石澳一天遊 鶴咀食買玩
近期石澳鶴咀成為大熱嘅行山郊遊路線，除咗路線唔難行，風景又靚，有燈塔、海蝕洞同一望無際嘅南中國海海景之外，仲有豆香十足嘅豆腐花同石澳必買手信，今個weekend好去處就同A姐嚟個鶴咀食買玩一日遊啦！
前往方法
喺筲箕灣坐紅色小巴或9號巴士往石澳，於中途站「鶴咀」落車，步行約40分鐘到達燈塔。鶴咀屬於海岸保護區，駕駛人士必須持有禁區證先可進入，所以自駕人士可以將車泊喺筲箕灣，再轉乘公共交通工具。
提提你
1. 作為旅客嘅我哋記住要保持寧靜，唔好影響當地人嘅生活呀
2.上落波幅唔大，適合初級行山人士，整個行程係沿路往返，記住要量力以為。起步點附近有流動洗手間，中段有士多補給站，幫襯士多可以免費使用店舖內嘅洗手間
分叉路
一直沿住鶴咀道行，呢條路係石屎嘅行車路，所以大家行嘅時候要小心車輛。
行到中段有一個分叉口，記住靠右邊行，經過芽菜坑村，就會去到鶴嘴嘅海岸。當看到無線電台範圍及「私人地方，不可擅進」的路牌，繞過它，從旁邊草地前進便可。
鶴咀燈塔
又稱德忌立角燈塔 (Cape D’Aguilar Lighthouse)嘅鶴咀燈塔喺1875年4月16日落成啟用，當時造價HK$15,000，係香港第一座燈塔，亦係本港現存五座戰前燈塔之一，喺2006年被列入香港法定古蹟。
鶴咀燈塔高9.7米，充滿濃厚古典色彩。作為香港南部最重要嘅燈塔，射出嘅燈光可以遠至23海里以外嘅水域。雖然曾被1893年啟用嘅橫瀾島燈塔取代，但喺1975年改為自動化操作後，一直服務至今。
海岸保護區
係香港唯一一個海岸保護區，保護區範圍包括鶴咀半島嘅北部、東部及南部水域，亦包括狗髀洲，海域面積大約20公頃，由香港大學太古海洋科學研究所協助管理。保護區內有各種魚類、石珊瑚、軟珊瑚、柳珊瑚等海洋無脊椎動物，大家嚟到海岸保護區，記住遵守保護區嘅法律，唔好帶走任何岩石同海洋生物，亦唔好留低任何垃圾，做個有公德心嘅遊客。
鶴咀海洋研究所
今日嚟到，研究所正在進行工程，而研究所出邊就有一副魚骨標本，原來係一條1955年喺維港擱淺嘅鬚鯨，雖然經過歲月洗禮，日曬雨淋，但仍亮白如新。不過部份魚骨就遭到途人參觀時破壞，所以大家都係記住做個有公德心嘅遊客喇。
蟹洞
遠睇好似一隻蟹，而蟹身就受到海浪侵蝕，將堅硬嘅岩石鑿洞，大自然嘅威力真係好強勁呀！但大家要小心被大浪整到全身濕晒同小心岩石濕滑。
海底電纜站
可以好近咁嚟到電纜嘅底部，原來呢個係電訊盈科嘅海底電纜站，透過海底電纜將我哋連接網路。由電纜站底部望上去，鐵支構成唔同嘅幾何圖案，好靚㗎！
碉樓
建於20年代，闊約 4 米，高約 9 米，採用花崗岩築成，仲設有槍洞同天台城牆，以預防同抵抗土匪同海盜嘅入侵，保障村民嘅安全。
鶴咀村學校
1967年創辦嘅村校，現已荒廢，學校面積細小，校名由商紳鄧肇堅爵士題名。
阿蘇涼茶
喺村入邊有兩間士多，我哋就揀咗最近碉樓嘅呢間阿蘇涼茶。呢度除咗燒賣、魚蛋、公仔麵之外，仲有凍或熱嘅豆腐花。喺回程嘅時候，我哋行到身水身汗，最啱就係食返碗豆腐花，清涼一下，豆腐花唔算好滑，但豆味好香濃。
香港石澳順發園梅菜
嚟到鶴咀，有得玩，又有得食，其實仲有得買。順發園嘅梅菜係1968年成立嘅香港名牌，堅持唔用違禁農藥，無防腐劑同糖精。不過舖頭招牌比較細，好容易就會錯過咗。梅菜由婆婆創辦，主要有兩種貨品，分別係梅菜王同梅菜芯。婆婆見到A姐呢啲年青少女，細心講解，仲教佢唔同嘅梅菜菜譜添。
鶴咀 Cape D’Aguilar
地址：石澳鶴咀道
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
