維港海濱長廊西段 中西區海濱長廊

海濱長廊對我嚟講真係一個好有意義嘅地方,當開心嘅時候,會喺海濱長廊歡愉散步;唔開心嘅時候,又會買支啤酒喺海濱長廊散心;拍拖嘅時候,海濱長廊嘅夜景又會係一個浪漫嘅地方。而位於維多利亞港最西面嘅中西區海濱長廊,分為4段:由舊碼頭活化嘅西區副食品批發市場段、有天空之鏡之稱嘅西區公眾貨物裝卸區、有全新開放,可以體驗農耕活動嘅卑路乍灣海濱長廊同好多人釣魚嘅堅尼地城城西道海旁。除咗適合大家休閒散步之外,亦有唔少打卡熱點!

西區副食品批發市場段
批發市場分為5個市場:鮮果市場、水產市場、蔬菜市場、混合副食品市場同蛋品市場,以前會透過市場外嘅碼頭入口進口食品。後來碼頭被閑置,現改建為以兒童、藝文、休憩嘅露天主題區域:一號碼頭有一個以海洋主題嘅兒童遊樂設施;二號碼頭為藝文空間,可以喺露天廣場進行康體活動;三號碼頭鋪上草地,加上木箱形擺設,適合大家野餐,而為配合主題,更加放置一整部吊重機;四號碼頭就係碼頭臨海設施,適合大家釣魚。

西區公眾貨物裝卸區
(海事處於2021年3月1日起封閉西區公眾貨物裝卸區,須出示有效安全卡/工作證方能進入)
係香港一個公眾貨物裝卸區,但因為有唔少貨櫃畫上塗鴉,加上裝飾區內嘅貨架、竹棚,又背靠維多利亞港,景色優美而成為大家影相嘅熱點。另外,當落雨之後就會形成水氹,水嘅鏡面倒照維港,形成大受歡迎嘅香港天空之鏡。

卑路乍灣海濱長廊
前身為公眾貨物起卸區嘅卑路乍灣海濱長廊,喺2020年10月19日先正式開放,係全新開放嘅維多利亞港海濱長廊之一。休憩用地有大量卡板,可以隨意拼湊組合成為平台同枱凳,並設有寵物角同即將開放嘅社區園圃。社區園圃由非政府機構「堅.農圃」營運開放式社區園圃,結合水耕、魚菜共生同有機耕種嘅都市休閒農場。

堅尼地城城西道海旁
係維多利亞港海濱長廊西面嘅盡頭,由於位處西邊,最適合就係大家嚟睇日落啦!雖然呢段海濱長廊比較細,但都設有唔少座椅,方便大家欣賞海景,亦有唔少人喺呢個位置釣魚。另外,海旁嘅盡頭後面就係繁忙嘅馬路,但亦有唔少途人鍾意去到嗰個位置影相,大家記住要注意安全。

維港海濱長廊
全程接近6公里,分為11段
1.中西區海濱長廊(西環副食品市場段)- 詳情按此
2.豐物道海濱用地(又名捐山窿公園)- 詳情按此
3.中山紀念公園
4.中山紀念公園前海濱長廊
5.中環碼頭海濱
6.香港摩天輪
7.中西區海濱長廊(中環段)
8.添馬公園
9.灣仔臨時海濱花園 – 詳情按此
10.慶典主題區(金紫荊廣場) – 詳情按此
11.灣仔北水上運動主題區海濱長廊西段 – 詳情按此

中西區海濱長廊係維港海濱長廊西邊嘅終點,所以大家如果向東行,就可以途經豐物道海濱用地(捐山窿公園)去到最遠嘅灣仔北水上運動主題區海濱長廊西段。

中西區海濱長廊 Central and Western District Promenade

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
Youtube:A姐M佬玩樂日記
報料或合作:keepintouch@aandmdiary.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *