漫遊郵政總局 中環郵展廊

細細個嘅時候,唔知你哋有無儲嘢嘅習慣呢?喺我嘅年代,好多同學會儲得意擦膠、貼紙同閃卡,但我嘅零用錢唔多,所以要用錢買番嚟儲嘅嘢,我都無能力去投資,當時A公話,不如你儲郵票啦,人哋寄嚟嘅,又唔洗用零用錢。所以作為女孩子嘅我,當時就開始集郵喇!由於以前無電郵,所以每日都有好多人會寄信,講真我當時唔算好有興趣集郵,所以收藏品唔多,但依家睇番,真係每張郵票都係寶。無論你對集郵有無興趣,如果你路經中環,不如入嚟郵政總局同郵展廊參觀吓,除咗可以了解郵政嘅發展同歷史,亦可以細味殖民時期嘅建築,但要把握時間,因為呢個郵政總局好快就面臨清拆喇!

郵政總局
位於康樂廣場對面嘅郵政總局,原來已經係香港第四代嘅郵政總局,建於1976年,行現代主義建築風格,當時嘅建築同設備耗資4,300萬港元。但喺2020年2月,政府公佈郵政總局同天星碼頭多層停車場將會納入新一輪賣地計劃,所以好快又會有一個殖民地嘅建築成為集體回憶。

第三代嘅郵政總局,就係位於依家嘅環球大廈,因為當時興建中環地鐵站而拆卸,喺現今嘅郵政總局仲有機會見到保留低嘅木製拱形匾額。

另外,依家嘅郵政總局刻意選擇依海而建,主要係因為方便郵政署將信件透過海路運往九龍同新界。加上,當時港英政府希望已經人多車多嘅中環,可以多啲休憇空間,所以就進行城市規劃,加入連同愛丁堡廣場一帶嘅文娛及休憩設施,為市民提供休息空間。但依家政府就希望透過賣地,增加庫房收入,所以末來嘅郵政總局,將會喺九龍灣重置。

呢個第四代嘅郵政總局,因為古諮會認為無保留價值,所以賣地之後就會拆架喇。重置又可行嗎?你睇皇后碼頭!所以趁仲有機會就把握時間啦!

呢到就係郵政總局嘅郵箱喇,打卡都幾靚架!

郵展廊
想了解郵政歷史,就要嚟到位於郵政總局地下嘅郵展廊,呢度主要分為兩個區域:珍藏郵品同歷史閣。

珍藏郵品
展出同郵務相關嘅收藏品,好似有紀念郵票、特別郵票同印刷樣張等等。

歷史閣
可以了解香港郵務制度嘅演變,了解當時郵寄到中國,以至世界各地嘅轉變。仲有昔日嘅郵政工具同歷史照片等等,重現舊郵政總局大樓嘅面貌。

世界各地/香港景點門票邊度買至平?
–> 詳情請睇:https://wp.me/p8vzXP-6G <–

香港郵政總局 General Post Office
地址:香港中環康樂廣場2號
郵展廊開放時間:星期一至星期六 08:00-18:00;星期日及公眾假期 12:00-17:00
網址:www.hongkongpost.hk

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
Youtube:A姐M佬玩樂日記
報料或合作:嘅keepintouch@aandmdiary.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *