[香港Staycation] 貼心管家服務 香港瑞吉酒店

再次登上Tripadvisor香港酒店第一名嘅香港瑞吉酒店(The St. Regis Hong Kong),酒店嘅賣點係獨特貼心嘅管家服務、品牌豪華嘅定位、親切殷勤嘅服務,令人由踏入酒店嘅第一刻已經深深感受到佢哋嘅價值。所以今年A姐嘅生日,我就同佢嚟到香港瑞吉酒店玩吓Staycation,試埋酒店嘅餐廳同酒吧,等佢享受一個如公主般嘅五星級豪華體驗啦!住完之後,絕對覺得Tripadvisor第一名係實至名歸!

預訂網址:www.klook.com

酒店大堂
酒店位於香港會議展覽中心旁邊,由灣仔站步行5-10分鐘即可到達,未來更喺正港鐵會展站隔離。除咗鐵路,旁邊就係灣仔天星碼頭同巴士總站,交通非常便利。至於,酒店大門口亦設有一個好有氣派嘅停車場。一踏入酒店大門,就聞到屬於瑞吉酒店嘅香味,而酒店嘅職員已經展示佢哋嘅親切殷勤嘅服務,同我哋邊傾計,再帶我哋去到位於2樓嘅check-in大堂。瑞吉酒店由室內設計師 Andre Fu(傅厚民)設計,設計融合經典元素與現代格調,展現本地多元文化,以「舊灣仔」為藍本,將汽油燈、商鋪鐵閘等充滿本土特色嘅文化地標與酒店嘅豪華格調互相揉合,達到以香港為家的感覺。嚟到check-in大堂,呢度樓底夠晒高,配上落地玻璃,成個lobby好光猛,加上唔同嘅擺設同梳化,已經係一個唔錯嘅打卡位置。梳化旁邊放上Louis Vuitton、Chanel等等嘅catalog,可唔可以幫我收埋佢,唔好俾A姐睇到呢!

其實早喺入住前幾日,我哋已經收到酒店嘅email,佢哋會先了解我哋嘅入住喜好,包括check-in時間,需唔需要預約餐廳,係唔係生日或周年慶祝等等,務求為你提早預備,讓你整個入住過程都有賓至如歸嘅體驗。至於,幫我哋Check-in嘅管家,對於我哋成個schedule都好了解,所以check-in非常順暢,不過,今日酒店入住率高,所以未能安排我哋late check-out喇!

客房區域
酒店2019年4月開幕,樓高25層,提供129間客房及套房,而我哋今次入住12樓嘅豪華客房,面積為538平方呎。拍完匙卡打開房門,窗簾已隨隨為你打開,房間夠晒光猛,而客房嘅景觀主要係中環廣場同灣仔一帶,因為瑞吉酒店嘅地理位置唔係海旁一帶,所以大部份房間都無維港海景,亦唔會有維港全景。踏入房間,左手邊就係大大個衣櫃,而右手邊就係浴室,再行入少少就係臥室區域。雙人床係King size,夠晒大,唱埋金絲雀都得!至於,床褥軟硬度適中,床單好柔軟,而枕頭總共有4個,兩個較軟,兩個較硬,真係好舒服,一瞓上去就會瞓得著喇!

床嘅兩邊設有燈光同窗簾控制按鈕,亦有USB插頭,夠晒方便。床頭嘅鬧鐘亦係一個藍牙播放器,連結上電話就可以聽吓歌,音色非常靚架!另一邊嘅床頭就擺放電話同memo紙,呢個放memo紙嘅皮套質感唔錯,時尚感十足。

窗嘅旁邊放有單人梳化、腳踏、小圓枱同檯燈,坐喺呢度睇吓書或者睇吓風景都唔錯。至於梳化嘅後面,仲有唔少擺設品,不妨攞住杯咖啡或茶,影番張相啦。

電視正對著床鋪,大概55吋,大小還算適中,電視嘅頻道選擇好多,世界各地主要嘅衛星頻道都有,而下面仲有一組音響,睇電影嘅時候,音效確實唔錯。

至於,A姐最鍾意就係呢個書枱區域。呢到放有大大張嘅圓枱同圓形梳化,背後仲有個屏風。圓枱夠晒大張,旁邊嘅小茶几放上電話同memo紙,仲有插頭,商務住客除咗可以做嘢,亦可以開一個小組會議,至於,我哋就可以用呢張枱嚟放滿嘢食,同A姐嘆吓香檳,享受人生。

另外,房間有兩個衣櫃,櫃內放有衣架、浴袍、雨傘、熨斗、拖鞋等等,存放嘅空間相當多。衣櫃內亦設有一個保險箱,特別有於放有一個首飾盒,戒指、項鍊、耳環等等嘅首飾就可以好好存放啦!兩個衣櫃嘅中間嘅檯面相當大,可以放行李或放便坐低著或換鞋。

最後,客房區域嘅就係mini bar喇!房間有兩支蒸餾水,TWG茶包同capsule咖啡,咖啡機仲可以打奶架,而其他嘅酒、飲品同零食就要另外收費喇!喺minibar仲有茶壺、電熱水壺同冰桶,但最驚喜係好整齊嘅一套杯,成套杯有七組,計14隻,當然每隻杯都各有用途啦。

浴室區域
浴室空間感十足,有兩個洗臉盆、馬桶、企缸同浴缸,乾濕分離。酒店提供嘅毛巾都好軟綿綿,好舒服呀!至於,個人用品十分齊全,包含牙刷、牙膏、絲瓜絡、梳、刮鬍刀、浴帽、化妝棉、漱口水等等,雖然係即棄,但用料唔差,A姐最鍾意佢把梳,佢話梳頭好似特別舒服;而我就鍾意佢個刮鬍刀,驚喜係配上一大罐刮鬍膏架!

至於呢度嘅淋浴用品用上法國品牌:Laboratoire Remède,佢個淋浴露仲有磨沙成份,沖涼好舒服!不過,我就唔太鍾意佢太過薄荷味嘅洗頭水喇!

企缸同浴缸嘅水龍頭同開關都係銅製品,好有古典嘅感覺。如果想浸泡泡浴,可以請管家幫手,或使用浴室內嘅浴鹽都得。建議你可以order定杯飲品,開住浴室嘅電視,咁就可以一邊浸浴,一邊睇電視,仲可以嘆杯飲品啦!

管家服務
至於講到瑞吉酒店嘅軟件,當然係佢哋24小時嘅管家服務啦!你可以透過短訊、電郵或直接致電聯絡管家,管家嘅服務包括專業熨燙、整理行李、上餐奉茶、推薦旅遊景點、代找裁縫訂製衣裳,甚或購買演唱會門飛等等,當然有部份係收費項目,而上餐奉茶就係其中一個免費嘅項目,選擇有茶、咖啡同朱古力,每次管家送上飲品,仲會連埋曲奇,佢嘅曲奇真係好鬆脆,好香牛油味。

夜床服務
平時住酒店,我哋都習慣按下”請勿騷擾”,但今次嚟到瑞吉酒店就要試試呢個夜床服務喇。管家大概5點左右會提供夜床服務,除咗幫我哋整理好被鋪,床嘅旁邊仲會放上朱古力同蒸餾水添。至於,浴室嘅用品、mini bar嘅茶包同咖啡都會refill。另外,管家亦會幫我哋摺好帶嚟嘅睡衣同幫我哋整理好充電線,好貼心呀。當然,佢哋亦會幫你調教好屬於晚間嘅柔和燈光,當你入房時,同朝早會有截然不同嘅感覺。

泳池及健身室
酒店嘅7樓設有泳池同健身室。泳池係室外恆溫泳池,游水前,可以經過水簾,沖一沖身體。泳池唔大,但每次上水,都會有人預備好毛巾,用毛巾包裹住你,以防你冷親。至於,池邊有一排太陽椅,喺度曬吓日光浴都唔錯。健身室嘅設備好新又齊全,連少見嘅樓梯機都有,大家記住用埋佢部體脂機,了解下自己嘅身體狀況,對正下藥做運動。無論泳池定健身室都有提供水,做運動嘅時候都要記住補充水份。

餐飲服務
每天下奏五點,喺lobby都會有軍刀開香檳嘅儀式,大家仲可以免費飲到一杯香檳,但因為疫情,避免聚集,所以今日就未有提供呢個表演喇。

另外,酒店設有多間餐廳,部份仲係米芝蓮嘅餐廳,本身我哋今日想試米芝蓮一星嘅法國餐廳:L’Envol,但因為太滿,所以改到去The Drawing Room試吓佢個lunch。其他餐廳仲有潤同The St. Regis Bar

餐飲服務 – 早餐
瑞吉酒店嘅早餐,當然就要去潤度試吓佢個鮑魚雞粥啦!但今日因為人數太多,所以酒店開放埋The Drawing Room,同樣可以試到相同嘅早餐。

早餐係semi-buffet形式,主菜有多款選擇,但我同A姐都係揀咗中式早餐:鮑魚雞粥配點心拼盤。喺等緊上餐嘅時候,可以先去到自取區領取食物。

一入到去自取區,侍應立即為你奉上碟同為你介紹一吓今日早餐嘅選擇。熱食有叉燒包、炒米粉、茄汁豆、炸饅頭、菜,仲有煙三文魚、火腿、沙律,而麵包嘅選擇都唔少,可以配上唔同嘅新鮮果醬,但最驚喜,一定係水果,我朝早就最鍾意食水果做早餐,估唔到呢度有成8款選擇,夠晒新鮮!

另一款令我哋驚喜嘅就係乳酪,有成4款口味,乳酪夠厚身,好滑好香濃。

至於鮮榨果汁有4款,其中一款仲係佢哋嘅能量飲品!

終於嚟到重頭戲嘅鮑魚雞粥!鮑魚成隻手指公咁長,好軟腍,仲有好香嘅調味;而雞肉鮮甜,粥底軟綿,可以自行添加葱花、大頭菜粒、薄脆同花生,真係無令人失望。可惜份量唔算多,如果可以無限任食就好喇!

至於點心有蝦餃、燒賣同珍珠雞,整體中規中矩,反而龍蝦春卷就最有驚喜,外皮超脆,蝦肉彈牙,好好味呀!

世界各地/香港景點門票邊度買至平?
–> 詳情請睇:https://wp.me/p8vzXP-6G <–

香港瑞吉酒店 The St. Regis Hong Kong
地址:灣仔港灣徑1號
預訂網址:www.klook.com
網址:www.marriott.com

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
Youtube:A姐M佬玩樂日記
報料或合作:keepintouch@aandmdiary.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *