懶人包!海洋公園哈囉喂Ocean Park Halloween 2015!

我M佬可以話係海洋公園哈囉喂 (Ocean Park Halloween) 嘅die hard fan,由大學開始,年年都去,大大話話都去咗8年。今年15周年,雖然好似無10周年跳晒舞咁誇,不過今年好似有好多正嘅鬼屋,都有心之作。

海洋公園哈佬喂H15 Ocean Park Halloween 2015 - 4

今年海洋公園哈囉喂2015有8間鬼屋,其中兩間會於5時30分後變身,所以即係可以話總共有10間。其中6間係極級驚慌鬼域,另外4間係開心萬聖景點。

極級驚慌鬼域

海洋公園哈佬喂H15 Ocean Park Halloween 2015 - 2H15 (下午1時開放,位於動感天地)
H15終極驚嚇鬼屋已經早前介紹過 (全文介紹)。大家預約咗未?睇下到時見唔見到我哋啦!

海洋公園哈囉喂全日祭 Ocean Park Halloween 2015 - 逃出陰屍路

逃出陰屍路 (下午1時開放,位於海濱樂園廣場)
大家有無睇過美劇The Walking Dead先?最深刻嘅係喪屍食人嘅血淋淋畫面,諗起都心寒。呢嗰鬼屋密集式咁重現劇集多個驚慄場面,A姐一定嗌到癲。

海洋公園哈囉喂全日祭 Ocean Park Halloween 2015 - 十五年驚異回魂

十五年驚異回魂 (下午1時開放,位於急流天地)
考下大家,有無人仲記得厲鬼村嘅猛鬼電梯 (當年仲係集古村嗰個位)?13 號差館嘅鬼差館同鬼魅冥婚大殿嘅心寒婚禮?今年15周年,炒集錦,將歷年嘅「驚」典精華重現你眼前。

海洋公園哈囉喂全日祭 Ocean Park Halloween 2015 - 魔偶凶靈工坊魔偶凶靈工坊 (下午1時開放,位於極速之旅旁)
鬼屋講述年老木匠希望照顧患病妻子,將木偶加入靈魂。點知木偶被邪靈附身,變成妖怪。一諗起成場都係木偶,唔知邊個係真,就驚啦!

海洋公園哈囉喂全日祭 Ocean Park Halloween 2015 - 異種突襲大屠亡異種突襲大屠亡 (下午5時30分開放,早上為生化突變大暴走,位於登山纜車廣場)
其中一個會喺夜晚變身嘅鬼屋。以泄漏生化毒氣為主題,各位進入鬼屋嘅朋友係未受感染嘅幸存者,大家要跨越重重機關,避開怪獸,盡快離開。

海洋公園哈囉喂全日祭 Ocean Park Halloween 2015 - 血咒哥特古宅血咒哥特古宅 (下午5時30分開放早上為甜心蘿莉大宅,位置動感天地)
今年另一間會升級嘅鬼屋。夜晚大家會參加古宅探秘團,潛入歌特式大屋探險。由大舞廳走到房間,會發現屋內少女保持青春嘅凍齡奧秘!!!

開心萬聖景點

海洋公園哈囉喂全日祭 Ocean Park Halloween 2015 - 多啦A夢哈囉喂影城多啦A夢哈囉喂影城 (上午11時開放,位於威威天地)
好似上兩年咁,威威天地都有鬼屋,不過好明顯係畀小朋友玩,咁當然大人都可以去玩啦。大家可以跟多啦A夢、多啦美、大雄、靜香、胖虎同小夫一齊拍電影。

海洋公園哈囉喂全日祭 Ocean Park Halloween 2015 - 小南瓜糖果遊小南瓜糖果遊 (上午11時開放,位於自然大揭秘)
小朋友可以挑戰由南瓜妖怪打造嘅萬聖節室外迷宮,完成小遊戲仲可以贏到糖果同小禮物!另外,大家仲可以同科學怪人、吸血鬼、殭屍同木乃伊一齊selfie。

海洋公園哈囉喂全日祭 Ocean Park Halloween 2015 - 生化突變大暴走生化突變大暴走 (上午11時至下午5時30分開放晚上為異種突襲大屠亡,位於登山纜車廣場)
在日間,大家可以喺全長40米嘅充氣障礙賽道上面,跨越「攀石挑戰陣」同「無敵風火輪」,睇下邊個身手敏捷?

海洋公園哈囉喂全日祭 Ocean Park Halloween 2015 - 甜心蘿莉大宅甜心蘿莉大宅 (上午11時至下午5時30分開放晚上為血咒哥特古宅,位於動感天地)
在日間,甜心少女邀請大家參觀華麗大宅,仲安排咗連串搞鬼驚喜。大家可以查探屋內每個角落,尋找蛛絲馬跡,揭開不為人知嘅秘密,記住同佢selfie,隨時贏取ASUS ZenFone Selfie自拍手機一部!

「哈囉喂預訂通行證」
為咗減少等待時間,大家記住一早下載海洋公園Mobile App,用「哈囉喂預約通行證」免費預約部分鬼屋,包括:十五年驚異回魂、生化突變大暴走 (異種突襲大屠亡)、甜心蘿莉大宅 (血咒哥特古宅)同魔偶凶靈工坊!根據上年經驗,建議大家一起身就預約定,否則會好快爆滿。

海洋公園哈囉喂全日祭 Ocean Park Halloween 2015 - 海洋公園手機應用程式 - 哈囉喂預約通行證

票價

海洋公園門票
成人HK$345,小童(3至11歲)HK$173
買普通門票嘅朋友預咗要排隊,有可能玩唔晒啲鬼屋。

哈囉喂優越門票
成人HK$690,小童(3至11歲)HK$345
唔想排隊嘅朋友可以買至尊飛,可以優先進入鬼屋同其他精選景點。仲有HK$200園內消費優惠券同精美紀念品。

學生嘩鬼特別優惠
成人HK$276,小童(3至11歲)HK$138
待遇跟普通門票一樣,但只適合持有有效學生證嘅學生哥使用,同埋只可以用於逢星期四同五嘅場次。

智紛全年入場證會員
各金卡、銀卡 (只可於逢星期一至五及星期六中午12時前進場,公眾假期除外)同學生卡嘅會員唔洗額外買飛,仲可以用普通門票價錢 (成人HK$345,小童港幣$173) 買優越門票,不過每人每日限買1張咋。另外,每個會員可以用優惠價 (成人HK$620,小童HK$310) 買最多4張哈囉喂優越門票。

哈囉喂「屍」家極樂之旅
每團HK$8,888 (每團最多6人)
呢嗰團真係終極VIP,唔洗排隊、有極樂之旅大使安排最佳路線,玩到最多嘅景點同節目。唔洗自己上網預留「H15」鬼屋,又有大Show「極樂嘩鬼運動會」嘅優越座位、參觀猛鬼化妝間同拜會哈囉喂創作班底,真係好高級。不過以上價錢係未包海洋公園入場門票,需另外購買。而智紛全年入場證會員可享「哈囉喂『屍』家極樂之旅」85折優惠。另外,任何人士喺9月13日前成功付款預約都可享95折優惠,但唔可以同智紛全年入場證嘅優惠同時使用。
導賞語言:廣東話、英語或普通話
報名方式:喺遊覽日至少4日前致電 +852 3923 2323或電郵至gr@oceanpark.com.hk報名同付款。

海洋公園哈囉喂全日祭2015 (Ocean Park Halloween 2015)
日期:10月2-4日, 9-11日, 16-18日, 21-25日, 29-31日至11月1日(共18日)
時間:10:00 – 23:00 (平日於10:30開放)
門票:成人$345;小童(3至11歲) $173
網址:www.halloween.oceanpark.com.hk

相關文章:搶籌啦!海洋公園哈囉喂Ocean Park Halloween 2015 H15單人死後體驗!

(記住Like同Share畀朋友)


想緊貼A姐M佬嘅吃喝玩樂資訊,快啲Follow埋下面嘅Channel啦!

Facebook:A姐M佬 玩樂日記
Instagram:AandMdiary
Pinterest:AandMDiary
Openrice:A姐M佬
報料或合作:aandmdiaryhk@gmail.com

Leave a Reply

Your email address will not be published. Required fields are marked *