【生蠔自助餐】嚴選10間任食生蠔Buffet 連自助餐優惠及預訂詳情
酒店自助餐有唔同主題，食物選擇非常多，成為大家生日、周年慶祝嘅最佳選擇！所以每個人心中都有一份自助餐策略，你會專攻刺身？龍蝦？和牛定長腳蟹呢？但講到自助餐最受歡迎又最易回本嘅食物，又點少得生蠔呢！如果你都鍾意食生蠔，就記住bookmark以下10間生蠔自助餐推介，唔少生蠔自助餐仲有額外優惠，記住提前預約呀！
1. 生蠔自助餐：香港歷山酒店 – 歷山餐廳
地址：北角城市花園道32號歷山酒店大堂樓層
預訂及優惠：詳情按此
親身體驗：超易回本北角歷山酒店自助餐 主打海鮮中菜宮廷氣派自助餐
歷山餐廳逢星期六、日及公眾假期嘅生蠔自助餐由早上11:30開始供應，可以體驗以鮮甜嘅即開生蠔作為一日嘅開始！生蠔即叫即開， 夠晒新鮮，size雖然唔係大大隻，但非常鮮甜，生蠔夠晒飽滿，海水味濃，好creamy！生蠔自助餐除咗任食生蠔，酒店自助餐嘅選擇仲包括凍熟蝦、小龍蝦、藍青口、海螺、刺身、即切烤肉、慢煮特級肉眼牛扒、多款凍盤、熱葷及甜品等，非常豐富。
2. 生蠔自助餐：香港萬怡酒店 – MoMo Cafe
地址：西營盤干諾道西167號
預訂及優惠：詳情按此
親身體驗：香港萬怡酒店意式放題 豪華海鮮拼盤MoMo Cafe
逢星期五至日及公眾假期及假期前夕，香港萬怡酒店嘅MoMo Cafe都會供應即開生蠔，加上無限量供應各款海鮮冷盤例如鮮蝦、鮮蜆、翡翠螺、紐西蘭青口、阿根廷天使紅蝦及鱈場蟹腳等，係一個cp值高嘅生蠔自助餐之選。除咗生蠔之外，MoMo Cafe亦係香港少有會提供十二款口味嘅Mövenpick雪糕，所以大家記住留肚食雪糕呀！
3. 生蠔自助餐：帝京酒店 – 花月庭
地址：旺角太子道西193號帝京酒店2樓
預訂及優惠：詳情按此
親身體驗：紅葉蟹逅AR秋滋味自助餐 旺角帝京酒店花月庭
帝京酒店花月庭嘅生蠔自助餐每日都有兩款新鮮即開生蠔，今日就有嚟自美國同紐西蘭嘅生蠔，入口非常鮮甜，帶有淡淡嘅海水味。除咗即開生蠔，其他超易回本食物仲有開邊龍蝦、大蝦、青口、蟹腳同螺，至於日式選擇就有刺身、魚生、天婦羅、同水玄信餅等等。花月庭嘅自助餐主題轉得好快，隔一排又會有全新嘅自助餐體驗！
4. 生蠔自助餐：馬哥孛羅香港酒店 – 馬哥孛羅咖啡廳
地址：尖沙咀廣東道3號海港城馬哥孛羅香港酒店1樓
預訂及優惠：詳情按此
馬哥孛羅咖啡廳嘅生蠔自助餐，皇牌當然係佢嘅海鮮冷盤，選擇有龍蝦、翡翠螺、青口、凍蝦，當然仲有即開即食嘅生蠔啦！另外，刺身選擇就有吞拿魚、油甘魚、八爪魚、鮑片同三文魚；熱葷方面都有焗蠔、蒜蓉粉絲蒸蟶、蒸魚、羊架同肉眼等，絕對適合鍾意食海鮮嘅朋友。另外，生蠔自助餐仲可以享用無限添飲汽水及指定啤酒。
5. 生蠔自助餐：港島海逸君綽酒店 – Harbour Grand Café
地址：北角油街23號港島海逸君綽酒店3樓
預訂及優惠：詳情按此
港島海逸君綽酒店嘅生蠔自助餐以款式多取勝，除咗新鮮即開生蠔之外，仲有美國波士頓龍蝦、蟹腳、7寸長阿根廷蝦、帶子、青口、翡翠螺、刺身、香煎鴨肝、西班牙海鮮飯、北京烤鴨等！至於港島海逸君綽酒店自助餐嘅燒味同滷水亦受唔少食客推薦，包括叉燒、鵝腸、墨魚、鵝片等。
6. 生蠔自助餐：美麗華酒店 – Yamm
地址：尖沙咀彌敦道118-130號Mira Place, The Mira Hong Kong 地下大堂
預訂及優惠：詳情按此
美麗華酒店嘅Yamm非常抵食，所以經常滿座，絕對需要提前預約呀！Yamm嘅生蠔自助餐當然提供任食新鮮生蠔啦，至於其他重點食物包括波士頓龍蝦、壽司、刺身、香煎鴨肝、巴馬火腿及各式冷盤同熱葷，但最正係設有現場烹調專區，可以品賞新鮮出爐嘅美食。
7. 生蠔自助餐：美利酒店 – Garden Lounge
地址：中環紅棉路22號香港美利酒店UG層
預訂及優惠：詳情按此
美利酒店作為香港其中一間星級品牌酒店，旗下嘅自助餐同樣有星級保證！海鮮半自助餐每日都供應嚟自愛爾蘭嘅生蠔之外，呢個生蠔自助餐仲會提供虎蝦、青口、海螺等海鮮冷盤，至於海鮮半自助餐嘅主菜同樣唔會令你失望架！食到尾，餐廳就會將甜品餐車推到你嘅餐桌旁邊，讓你以靚靚嘅甜品為呢個生蠔自助餐畫上完美嘅句號。
8. 生蠔自助餐：九龍海逸君綽酒店 – The Promenade
地址：香港九龍紅磡黃埔花園德豐街20號
預訂及優惠：詳情按此
九龍海逸君綽酒店The Promenade嘅生蠔自助餐用餐時間超長，真係記住帶兩個胃嚟嘆自助餐呀！除咗任食即開生蠔、雪花蟹腳、麵包蟹等豐富海鮮，就連串燒、喇沙、刺身、天婦羅、章魚小丸子等都有，款式非常全面，九龍海逸君綽酒店The Promenade仲有一個最大賣點，就係可以望住維港海景食自助餐，非常寫意！
9. 生蠔自助餐：香港九龍東皇冠假日酒店 – 尚廚
地址：將軍澳唐德街3號香港九龍東皇冠假日酒店1樓
預訂及優惠：詳情按此
香港九龍東皇冠假日酒店尚廚嘅生蠔自助餐當然唔少得任食即開生蠔啦！自助餐仲有波士頓龍蝦、松葉蟹腳、青口、黃金螺、白蜆、凍蝦、燒紐西蘭草飼肉眼牛扒、鐵板燒羊扒、鐡板蒜片和牛粒、西班牙海鮮飯等等，口碑一向唔錯，呢個生蠔自助餐重點係價錢非常合理，係唔少生日慶祝、周年慶祝嘅最佳選擇！
10. 生蠔自助餐：8度海逸酒店餐飲優惠 – 8度餐廳
地址：香港九龍土瓜灣九龍城道199號
預訂及優惠：詳情按此
如果Budget唔多嘅話，8度海逸酒店嘅8度餐廳自助餐就係一個唔錯嘅選擇！呢個生蠔自助餐無限量供應法國、美國或愛爾蘭生蠔、鱈場蟹腳、紐西蘭青口、海蝦、海螺等海鮮冷盤、多款凍盤、熱葷及甜品等，以呢個收費嚟講，確實抵食到暈！
*以上餐廳食物供應選擇僅供參考，最終需視乎餐廳供應情況而定
相片來源：餐廳官方社交網站
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
