JCCAC賽馬會創意藝術中心 石硤尾藝文青手作坊

香港人生活繁忙，所以好多人放假都鍾意親近大自然，舒緩壓力。其實投入藝術世界都係一個唔錯嘅選擇，透過無限創作放空心靈。雖然好多人都話香港係文化沙漠，但其實本地有唔少藝術家默默耕耘，你又知唔知呢？加上近年社會開始重視文化發展，將保育活化成藝術文化中心，好似港島代表有中環PMQ元創方，而九龍代表就有石硤尾嘅賽馬會創意藝術中心（JCCAC）。今個週末好去處就同A姐嚟到JCCAC慢活一下，參加工作坊，發揮我哋嘅創意小宇宙，有時仲有手作市集。

石硤尾工廠大廈
賽馬會創意藝術中心（JCCAC）前身係石硤尾工廠大廈，於1977年建成，至2000年起開始空置，係本港首座非標準型設計嘅工廠大廈，見證本港山寨廠林立嘅時代。大廈建築為「口」字形，方便大型車輛運送貨物。當年嘅印刷、塑膠、鞋業、五金等工業均駐足於此，為當年「Made in Hong Kong」出咗唔少力，係世界品質嘅保證。雖然石硤尾工廠大廈並唔係歷史古蹟，但就見證住香港由工業發展演變為商業金融社會嘅過程。

賽馬會創意藝術中心
石硤尾工廠大廈經香港賽馬會慈善信託基金捐款同補助，活化成賽馬會創意藝術中心，呢度樓高10層，實用面積達8,640平方米。翻新同改裝大廈工程由巴馬丹拿建築及工程有限公司負責，而MDFA建築師事務所就負責室內設計部份。中心保留石硤尾工廠大廈嘅原有特色，盡量保持七十年代工廈嘅粗樸風格，例如石屎地面、白色牆身、大型嘅貨運升降機、半開放式嘅後樓梯等等，另外，各個樓層亦有擺放古舊機器，展示昔日香港工業嘅面貌，將藝術同工業經融合，大玩藝術工業風！

由於工廈樓底同負重限制相對較高，所以創作上可以更加大膽創新，藝術中心嘅提供約100個中、小型單位租予藝術工作者同藝術團體，每一層都有唔同藝術創作者進駐，係一個屬於佢哋追夢嘅地方。作為遊客嘅我哋，除咗可以細味佢哋嘅作品，亦可以同藝術家交流同參加工作坊，可以親手DIY純銀戒子，造陶瓷品，藍染等。

中心附設3個藝廊同1個實驗劇場，呢度不定期舉辦各種展覽同表演，大家每次嚟到都會有新發現，讓你盡情投入藝術世界。

另外，中心亦有食肆同藝廊精品軒，行到攰可以試吓或者買啲小手信返屋企都得。

賽馬會創意藝術中心 Jockey Club Creative Arts Centre （JCCAC）
地址：九龍石硤尾白田街30號
網址：www.jccac.org.hk

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com