[香港Staycation] 星級品牌月租酒店 旺角智選假日酒店

月租酒店對於追求二人世界、私人空間,或者屋企要裝修,定係同M佬鬧交要冷靜吓,都係一個唔錯嘅選擇。香港雖然有唔少酒店提供月租住宿服務,但如果想享受國際品牌質素,今次我哋就嚟到屬於洲際酒店集團(ihg)位於旺角嘅智選假日酒店,無論月租定玩吓兩日一夜Staycation都可以儲酒店會籍分數,係一個性價比高嘅住宿選擇!加上酒店位處市中心,真係去邊都夠晒方便。

酒店大堂
香港旺角智選假日酒店距離油麻地港鐵站約5分鐘步程,而喺彌敦道亦有多條巴士路線選擇。酒店位於內街,靜中帶旺,無論去廟街定旺角朗豪坊都係10-15分鐘步程內。另外,酒店附近就有二十四小時超級市場、便利店同餐廳食肆,生活配套非常方便。

lobby嘅樓底高兩層,入到嚟覺得好舒服,空間感十足,而酒店樓高18層,提供147間客房,主要分為大床房同雙床房,聽酒店職員講,雙床房亦可以合併為一張大床,彈性十足。

大堂亦設有販賣機同電腦添。

客房區域
Check-in完之後,需要利用匙卡搭電梯前往入住樓層,保安度高。當我哋一出電梯,走廊闊落,加上走廊有唔少窗,透光到十足,非常光猛。

我哋今次入住房間景觀為櫻桃街公園一帶,仲可以眺望ICC添。喺窗嘅前面就有一張超長嘅梳化,除咗可以坐喺度睇吓電視同睇風景之外,亦可以擺吓手袋背囊,夠晒方便。至於,電視除咗提供本地免費頻道之外,都有提供衛星頻道選擇,兩個人坐喺度睇吓電視,呢啲咪就係簡單嘅幸福感囉。另外,房間亦有提供免費wifi,速度又快又定,咁月租嘅朋友連上網錢都可以慳番啦!

住酒店最重要當然係張床啦,呢度嘅床係Queen Size,床單軟綿舒服,而枕頭總共有4個,2個軟2個硬。床嘅兩邊都有床頭櫃同閱讀燈,方便放吓眼鏡、電話或者睡前閱讀都得。另外,兩邊亦分別有插頭位置同iHome藍芽喇叭,可以透過喇叭作為USB充電位。因為酒店位處內街,加上房間隔音唔錯,遮光度一流,喺度瞓覺可以瞓到自然醒啊!

房間內亦有一張闊落嘅工作枱,加上有唔少插頭位同USB插頭位,無論食嘢、放嘢定係做嘢都夠晒方便。

另外,房間嘅日常用品齊全,包括:熱水煲、蒸餾水、茶包、三合一咖啡包、風筒、拖鞋、衣櫃、保險箱同雪櫃,如果有大件行李嘅,呢度都有行李架㗎!

浴室區域
浴室乾濕分離,淋浴位置非常寬躺,水壓一流。酒店亦有提供牙刷、浴帽、拖鞋、剃鬚刀、沐浴露同洗頭水等個人用品。其中洗手液、沐浴露、洗頭水同護髮素更加係英國品牌Ben Sherman,M佬就表示非常滿意。

空中花園
位於酒店18樓就係一個空中花園,花園為一個半戶外嘅公共空間,大家可以買啲嘢飲上嚟睇吓風景,傾吓計都係一個唔錯嘅選擇。

另外,花園亦設有一個gym corner,附近咁多嘢食,食肥咗就上嚟跑吓步同造吓太空漫步,咁月租嘅朋友連去健身室嘅錢都可以慳番啦!

而空中花園亦設有最重要嘅洗衣室,作為月租嘅朋友仔,洗衫一定係最重要嘅一環,所以酒店喺呢度亦設有多部洗衣機、乾衣機同熨斗,大家可以自行使用。當然你亦可以使用酒店附設嘅洗衣服務,只需要將污糟嘅衫褲鞋襪放入洗衣袋,就會有酒店職員幫你洗得乾乾淨淨啦!

Great Room
位於酒店嘅5樓,就有二十四小時開放嘅Great Room。大家喺附近買咗啲嘢食,又或者想搵個地方做吓嘢,都可以嚟到Great Room。

餐飲服務
酒店嘅餐廳,只提供早餐時段。呢度嘅飲品係自助放題形式,至於食物雖然唔係自助餐,但都有六款選擇,包括西式早餐、本土情懷、中式品嚐、健康之選、輕盈早餐同兒童之選。

西式早餐
有炒蛋、火腿、香腸、茄汁豆、薯餅、多士同水果,成份All Day Breakfast咁,夠晒豐富。

本土情懷
作為港式嘅早餐,又點少得一碗公仔麵呢!一碗熱辣辣嘅榨菜肉絲公仔麵、配上太陽蛋同水果,同樣豐富,仲會不定期轉換新款,就算喺度長住嘅朋友,都會有新鮮感啦!

住宿計劃

特惠住宿計劃詳情:
√ 連入住期間於酒店享用4份定食早餐
√ 連12枚自助洗衣機及乾衣機代幣 (每3枚代幣約可清洗及烘乾 4-6 磅衣服) (額外代幣需另收費)
√ 免費房內 Wi-Fi
√ 房內舒爽淋浴設備
√ 每週三次房間清潔服務
√ 另可以優惠價每位每份港幣 45 元另加 10% 服務費享用定食早餐
√ 二人入住30晚$9,780起

住宿連超市購物禮券:
√ 雙人入住客房一晚
√ $100超市購物禮券
√ 二人入住每晚$500起,連服務費$550起
優惠日期:即日至2021年4月30日

香港旺角智選假日酒店 Holiday Inn Express Hong Kong Mongkok
地址:香港旺角登打士街1號
網址:www.ihg.com

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
Youtube:A姐M佬玩樂日記
報料或合作:keepintouch@aandmdiary.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *