影評 —《一念無明》 Mad World 期望愈大 失望愈大

當媒體不斷話《一念無明》好好睇,期望自然愈高,只要有少少落差,都會唔滿意。期望愈大,失望愈大。不過說句公道話,以港幣200萬嚟講,實為佳作。

故事講述阿東 (余文樂飾演) 因爸爸 (曾志偉飾演) 離家出走,一個人照顧患病嘅媽媽 (金燕玲飾演),兩個人嘅情緒變得激進。有一日,阿東為媽媽沖涼嗰陣,意外導致媽媽死亡,而自己患上躁鬱症。

故事推展乏力

故事開端,巧妙咁設定喺板間房,十分聰明,畀人一種視覺上嘅壓迫感,加強悲傷感,嗰頭開得好。不過故事中段推展就好似有啲乏力,講咗超過一半都仍然係交代緊嗰背景,有時仲要重覆 (廁所流水、血水流入渠口)。有人可能會話前面嘅交代就係後面主題嘅鋪墊,不過前面嘅鋪墊太長啦吧!不過,我自己好欣賞近尾聲板間房租客之間嘅討論,以小見大,好有張力,可惜出現得太遲。

對不起,標籤你

故事嘅一大主題就係反映社會嘅標籤問題。電影表達不論係朋友同事 (Louis婚禮,Louis),僱主 (阿東Interview被問到1年去咗邊),板間房嘅租客 (廚房間嘅討論),社會 (阿東喺超市食朱古力) ,都存有歧視,原本無伸出援手,令人反思。

「唔係所有嘢都可以外判」

雖然阿俊無出過鏡,不過我諗好多觀眾同我一樣都好憎佢。當曾志偉打畀佢嗰陣,阿俊漠不關心咁叫曾志偉送返阿東入精神病院,曾志偉入老人院,真係想打佢。有錢唔係大晒㗎!佢哋係你親人嚟㗎,你點可以咁忍心?! 曾志偉傷咗喺醫院嘅獨白係好有力,佢承認以前淨係識逃避,處理得唔好,弄巧反拙。到依家佢雖然聽到有人同佢講可以話阿東有自殺傾向,就可以送返去精神病院,不過佢今次唔選擇做仆街,選擇面對,呼應阿東截的士去城門小塘嗰句對白:「畀個機會你返轉頭」。古今對比,令曾志偉的性格好立體。

方皓玟演技出乎意料之外

A姐話乜方皓玟唔係淨係識唱歌嘅咩? (其實我好鍾意聽《你是你本身的傳奇》㗎!) 講真,雖然方皓玟 (飾演阿東未婚妻Jenny) 嘅出鏡率唔高,但絕對係成套戲嘅亮點之一,演出深刻。角色設定Jenny同阿東一齊買樓訂婚,生活似乎好美好,不過當阿東入咗精神病院,呢一切咩都無晒,仲要幫阿東還債。由一個高點跌落低點,真係好慘,絕對係攞晒同情分。到教會分享嗰一刻,Jenny已經到達臨界點,要崩潰啦!嗰種眼淚鼻涕出晒嚟嘅樣真係睇到人都心痛,唔知佢拎唔拎到金像獎女配角呢?

一念無明 Mad World
導演:黃進
演員:余文樂、曾志偉、方皓玟
片長:1小時41分
級別:IIA 級
語言:粵語 (中英文字幕)
上映:30.3.2017 (公映)

(記住Like同Share畀朋友)

想緊貼A姐M佬嘅吃喝玩樂資訊,快啲Follow埋下面嘅Channel啦!
Facebook:A姐M佬 玩樂日記
Instagram:AandMDiary
Openrice:A姐M佬
報料或合作:aandmdiaryhk@gmail.com

aandmdiary

香港生活、飲食、旅遊、電影博客 Hong Kong Foodie, Lifestyle, Food, Travel and Movie Blogger & KOL, Hong Kong Blogger 分享香港餐廳美食推介及食評,影評最新電影評論及推薦,香港周末拍拖好去處,自由行行程景點建議安排,旅行攻略懶人包等。

Leave a Reply

Your email address will not be published. Required fields are marked *