【香港故宮文化博物館攻略2023】必睇10個香港故宮文化博物館門票預約、交通、遊覽攻略、展廳資訊、特別展覽及購票優惠
【香港故宮文化博物館攻略】造價35億港元嘅故宮文化博物館已經開幕，鍾意四圍去玩嘅你哋，去咗參觀故宮文化博物館未呢？位於西九文化區嘅故宮文化博物館設計風格參考北京故宮建築，樓高7層分為9個展廳，展出超過1000件由北京故宮博物院、巴黎羅浮宮博物館等國際級博物館嘅歷史文物。我哋參觀完之後，總結故宮文化博物館9個展館嘅遊覽攻略，國寶級文物及購票優惠，絕對係出發前必睇香港故宮文化博物館門票預約、交通、遊覽攻略、展廳資訊、特別展覽攻略！
香港故宮文化博物館攻略 | 門票預約
香港故宮文化博物館攻略 | 故宮文化博物館分為9個展館，出發參觀前必須預約門票！
標準門票（展廳1至7）：成人HK$50、特惠門票HK$25（立即預約）；逢星期三免費入場（立即預約）
特別展覽門票（包含標準門票及展廳8至9）：成人HK$120、特惠門票HK$60（立即預約）
香港故宮文化博物館攻略1：展廳1 – 紫禁萬象 — 建築、典藏與文化傳承
香港故宮文化博物館攻略 | 紫禁城係明清兩朝二十四位皇帝嘅皇宮，位於北京中軸線嘅中心，除咗係中國最近代嘅皇室宮殿，亦係全世界現存規模最大嘅宮殿。大家認識紫禁城，好多時都係嚟自宮廷嘅電影，但其實紫禁城對於現代建築都有一定影響。喺故宮文化博物館嘅《紫禁萬象 — 建築、典藏與文化傳承》就可以認識紫禁城建於北京中軸線、設計對稱嘅原因，仲可以了解滿漢文化等典籍古物。
香港故宮文化博物館攻略2：展廳2 – 紫禁一日 — 清代宮廷生活
香港故宮文化博物館攻略 | 講到宮廷生活，一定會諗到爾虞我詐嘅後宮生活。喺《紫禁一日 — 清代宮廷生活》就可以了解明清兩代君主與后妃嘅生活，展出超過300件故宮珍藏嘅精美文物，讓我哋了解由清晨到夜晚嘅紫禁城生活，喺皇宮嘅每一件文物都非常精巧細緻，唔知當時啲妃嬪攞住支髮簪，係未好想離開令佢哋失去自由嘅紫禁城呢？
香港故宮文化博物館攻略3：展廳3 – 凝土為器 — 故宮博物院珍藏陶瓷
香港故宮文化博物館攻略 | 陶瓷除咗係當時民間嘅常用器皿，更加係皇室同貴族嘅地位象徵。明清時代出產嘅陶瓷，更加係世界知名，更加成為唔少外國貴族嘅收藏品！喺《凝土為器 — 故宮博物院珍藏陶瓷》展出150多件陶瓷藏品，全部都係明、清兩朝嘅宮廷典藏，非常珍貴。
香港故宮文化博物館攻略4：展廳4 – 龍顏鳳姿 — 清代帝后肖像
香港故宮文化博物館攻略 | 由於相機嘅發明，所以我哋對於清朝嘅中期同晚期已經可以從相片了解一切，例如慈禧太后同溥儀皇帝都影咗唔少相片。但喺相機發明之前，大家都係靠畫肖像記低每一個君主同后妃。畫肖像會將帝后嘅面容、氣質、服飾展現佢哋嘅雍容華貴、莊嚴肅穆。另外，畫肖像亦係用於祭祀祭典，喺《龍顏鳳姿 — 清代帝后肖像》就可於了解清代帝后肖像嘅創作同修復過程。
香港故宮文化博物館攻略5：展廳5 – 器惟求新 — 當代設計對話古代工藝
香港故宮文化博物館攻略 | 故宮文化博物館除咗從歷史了解中國古代文化，亦展出歷史文化嘅傳承。喺《器惟求新 — 當代設計對話古代工藝》就可以了解古代工藝設計嘅創新同執着，亦可以由古至今，解讀中國傳統工藝喺現代嘅藝術價值。
香港故宮文化博物館攻略6：展廳6 – 同賞共樂 — 穿越香港收藏史
香港故宮文化博物館攻略 | 喺國共內戰嘅時期，有唔少中國嘅歷史文物同藝術品受到破壞或流離失所。好彩當時嘅英屬香港政局穩定，有唔少有心人收藏中國藝術品，令唔少有價值嘅文物得以保留。喺《同賞共樂 — 穿越香港收藏史》就將超過100件嘅收藏品展出，讓大家可以細味每一件收藏品。
香港故宮文化博物館攻略7：展廳7 – 古今無界 — 故宮文化再詮釋
香港故宮文化博物館攻略 | 《古今無界 — 故宮文化再詮釋》係將古舊傳統嘅中華文化重新包裝，以唔同嘅視角重新詮釋和演繹故宮文化和收藏，但好抱歉，可能我孤陋寡聞，我完全唔明白，亦感受唔到，但呢度卻係深受大家歡迎嘅打卡熱點。
香港故宮文化博物館攻略8：展廳8 – 列支敦士登王室收藏名品
展期：2022.11.09 – 2023.02.20
香港故宮文化博物館攻略 | 列支敦士登係阿爾卑斯山嘅一個山區小國，風景非常壯觀，亦係歐洲嘅滑雪勝地。除此之外，列支敦士登嘅王室都有唔少珍藏嘅藝術品。想了解呢個國家，可以去到故宮文化博物館最新嘅展覽：《列支敦士登王室收藏名品》，展出超過一百件由列支敦士登王室借出嘅展品。呢啲展品都係由十七世紀以嚟王室收藏嘅私人藝術品，而最矚目嘅展品包括歐洲藝術巨匠彼得．保羅．魯本斯同安東尼．凡．戴克近四十幅作品。
香港故宮文化博物館攻略9：展廳9 – 馳騁天下 — 馬文化藝術
展期：2022.07.03 – 2023.12.31
香港故宮文化博物館攻略 | 馬喺唔同嘅國家同時代都有一定嘅地位，例如公主同王子總會坐馬車出現、喺古代戰爭時期，馬亦係非常重要嘅工具、嚟到近代，有錢人都鍾意養馬。由此可見，馬嘅文化源遠流長。故宮文化博物館以馬文化藝術為主題嘅《馳騁天下 — 馬文化藝術》，展出超過一百件嚟自北京故宮博物院同巴黎羅浮宮博物館嘅文物，包括繪畫、雕塑、陶瓷等，讓大家可以喺同一個展廳了解東西方對馬喺歷史、藝術、軍事、政治領域嘅演譯。
香港故宮文化博物館攻略10：戶外觀景台
香港故宮文化博物館攻略 | 喺故宮文化博物館除咗有餐廳，仲有唔少期間限定嘅表演項目。但講到我哋最鍾意嘅就係位於2樓同4樓嘅戶外觀景台，大家行到攰，可以喺戶外觀景台休息，欣賞維港嘅景色！
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
香港故宮文化博物館 Hong Kong Palace Museum
地址：九龍西九文化區博物館道8號
開放時間：星期一、三、四、日 10:00-18:00；星期五、六及公眾假期 10:00-20:00
門票預約：www.klook.com
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
