[香港Staycation] 只有靚景嘅舊酒店 馬哥孛羅香港酒店

尖沙咀係香港一個熱門嘅旅遊點同商業區,所以呢區嘅酒店非常多,想玩Staycation嘅,呢區當然有唔少選擇!今次同M佬嘅Staycation主題,一於喺海港城唔睇價錢瘋狂shopping啦!呢個主題俾佢反完白眼之後,最終都係唔approve,我嘅計劃正式宣告失敗,我都係乖乖咁留喺今次入住嘅馬哥孛羅香港酒店啦!今次呢個馬哥孛羅香港酒店Staycation package主打貴賓室禮遇,所以一日三餐都可以喺呢度享用,即刻同大家分享今次嘅入住體驗啦!

酒店大堂
馬哥孛羅香港酒店位於尖沙咀廣東道,旁邊就係尖沙咀天星碼頭同巴士總站,至於港鐵站就遠少少,步行大概需要10-15分鐘。當然,酒店嘅最大賣點就係連接住香港最大面積嘅購物商場:海港城,買嘢同補給日用品都好方便,真係行足1日都有排行呀。加上依家臨近聖誕節同農曆新年,節日氣氛濃厚,shopping都有唔少優惠呀(我陣間要再同M佬sell吓我個唔睇價錢瘋狂shopping嘅大計先得)!

馬哥孛羅香港酒店嘅大堂喺正商場旁邊,酒店喺1969年開業,係香港其中一間五星級酒店,外牆都睇得出係有歷史嘅建築物,但酒店大堂除咗樓底比較矮,保養同設計都唔差嘅。酒店一共18層,提供665間客房同套房。今日Check-in人流比較多,所以我哋2點嚟到已經大排長龍,而酒店亦未能安排房間,結果要等到3點先可以攞到房卡上房。其實作為五星級酒店,職員大可以先安排我哋喺貴賓室等待,唔洗叫我哋四圍行;另外,職員對於我哋嘅package好似唔太了解,亦無講解早餐同貴賓室嘅地點,呢到嘅陪訓可能要加強先得。

客房區域
今次入住豪華海景房,一入到房間,會有2個「嘩」!第一個「嘩」係酒店嘅海景真係好靚,IFC同ICC都睇到,當然唔少得中區商業大廈同維港景啦;第二個「嘩」係間房真係好舊,仲有一陣霉味!另外,房間嘅衛生亦做得非常差,窗嘅玻璃充滿手掌印,燈掣亦係笠痴痴,所以住之前,我要先用濕毛巾同火酒清潔。講真,作為一間5星級酒店,加上疫情期間,衛生清潔要求真係相對較高,希望佢哋嘅員工可以細心啲。

至於雙人床嘅size非常大,轉身反轉再反轉都無問題,床褥係偏硬,好彩床單柔軟又無毛粒。枕頭總共有4個,兩個較軟,兩個較硬。窗簾唔係電動模式,所以臨瞓同起身嘅時候都要行埋去拉同閂。

房間內仲有一個行李室,除咗放行李,仲放有免費嘅咖啡capsule同茶包。

另外,房間除咗書枱仲有小客廳,無論做嘢定飲嘢傾計,都有好多空間。

浴室區域
浴室乾濕分隔,浴缸同馬桶係廁所內,而洗手盤就係廁所外。浴缸嘅水壓時大時細,用舊款水龍頭,所以較水會比較麻煩,勝在可以浸浴。而浴室內嘅日用品係知名品牌:The Merchant of Venice。各項日常用品亦有提供如浴袍、拖鞋、牙刷、浴帽、棉棒等等。

娛樂區域
喺馬哥孛羅香港酒店嘅最大娛樂當然係shopping啦,除此之外,酒店附設室外游泳池同健身室。不過,因應疫情,泳池並無開放。至於健身室嘅器材都有唔少,食飽飽都可以過嚟做吓運動。

餐飲服務
酒店設有多間餐廳,包括:Cucina、馬哥孛羅咖啡廳、大堂酒廊同西村日本料理。

雅悅廳
今次呢個馬哥孛羅香港酒店package主打貴賓室禮遇,所以我哋嘅下午茶同晚餐都喺呢度享用。

呢度嘅下午茶絕對係驚喜,甜品選擇超多,味道又好好,雖然鹹點就比較少,但絕對可以自製high tea,要知道喺酒店嘆high tea絕對唔平!食物方面有藍梅芝士蛋糕、紐約芝士蛋糕、葡撻、三文治、朱古力蛋糕、水果等等,加上會不斷轉款,真係呢個package最吸引嘅地方。

但晚餐就非常失望,職員服務態度又差,refill嘅速度又慢,食物又難食,特別係個揚州炒飯(其實係三色豆+蝦炒飯),完全係無味。

馬哥孛羅咖啡廳
至於早餐就係喺馬哥孛羅咖啡廳享用,早餐11點完,我哋9點嚟到,初時見到食物都有唔少選擇,refill速度都算快,但9點半後refill就比較慢,甚至係無refill,好多吉盤。

至於近幾次住Staycation嘅中式點心都好驚喜,但馬哥孛羅咖啡廳嘅中式點心係好失望,所有點心都好似叮叮點心。

全份早餐最好味應該係煎雞蛋喇,所以經常大排長龍。另外,湯麵都唔錯嘅,熱辣辣,排骨又入味。

總結嚟講,呢間酒店真係好舊,除咗有個靚靚日落海景同海港城地段,其他方面,特別係衛生確實做得麻麻,我哋就都唔太推薦。

世界各地景點門票邊度買至平?
–> Klook:www.klook.com <–
機票、酒店、旅遊產品邊度買至平?
–> Trip.com:www.trip.com <–

馬哥孛羅香港酒店 Marco Polo Hongkong Hotel
地址:九龍尖沙咀海港城廣東道3號
網址:www.marcopolohotels.com

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
Youtube:A姐M佬玩樂日記
報料或合作:keepintouch@aandmdiary.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *