禁區再培慾 沙頭角中英街一天遊

一年多前,我哋入咗沙頭角禁區探朋友,順便四圍遊走,了解一吓呢個邊境禁區(禁區培慾 沙頭角一天遊,詳情:https://wp.me/p8vzXP-2KI),但上次因為只有沙頭角禁區紙,而未有中英街禁區紙,所以未有去到中英街而有少少遺憾,事隔一年,終於搵到一位持有當地禁區證嘅居民做我哋嘅擔保人喇!而申請禁區證嘅詳細資料,可參考香港警務處網頁。

如果無人做你嘅擔保人,又想入中英街,點算?除咗睇我哋以下嘅分享,嚟一次眼睛去旅行之外。原來仲有方法,只要喺深圳中英街旁邊嘅旅行社辦理特許通行證,或者參加一天團,就可以嚟到中英街喇。(提提你:由深圳入中英街,就要由深圳離開,只有持有香港身份證及沙頭角禁區紙,方可進入香港沙頭角;相反,由香港入中英街,就要由香港離開)

景點一:中英街

曾有人形容中英街同朝鮮半島嘅三八線、德國柏林圍牆同越南賢良橋齊名為世界四大分裂線。當然,時至今日,中英街已經無咗緊張嘅氣氛啦!但中英街嘅東北面仍然由深圳市鹽田區管轄,而西南面則屬香港特區政府管轄,因為兩地實行唔同法律,所以中英街係「一街分治、一街兩制」。

而坐巴士去到沙頭角巴士總站前,就會有一個禁區閘口,警員會上車檢查乘客嘅禁區證。而落車後,行到去中英街嘅街前,又會有另一個檢查站,持有中英街禁區紙嘅人先可以通過。而我哋上次因為只有沙頭角禁區紙,所以只可以從窗口去窺探一吓條中英街。而今次,我哋終於可以名正言順入嚟中英街喇。

中英街絕對係一個「無國界」地域,因為我哋好似已經離開香港,但又未實際進入中國境內。

而中英街嘅一邊係用港幣同繁體字嘅港方,而對面就係用人民幣同簡體字嘅中方,呢個感覺實在好有趣!

上次窺探中英街明明無咩人,但今次嚟到,真係多人過旺角呀!可能因為香港嘅政治運動,令沉寂一時嘅中英街,再次車水馬龍,點解?因為要買奶粉、尿片同益力多嘅大陸同袍,仍然要買,佢哋唔敢嚟香港自由行就唯有去到中英街入貨。

中英街當然唔少得藥妝店,連卓悅都佔有一席位。但原來貢茶同麥當奴都有!而呢度除咗中英街,仲可以行到去深圳管轄嘅沙頭角社區,而呢個社區同中英街嘅繁喧形成好大對比。但放心,呢個被區係被城牆包圍,唔會行吓行吓入咗去深圳架。

景點二:中英界碑
當時用嚟分隔中方同英方嘅,就有呢啲界碑,其中喺中英街會見到唔少界碑嘅歷史遺跡。但部份嘅界碑已被歲月破壞,而我哋眼見部份界碑更成為中國遊客嘅凳,其實真係好痛心。

景點三:警世鐘
警世鐘係深圳政府為紀念香港主權移交3周年而鑄造。而根據維基嘅記載,警世鐘高1.842米,重1.55噸,象徵住1842年簽定南京條約及香港155年成為英國殖民地之歷史。鍾裙由八個梯形組成,象徵中英街上嘅八塊中英界碑。鐘腰由洋紫荊(香港市花)同勒杜鵑(深圳市花)組成,象徵深港文化。鐘身圖案「日出沙頭,月懸海角」則是沙頭角地名由來。鍾肩21朵蓮花座,象徵21世紀。而兩個龍頭則象徵住中華民族龍的精神。正面及背面分別鐫刻「中英街警世鐘」同「勿忘歷史,警鐘長鳴」幾個大字。

景點四:中英街歷史博物館
總共4層嘅中英街歷史博物館,免費參觀。展館內展出香港被割讓嘅歷史,仲有中英街嘅故事館,好似係當年嘅禁區紙,同華人嘅地位等等。

景點五、六:百年古榕樹及古井鄉情
而因為太多人影唔到相,其實仲有兩個景點,分別係百年古榕樹同古井鄉情。其實個古井真係無咩特別,我哋行過咗幾次都唔知;而百年古榕樹就喺4號界碑旁邊,犉特別在於樹根喺深圳一方,而葉枝同樹葉則喺香港一方。

特別鳴謝:Fion Choi

世界各地/香港景點門票邊度買至平?
–> 詳情請睇:https://wp.me/p8vzXP-6G <–

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:keepintouch@aandmdiary.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *