款廚師推介嘅卷物，不過六款只可以揀一款，我哋就揀咗牛油果配炸蝦天婦羅卷。香口爽脆嘅炸蝦天婦羅，配上軟腍嘅牛油果，口感形成強烈對比，好味！

壽司及丼飯
除咗廚師推介嘅卷物之外，其實任食放題嘅壽司及當飯選擇都唔少，不過，我只係推介三文魚軍艦壽司，因為魚生同飯嘅比例係最適中。至於其他嘅壽司主要都係食飯，啲魚生份量少到唔知食緊咩，絕對係用飯填飽你個胃啦！

小食
其他小食仲有麵豉湯、沙律、之豆、炸豆腐、炸雞等等，不過我哋留肚食牛肉，所以呢啲小食我哋就全部無叫到喇！

Eat Tokyo G2 Shabu-Shabu
地址：628 Finchley Rd, London NW11 7RR
電話：+44 020 3609 8886
營業時間：星期一至六 11:30 – 15:00、17:30-23:30；星期六 11:30 – 23:30；星期日 11:30 – 22:30

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com