認識傳統香港文化 大坑火龍文化館

去到日本唔同城市或景點旅行，有無發現都會有極具代表性嘅吉祥物呢？如果香港各區都有吉祥物嘅話，我諗代表大坑嘅吉祥物一定係火龍喇！舞火龍嘅歷史源自19世紀末所發生嘅瘟疫，並成為流傳至今嘅香港傳統文化之一，喺2011年更列入中國國家級非物質文化遺產。如果想認識大坑嘅吉祥物，唔一定要等舞火龍嘅日子嘅，因為大坑火龍文化館正式開幕喇！

大坑火龍徑
由港鐵天后站出發，去到皇仁書院同銅鑼灣運動場中間嘅火龍徑，開始我哋舞火龍嘅文化行程啦！火龍徑前身為大坑明渠，明渠上只有一條好窄嘅桂河橋，加上明渠難聞嘅氣味，所以渠務處喺2009年開始將明渠覆蓋。建成行人徑後，為咗紀念舞火龍喺2011年更列入中國國家級非物質文化遺產，故此命名為火龍徑，所以火龍徑同舞火龍嘅路線其實係完全無關係架！

孔聖義學
大坑火龍文化館嘅前身係孔聖義學，建於1909年嘅清末民初時期，為一所收容貧窮學子嘅免費學校，宣講四書五經。但喺香港日佔時間，孔聖義學遭受嚴重破壞，直至戰後獲胡文虎以及一眾大坑居民捐助重建，喺1949年重新啓用，並租予其他辦學團體作為小學。而孔聖義學建築物更被古物諮詢委員會評為三級歷史建築，經過活化後，就成為今日嘅大坑火龍文化館。大家喺大坑火龍文化館入面，仲見到保留落嚟嘅大坑孔聖義學碑記架！

大坑火龍文化館
大坑火龍文化館樓高三層，其中1樓同2樓係主打客家菜嘅餐廳同活動場地，而文化館嘅展覽範圍就只有地下嘅位置。一入到大坑火龍文化館就由一條影片開始，喺12分鐘嘅片段，我哋可以了解有關孔聖義學嘅保育過程，以及大坑舞火龍活動介紹。唔知大家又有無睇過現場嘅舞火龍，感受呢個傳統嘅氣氛呢？

 

大坑火龍文化館 – 舞火龍
話說喺1880年嘅中秋節前夕，大坑出現咗一條大蟒蛇，呢條蛇吞食咗唔少村民嘅家畜，後嚟雖然被村民合力打死，但因為大蟒蛇屍體失蹤，所以被傳蟒蛇為龍王之子，繼而令大坑村發生瘟疫，唔少村民病亡。後嚟得到菩薩報夢，以炮竹及香火成功驅除瘟疫，令呢個傳統流行至今。一年一度嘅大坑舞火龍活動喺中秋期間舉行，火龍喺蓮花宮點睛開光之後，就會途徑大坑華倫街、布朗街、安庶庇街、浣紗街、新村街、京街、重士街、禮賢街及書館街等地方，大家就可以喺街頭欣賞舞火龍巡遊喇！

大坑火龍文化館 – 火龍紮作
每年都要全新紮作火龍，但原來火龍嘅紮作一啲都唔簡單。火龍全長67米，由龍頭、龍尾及31節龍身組成。31節嘅龍身就先以粗麻繩紮成龍骨，再用珍珠草紮成；至於龍身龍頭同龍尾由籐枝屈曲為骨架，加上手電筒嘅火龍雙眼、鐵片製成嘅鋸齒型龍牙、鋼片製成嘅龍舌、及榕樹氣根製成嘅龍鬚，再插滿長壽線香，整個龍頭足足重95磅，舞火龍過程更要由8至10位健兒接力。當然唔少得嘅仲有帶引舞龍嘅兩個插滿線香嘅珠球，所以整個舞火龍由300多位健兒組成。舞動火龍。由於按照傳統習俗，火龍將要龍歸天，象徵火龍將社區內嘅污穢送走，所以大坑火龍文化館內只有按比例尺寸嘅火龍。想睇真實嘅火龍，就要留意一年一度嘅大坑舞火龍活動喇！

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

大坑火龍文化館 Tai Hang Fire Dragon Heritage Centre
地址：香港銅鑼灣大坑書館街十二號
電話：+852 3513 7772
營業時間：星期二至星期日 10:00 – 18:00
網址：預約導賞團

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com