[香港Staycation] 迷人城門河馬場景 香港沙田萬怡酒店

喺香港住酒店玩Staycation成為大家其中一個weekend熱門娛樂節目,所以我哋呢段時間都玩咗唔少主題嘅Staycation Package,好似有啲以食為主,有啲就以氣派為主,但講到CP值高嘅,我哋就推介萬豪國際(Marriott International )旗下嘅萬怡酒店,上次就試過位於西營盤嘅香港萬怡酒店,A姐十分滿意,所以今次就嚟到香港沙田萬怡酒店(Courtyard by Marriott Hong Kong Sha Tin),繼續我哋住得正嘅系列。

酒店大堂
香港沙田萬怡酒店位於沙田石門,喺石門港鐵站C出口,行5分鐘就到喇,雖然石門唔係沙田嘅市中心,但喺石門港鐵站對出亦有商埸,無論生活百貨定餐廳都有唔少選擇。另外,酒店亦有提供免費接駁巴士,往返大學站、科學園、新城市廣場、圓方同尖沙咀中間道。

嚟到酒店位於1樓嘅大堂,樓底非常高,喺大堂仲放有唔少藝術品,其中最囑目就係樓高2層蜿蜒翻捲嘅玻璃雕塑,呢個雕塑由58,775個柔性玻璃組成,長達200英尺,營造出優美靈活又放鬆嘅感覺。

客房區域
香港沙田萬怡酒店喺2013年2月開幕,樓高30層,提供524間客房,係亞洲最大同全球第二大嘅萬怡品牌。我哋今次入住嘅係位於28樓嘅河景行政客房(Executive River King)。平時我哋住酒店,通常都係海景或者城市景,真係第一次以河為景,不時仲會睇到城門河上玩獨木舟同龍舟嘅練習,加上行政房間嘅樓層比較高,可以睇到沙田馬場,甚至遠眺吐露港嘅景色。另外,因為今日萬里無雲,仲可以睇到八仙嶺嘅山脈添!

雙人床屬於標準size,軟硬度適中,床單好柔軟。枕頭總共有4個,兩個較軟,兩個較硬,瞓覺都算舒服呀!窗簾嘅遮光度一流,但就唔係電動模式,所以臨瞓同起身嘅時候都要行埋去拉同閂窗簾。

床嘅兩邊都有插頭,方便大家充電,加上智能鬧鐘提供兩個USB充電位,仲可以用藍芽接駁電話播放音樂,音質都算唔錯。

另外,客房區域內亦設有書檯,望住河景,夠晒開揚。仲有提供USB充電位同萬用插頭,方便遊客使用。

房間內亦設有mini bar,免費提供蒸餾水、茶包同咖啡包。衣櫃內仲有保險箱、拖鞋、浴袍等等,夠晒貼心!

浴室區域
浴室簡簡單單,光猛整潔,呢個房種係企缸,範圍都唔細。至於沐浴用品係使用酒店自家品牌Nirvae,味道算清淡,但如果用唔慣就記住自行準備喇!至於其他個人用品都齊全,包括:剃鬆刀、牙刷、梳等等。

泳池、健身室
酒店設有泳池同健身中心,泳池十分之大,仲有3個按摩水柱,但要留意冬天時泳池就會關閉;而健身室內嘅設施齊全,可以玩成個下奏。至於景觀就以附近嘅建築物同住宅為主。

餐飲服務
酒店嘅餐廳設有MoMo Cafe、LEVELthirty觀景酒廊同大堂吧。

大堂吧
鑑於疫情影響, 30樓嘅行政酒廊暫停開放,改到一樓嘅大堂吧,入住行政客房或萬豪旅享家(Marriott Bonvoy)嘅白金卡或以上之住客就可以嚟到享用全日免費嘅咖啡、茶、汽水同小食。

當然每日嘅重點就係每日17:00至19:00嘅happy hour啦,呢段時間提供各式各樣嘅紅酒、白酒、有汽酒同烈酒,可以自行調製你喜歡嘅cocktail。至於食物方面有沙律、生果、芝士同蛋糕,熱食就有律韮菜包、炒米粉同關東煮,味道普普通通,唔算突出。

MoMo Cafe:自助早餐
今次我哋呢個Staycation Package包埋喺MoMo Cafe食自助早餐,食物種類以萬怡品牌嚟講算非常豐富,就算眼瞓嘅都要去試試。

自助早餐時段,無職員帶位,我哋喺counter核對完資料就要自行搵位,好彩空間夠大,所以都有唔少座位。食物方面有中西式熱食、egg station、冷盤等等,仲有即煮面檔,麵檔除咗一般嘅丸同菜,連肥牛同雞肉都有,麵底仲有4款選擇。

我特別欣賞佢個中式點心,選擇有香莤餃、珍珠雞、叉燒包、蘿蔔糕等等,至於粥方面,除咗白粥,仲有少見嘅菜乾排骨粥。

最正係仲有egg station,可以即叫即煎新鮮雞蛋。

此外,茄汁豆、腸仔、煙肉、乳酪、沙律同果汁等,驚喜連泡菜、枝豆都有。

世界各地/香港景點門票邊度買至平?
–> 詳情請睇:https://wp.me/p8vzXP-6G <–

香港沙田萬怡酒店 Courtyard by Marriott Hong Kong Sha Tin
地址:新界沙田安平街1號
網址:www.myclubmarriott.com

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
Youtube:A姐M佬玩樂日記
報料或合作:keepintouch@aandmdiary.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *