[香港Staycation] 情人節浪漫住宿體驗 荃灣如心海景酒店
情人節就梗係想同另一半過二人世界啦，我同M佬今次就揀咗荃灣嘅地標：荃灣如心海景酒店暨會議中心 L’hotel Nina et Convention Centre，過一個至high嘅情人節！講緊嘅high係荃灣如心海景酒店係新界最高嘅大廈，亦係全港第六高嘅摩天大廈，望住呢個至高嘅海景嘆晚餐真係夠晒浪漫！荃灣如心海景酒店嘅情人節Staycation Package「甜蜜情人節住宿套餐」性價比超高，就算情人節正日撞正要拜年，都有唔少選擇，所以有心其實唔怕遲，因為每一日都可以係情人節呀！
酒店大堂
酒店位於荃灣市中心，大概步行5分鐘，就可以去到荃灣西港鐵站，附近仲有多個大型商場、日式超市同百貨公司等，生活配套齊全，買嘢同補給日用品都好方便，真係行足1日都有排行呀（我陣間要同M佬sell吓我個唔睇價錢瘋狂shopping嘅大計先得）！
酒店分為兩座，高座為89層，高318.8米；而低座為42層，高163.7米。因為疫情，酒店嘅check-in大堂位於41樓，坐電梯上到嚟已經畀呢個開揚嘅景觀深深吸引，可以俯瞰荃灣、青衣，遠至汀九橋嘅景色。酒店有1,608間客房，遇著weekend或假期，相信Check-in人流會比較多，大家要畀啲耐性喇！好彩酒店職員嘅效率非常高，而且服務態度好好，仲主動幫我哋安排至第二日嘅3點退房，真係瞓埋晏覺先check-out都得。
據說，酒店高座代表龔如心丈夫王德輝，而低座就代表龔如心，連接兩座大廈嘅天橋就寓意夫婦手牽手情不變。上房之前，可以行吓呢條香港少有嘅玻璃底天橋，可以打卡又夠晒刺激。
客房區域
客房分佈於高座同低座，而我哋今次就入住位於高座50樓嘅行政海景客房。我哋嘅房間係corner room，所以非常闊落，根據官方網站，客房面積為40至58平方米。另外，因為我哋係情人節嘅Staycation Package，所以酒店會提供免費雅緻客房佈置，可以為另一半帶嚟小驚喜添！
房間採用落地玻璃，所以景觀好開揚，一邊就望住荃灣市中心，天氣好嘅時候，仲可以遠眺大帽山山頂；而另一邊就係青衣、藍巴勒海峽同汀九橋，可以睇到日落嘅海景呀！另外，因為呢度係成個荃灣區最高嘅大廈，所以房間嘅私隱度非常高。
雙人床屬於King size，床褥軟硬度適中偏硬，而床單非常柔軟，枕頭總共有4個，略嫌較扁，但如果將2個疊起嚟瞓就啱啱好喇。床嘅兩邊都有床頭櫃，放吓眼鏡或電話都得。雖然床嘅兩邊無插頭位，但成間房間其實都有唔少插頭位，都算方便。
除咗雙人床之外，房間嘅偏廳位置仲有貴妃椅同梳化。另一邊就有一個飯廳位置，飯枱夠晒大，足足可以坐4個人，而且亦有USB插頭位，所以除咗食飯亦可以成為一個辦公室嘅位置。
另外，電視嘅頻道選擇算多，亦預先下載唔少apps，有唔少電影同劇集選擇，亦可以透過電視上網，房間嘅娛樂設備都相當充足，絕對唔怕悶啦！至於房間嘅mini bar就只有基本嘅電熱水壺、蒸餾水同雪櫃。
浴室區域
今次我哋入住嘅行政海景客房嘅洗手間非常大，洗手盤有兩個，梳洗可以一人一隔，勁sweet咁一齊刷牙啦！至於廁所同淋浴乾濕分離，唔怕掙廁所用。
至於成個浴室嘅最大賣點就係淋浴同浴缸部份，因為落地玻璃正對住荃灣市區，望住呢個景沖涼，M佬話真係有莫名嘅興奮感。雖然酒店樓層比較高，但如果你對私隱都仍有擔心嘅，沖涼時可以將窗簾拉上。
喺浴缸浸浴除咗睇到荃灣市中心嘅景色，亦可以邊睇電視邊享受泡泡浴，非常寫意。就算唔浸浴，呢個浴缸配合城市景都係一個打卡點嚟㗎！
不過，浴室同客房無門亦只有玻璃分隔（無窗簾），對於非情侶嚟講，呢隻房type就未必適合。
另外，個人用品亦十分齊全，包括牙刷、牙膏、梳、浴帽、化妝棉等，而洗頭水、沐浴露、護髮素同潤膚露就用法國品牌 Muguet D‘Ogive，質素都唔差㗎！不過，房間就無浴袍提供，有需要就自行攜帶啦！
泳池及健身中心
酒店嘅9樓設有室內同室外嘅游泳池同健身室，不過因為疫情期間，暫時未有開放。
餐飲服務
酒店設有三間餐廳，分別係自助餐廳Cafe Circles、中式餐廳同天空酒廊（午餐、下午茶）。至於呢個情人節Package就包咗早餐同晚餐，即刻睇睇有咩食啦！
龍蝦晚餐
因應疫情期間，晚市暫停堂食供應，所以晚餐安排喺房度食。房間設有一張四人飯枱，配合埋高層嘅海景景色，浪漫嘅二人世界就係咁簡單之嘛！如果M佬有預備埋蠟燭，呢個絕對係一個無價嘅燭光晚餐啦！
頭盤有鮮蝦牛油果車厘茄沙律伴檸檬油醋汁、南瓜忌廉湯配黑松露油同麵包。特別鍾意個沙律，好新鮮仲有勁多牛油果，好鮮甜好開胃。
至於主菜就係一人一份焗波士頓龍蝦（半邊）配檸檬牛油汁及慢燒牛柳配乾蔥汁忌廉千層薯配香草車厘茄及炒雜菌。份量夠晒多，而且龍蝦勁厚肉又彈牙，仲有唔少膏。蟹鉗好細心咁預先起殼，食得夠晒方便，啖啖肉好滿足。牛柳叫咗五成熟，火候啱啱好，肉味香濃，夠晒Juicy！
甜品就有意大利馬斯卡邦忌廉蛋糕紅桑子醬，甜度啱啱好，唔會太甜，啱晒我哋口味。
最後仲有飲品，不過我哋就upgrade咗，叫咗支汽酒，襯番成餐飯同呢個靚景啦！
中西式早餐
第二朝嘅早餐就喺酒店嘅Cafe Circle食早餐定食，飲品就係自助形式。早餐雖然唔係自助餐，但都好豐富㗎，有皮蛋肉碎粥、豉油皇炒麵、小籠包、烚蛋、腸仔、煙肉、蕃茄同多士，絕對夠飽肚。食完之後，仲有時間返上房瞓多陣，真係可以慢慢咁享受我哋嘅二人世界。
甜蜜情人節住宿套餐
√一晚住宿
√雙人精選中式早餐
√雙人精選龍蝦客房晚餐
√贈送氣酒乙支 (750毫升)
√免費雅緻客房佈置
√免費延遲退房至下午3時
√加$200即可升級至高座行政套房及免費獲贈HomeShake手調雞尾酒懶人包一份*
價格：
每晚 HK$1,700 – 海景行政大床客房 (高座) +10%
每晚 HK$1,900 – 行政套房 (高座) +10%
荃灣如心海景酒店暨會議中心 L’ hotel Nina et Convention Centre
地址：香港荃灣楊屋道8號
網址：www.lhotelgroup.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
