上班一族的下班天堂 旺角三人行燒烤專門店
返咗成日工，放工真係要搵個地方chill吓！講到chill又點少得食串燒呢？放工一於約埋班friend去到香港嘅中心，咁就夠晒方便啦！推介位於旺角嘅三人行燒烤專門店，餐廳門口已經充滿燒烤嘅孜然味，聞落已經夠晒惹味。
枝豆
燒烤即叫即燒，等緊串燒嘅時候，就叫咗份枝豆，可以一路傾住偈，一路食住等。
蒜蓉燒原條茄子
茄子絕對係每次去串燒店必食之一，茄子上面舖滿大量蒜蓉同調味料，燒完之後非常惹味！
芝士雞扒墨西哥薄餅
店員重點推介嘅芝士雞扒墨西哥薄餅，確實有驚喜。芝士比例勁多，令薄餅完全唔乾，加上juicy嘅雞扒，同香脆嘅餅底，充滿多重口感嘅衝擊。
雞肉類
雞肉串燒嘅選擇都唔少，我哋就揀咗雞全翼、雞腎串同雞胸軟骨。特別推介雞胸軟骨，比食開嘅雞軟骨更脆口彈牙，重點係少咗油膩感。
牛肉類
牛肉係絕對唔少得嘅串燒，我哋揀咗金菇肥牛卷、安格斯牛肋串、鹽燒牛舌串同牛柳串。而牛肉串燒嘅火候同時間控制好重要，餐廳燒到啱啱好，又唔會太老。我就特別中意牛舌串，肉味香濃，牛舌爽口彈牙，絕對值得encore！
豬肉類
燒到微燶嘅豬肉真係冇得輸！西班牙黑毛豬肋串同豬頸肉串都係我哋嘅推介，其中豬頸肉嘅油脂豐富，有種接近入口即溶嘅感覺。
羊肉串
有人話羊肉一定要有羊羶味先好食！加上調味粉調味，淡淡嘅羊羶味加上秘製調味，真係好有層次。
芝士豆腐
係咁凍嘅天氣食入面食流心食物，會令你頓時暖入心。而且重點係芝士豆腐做到拉絲嘅感覺，夠晒驚喜！
燒日本芝士年糕
外脆內軟嘅芝士年糕比起炸嘅芝士年糕多咗煙煙韌韌嘅感覺，當係一個小小嘅甜品，確實唔錯。
三人行燒烤專門店 Threesome barbeque restaurant
地址：旺角通菜街85號地舖
電話：+852 3689 6921
營業時間：星期一至星期日 14:00-00:00
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
