[香港Staycation] 月租罕有寵物歡迎服務式住宅 香港莎瑪炮台山服務式公寓

土地問題除咗係歷任政府嘅難題,亦係唔少香港人嘅生活所需。想過二人世界、追求私人空間?除咗weekend嘅Staycation,月租酒店近期都有唔少優惠,租期比租樓有彈性,更重要係可以享受酒店式嘅服務添!位於港島區嘅莎瑪炮台山服務式公寓(Shama Fortress Hill Hong Kong),無論係新婚嘅二人世界,定係一家四口嘅小康之家,莎瑪炮台山服務式公寓都有唔少房型選擇,更大賣點係歡迎寵物入住,今次我同M佬趁屋企裝修,就帶埋我哋嘅B狗嚟住一排啦!

服務式住宅大堂
莎瑪炮台山服務式公寓位於炮台山港鐵站旁邊,步程僅需1分鐘;而除咗港鐵,亦可選擇乘搭電車同前往各區嘅巴士路線,地理位置真係無得輸呀!另外,服務式住宅附近就有超級市場、便利店同餐廳食肆,生活配套非常方便,啱晒長住嘅住客啦!

大堂位於2樓,設有免費嘅capsule咖啡同茶,喺辦理check-in嘅時候,就可以嘆住杯咖啡了解入住須知。另外,平時住客亦可以嚟到大堂,免費享用咖啡同茶㗎!服務式住宅樓高19層,提供115間客房,房型以唔同面積分為一房一廳、一房兩廳、兩房一廳同兩房兩廳等間隔,適合唔同人士選擇。

另外,近年飼養寵物風氣盛行,所以服務式住宅亦兼顧寵物住客,設有專用嘅電梯,歡迎寵物入住,連我哋嘅B狗都表示入住愉快呀!

房間大廳
Check-in完之後,需要利用匙卡搭電梯前往入住樓層,保安度高。我哋入住嘅房間係兩房兩廳連露台,係呢間服務式住宅其中一間最具代表性嘅客房。房間大廳呈正方形,採光到十足,中間放有大大張梳發同茶几,一家人可以坐喺度睇吓電視,閑話家常。電視頻道選擇甚多,除咗一般嘅本地免費電視頻道,亦有其他國家頻道,睇波睇戲都有唔少選擇。如果咁多個頻道都唔啱睇,房間亦有DVD機同音響系統,可以喺2樓嘅大堂租借港產及中外電影,客廳即時變成私人電影院。

至於飯廳就有一張長長嘅餐枱,除咗可以聚餐食飯,亦可以成為辦公枱。

值得一題係每間房間都有專屬嘅房務員,除咗一般嘅房間打掃同每星期兩次更換床上用品及毛巾之外,佢亦都會了解你嘅生活習慣,讓你喺入住嘅時候更加舒適寫意。

房間區域
客房內設有兩間套房,房間位於內街,相對較靜,而其中一間房,仲望到少少海景添,夠晒開陽。兩間套房嘅雙人床屬於Queen size,係莎瑪特製嘅Slumber睡床配特柔軟床墊,軟硬度適中,床單非常柔軟,加上窗簾嘅遮光度十足,喺度瞓覺真係非常舒服。床嘅兩邊都有床頭櫃,放吓眼鏡或電話都得,而其中一間房仲有藍芽喇叭,除咗聽歌仲可以透過喇叭作為USB充電位呀!而每間房間都有電視,臨瞓前睇吓電視放鬆吓都唔錯。另外,衫褲鞋襪比較多嘅朋友亦可以放心,兩間房間都有大大個衣櫃㗎!順帶一提,衣櫃內亦設有電子保險箱。

浴室區域
話明套房,所以兩間房間都有獨立浴室,浴室乾濕分離,其中一間係浴缸,另外一間係企缸,想浸浴定淋浴,悉隨尊便。服務式住宅亦有提供牙刷、牙膏、浴帽、拖鞋、剃鬚刀等個人用品,其中沐浴露、洗頭水、護髮素同潤膚露更加係澳洲品牌METIS添!

廚房區域
廚房面積唔大,但廚具用品一應俱全。雪櫃、微波爐、餐具、煲、pan、杯杯碟碟、刀具等等等等都有齊,而電磁爐嘅爐頭都有兩個,話咁易就煮到三餸一湯啦!

至於入住時,每間房間都會送上歡迎禮品包,入邊有咖啡、茶包、杯麵、水、果汁、朱古力等等,夠晒細心體貼。

露台區域
成間房間最令我哋滿意,就係呢個露台。露台非常大,放有太陽椅,攞住杯紅酒出去chill吓,真係好relax呀!而B狗都好鍾意呢個露台,啱晒佢喺出邊放電啦!

空中花園
至於服務式住宅嘅頂層都設有空中花園,喺空中花園可以睇到炮台山附近嘅景色,夠晒開陽。空中花園亦有燒烤設備同香料盆栽,如果煮嘢食嘅時候需要用到香料,可以嚟到呢度採摘最新鮮嘅食材啦!

洗衣中心
長住嘅朋友其中一個最關心嘅問題當然就係洗衫服務啦!房間內雖然冇洗衣設備,但就設有自助洗衣中心,只要自備洗衣粉同柔順劑,喺呢度洗衫乾衣都係免費㗎!當然你亦可以使用服務式住宅附設嘅洗衣服務,只需要將污糟嘅衫褲鞋襪放入洗衣袋,房務員幫你洗得乾乾淨淨啦!

會所設施
喺服務式住宅嘅2樓設有一個會所,會所內設有圖書室同健身室,健身室嘅用品尚算齊全,平時得閒落嚟做吓運動都唔錯。另外亦有蘋果電腦同打印設備,方便商務嘅住客。

香港莎瑪炮台山服務式公寓 Shama Fortress Hill Hong Kong
地址:香港北角英皇道151號
網址:www.shama.com/fortresshill

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
Youtube:A姐M佬玩樂日記
報料或合作:keepintouch@aandmdiary.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *