喺新荔園真係可以尋找那些年?

荔園Super Summer 2015終於喺中環海濱6月26號重開,尤其係我呢啲八十後,對荔園就更有回憶啦!咁M佬呢?原來佢未去過荔園囉……… 救命!等我帶佢去開下眼界啦!

出發前,喺櫃桶底搵到幾張發黃嘅舊相片,望住童真嘅笑臉,諗返起那些年,拖住爸爸媽媽,入荔園第一件事一定係掟階磚贏香口膠,成績好仲有旋轉木馬坐添!再望望隔離M佬,雖然佢無爸爸咁有型,但我知我找到了我下半生的最愛!哈哈!Anyway,出發前去維基百科search search,原來荔園喺1949年開業,1997年結業。嗰陣我先得嗰10歲!M佬就答一句:係咩?我心諗:唉!無荔園嘅童年真係好可憐啊!

一入到去,兩邊嘅職員充滿笑容同你講:歡迎光臨荔園!嗰刻能夠再聽到呢個名,真係毛管戙,但係剎那間嘅感動就被M佬一句「好熱!」就劃破啦!不過,一於少理,入去睇睇先,但失望大於一切……

DSC_2887

入門口之後嘅第一個景點:香蕉襲擊天奴!只要1個代幣(每個代幣價值HK$10),就獲得2隻「笨拉那」。你就可以將你嘅不快事,用盡全力扔去隻象度。不過,話時話,用HK$10蚊買2隻「笨拉那」放喺屋企隻果盤上或當係紀念品都幾抵。不過就唔好扔喇,真正嘅天奴喺將軍澳推填區泉下有知,一定好唔開心㗎!

DSC_2898

行過隔離再有健力氏紀錄大全 – 全世界最貴嘅綠箭賣!只要一個代幣,一個姐,再加上你畢生嘅運氣,你就可以獲得兩次機會贏香口膠!講真,真係好平!!!呢個回憶,真係荔園先有!

DSC_2908

DSC_2911

再隔離就係超強節奏叮叮船。雖然每架船都有個人節奏,夾埋就係一段好優秀嘅傷耳曲。不過,當見到爸爸媽媽帶住小朋友一齊玩叮叮船,好多幸福嘅笑臉,就忍唔住大叫:我好想生BB呀!排隊等緊嘅人突然鴉雀無聲,M佬都雞飛狗走,我嗰刻好想搵個窿捐呀!

DSC_2917

再睇吓隔離,就係一間Morning小學。聽講入面仲細過你間屋,呢10個代幣都係過隔離坐摩天輪好過啦!

DSC_2923

另外,呢個吹氣滑梯,價錢就唔記得喇,賣點係睇吓小朋友嘅開心笑容啦!

DSC_2928

而全場最刺激莫過於呢隻恐龍滑梯喇!價錢貴都算喇,最緊要係超刺激架!之前睇片都知啦,成個小朋友塊面撞埋去,太刺激喇!A姐唔敢玩呀!

DSC_2937

DSC_2934

一個華麗轉身之後,就見到好多隻小露寶,呢個影相位都唔錯嘅!

DSC_2940

如果之前嘅遊戲都唔啱心水,男仔實啱坐新巴城巴開心列車,不過呢個價錢可以坐來往摩星嶺及跑馬地嘅巴士幾轉喇!

DSC_2931

話時話,呢度食嘢都幾麻煩,要先買卡再去買,所以幫襯嘅人都唔多。

DSC_2930

新荔園雖然搵唔到那些年的回憶,遊樂設施亦未未必吸引到我哋,但免費入場,入去行吓都OK嘅。不過,我就提議大家玩夾波子,1個代幣就有兩次機會,基本上都會贏到隻公仔嘅!另外,怕熱嘅M佬就建議大家夜晚先入場喇,因為真係好熱喎!

DSC_2855

IMAG5317

期待之後再有新新荔園,更有那些年的感覺啦!

荔園Super Summer 2015
日期:6月26日起至9月初
時間:11:00 – 23:00
地點:中環海濱
費用:免費入場,玩遊戲則需要購買代幣,每個遊戲約需港幣10元至100元不等

(記住Like同Share畀朋友)


想緊貼A姐M佬嘅玩樂資訊,快啲Follow埋下面嘅Channel啦!

Facebook:AandMDiary
Instagram:AandMdiary
Pinterest:AandMDiary
Openrice:A姐M佬
報料或合作:aandmdiaryhk@gmail.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *