[長洲好去處] 港版鳥居函館夜景 長洲北眺亭郊遊遊

郊遊最重要當然係打卡啦,所以就算近日天氣炎熱,但M佬話帶我去睇港版京都鳥居同函館百萬夜景,我二話不說就執好行裝,拍住拖往長洲出發!平時去長洲都係飲飲食食為主,行山都係第一次,但呢條郊遊路線都非常易行,難道唔高,適合行山初階人士。

提提你
1. 由起步點至終點,路程約個半鐘,全程為水泥路同樓梯山路,屬於初級路線,但都要記住量力以為
2. 起步點同終點都有洗手間
3. 出發前可以喺長洲市區購買補給品,記住自備足夠飲品
4. 大家記住保持環境清潔,自己垃圾自己帶走,絕對唔可以破壞大自然環境
5. 如果諗住睇夜景,沿路不設街燈,所以記住帶備電筒或頭燈

路線簡介
今次嘅路線不走回頭路,由長貴路出發,後轉入長北路,沿大斜路行上去,就會去到長洲食水配水庫旁邊公園(即港版鳥居),之後沿公園內嘅樓梯往上行,就會去到北眺亭,可以眺望長洲全景。繼續沿山路落,就會去到北角咀,再往下行就會去到隱世沙灘:東灣仔。由東灣仔嘅另一邊上樓梯,將返回長北路大斜路,之後根據路牌往北帝廟方向行,中途將會到達一個極少人知道嘅秘境,喺呢個懸崖邊嘅觀景台,以最佳角度睇到長洲全景(即港版函館夜景),之後繼續往北帝廟方向行,即可返回長洲市區。

長洲食水配水庫公園
由長貴路出發,呢條係水泥平路,中途將會經過沙灘同公園,仲可以遠眺對岸嘅大嶼山芝麻灣半島。經過桂濤花園之後,轉入長北路,沿大斜路行上去,中途所有分叉路都唔理,大概行15分鐘,就會去到長洲食水配水庫旁邊公園,喺呢個公園就會睇到港版鳥居,嗱嗱臨影幾張相打卡啦!

北眺亭
之後沿公園內嘅樓梯往上行,大概3分鐘,就會去到北眺亭,喺呢度可以眺望長洲全景。但呢度唔好逗留太耐時間,因為更靚角度嘅長洲全景,將會喺前面嘅長洲家樂徑觀景台,信我。

北角咀
之後係一段落山嘅樓梯級,將會去到長洲東北面嘅北角咀。北角咀一邊可以眺望長洲全景,天氣好嘅時候,更加可以睇到數碼港同南丫島嘅景色。

東灣仔
繼續沿山路下行,將會去到隱世沙灘:東灣仔。東灣仔嘅人流極少,想靜靜地曬太陽同游吓水都係一個唔錯選擇,但要留意呢度冇任何更衣設施同救生員,請自己衡量風險。

由東灣仔嘅另一邊上樓梯,途經竹林後返回長北路大斜路,之後根據路牌往北帝廟方向行,直至見到以下呢個小門口,沿小門口後嘅小路轉右行入去,將會去到今次嘅秘境:長洲家樂徑觀景台。

長洲家樂徑觀景台
所謂嘅觀景台,其實只係懸崖邊嘅大石頭。由窄樓梯行上大石頭頂,而大石頭頂只可以企到一個人,上落同打卡嘅時候記住小心。但所謂有危先有機,喺大石頭頂上睇到嘅長洲,真係好似日本北海道函館嘅全景!我哋由黃昏日落睇到入黑,夜晚更加似函館嘅百萬夜景,勁靚呀!

影完相之後,返回頭先入嚟嘅小門口,繼續往北帝廟方向行。不過,入黑之後,全程都無街燈,記住自備頭燈或電筒呀!最後,去到北帝廟即係返到去長洲市區,食埋野再坐船返香港啦!

世界各地/香港景點門票邊度買至平?
–> Klook:www.klook.com <–
–> Trip.com:www.trip.com <–
–> KKday:www.kkday.com <–

長洲家樂徑觀景台

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
大眾點評:A姐M佬
Trip Advisor:AandMDiary
Youtube:A姐M佬玩樂日記
報料或合作:keepintouch@aandmdiary.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *