香港好去處 | 全港最高觀景台：天際100食買玩、期間限定活動、門票優惠及交通攻略
住喺香港咁耐，維港嘅景色真係睇極都唔嫌。至於講到欣賞維港天際線嘅最佳位置，當然係全港最高嘅觀景台：天際100！天際100香港觀景台更設有餐廳，加上唔同期間限定嘅活動，所以每次嚟到都會有唔同嘅體驗。另外，位於天際100旁邊嘅西九文化區博物館已經陸續啟用，大家可以將兩個景點同日遊玩，先去西九文化區行吓博物館，再去天際100望住靚景嘆High Tea，睇埋日落同香港夜景，自製行程豐富嘅香港一天遊。出發前記住睇埋本文嘅6大天際100食買玩攻略呀！
1. 天際100攻略：交通方法
天際100位於環球貿易廣場（ICC），旁邊就係西九文化區，所以大家可以將兩個景點計劃同一日遊玩，自製香港一天遊。而參觀完西九文化區之後，只要經全新啟用，連接M＋博物館及圓方商場嘅天橋，全程步行約6分鐘就可以去到天際100，非常方便。
港鐵：由九龍站C出口行5至10分鐘即可到達天際100
2. 6大天際100食買玩攻略：全新影相打咭佈置
喺天際100嘅票務處即埸購買或領取網上購買嘅門票之後，大家千祈唔好錯過位於2樓全新嘅影相打咭佈置呀！其中一個以多朵立體白雲，配上黃昏晚霞嘅天空做背景，呢張打卡相尤如置身喺393米高嘅天空，被雲層包圍嘅獨特效果；至於另一個打咭佈置就以農曆新年為主題，非常適合一家人嚟到天際100影番張全家福呀！
3. 6大天際100食買玩攻略：雙層電梯
影完相之後，大家將會經過充滿科技感嘅時光隧道同投射屏幕，再搭上全港最快嘅雙層電梯去天際100觀景台。由電梯門關上一刻，只係需要60秒就會直達位於100樓嘅天際100觀景台，過程非常平穩，真係眨吓眼就到，所以大家記住唔好眨眼，好好體驗呢個全港最快嘅雙層電梯喇！
4. 6大天際100食買玩攻略：360度觀景台
天際100位於全港最高嘅環球貿易廣場100樓，觀景台高393米，係全港最高嘅室內觀景台，可以360度無遮擋鳥瞰整個維多利亞港兩岸嘅景色，以至九龍半島、獅子山同大帽山嘅風景。當萬里無雲嘅時候，甚至可以遠眺荃灣、迪士尼樂園同南丫島一帶添！另外，嚟到天際100當然唔可以錯過西九文化區一帶嘅全新景觀，望住充滿中國傳統美學嘅故宮博物館大樓同現代簡約美學嘅M+博物館大樓，相映成趣，體會香港中西文化交匯嘅獨特魅力。
相信唔少人都鍾情維港兩岸嘅摩天大廈天際線同百萬夜景，但估唔到九龍半島嘅風景令我哋非常驚喜，因為呢邊嘅樓宇相對較矮，有種大地在我腳下嘅感覺，好壯觀呀！
5. 6大天際100食買玩攻略：Café 100 By The Ritz-Carlton, Hong Kong
喺天際100行到攰攰哋，最啱就係坐低食吓嘢喇。天際100設有由五星級酒店（The Ritz-Carlton, Hong Kong）主理嘅Café 100，口碑同質素都有保證，加上一望無嘅際海景同舒適嘅用餐環境，絕對係多種感官嘅享受，非常寫意。Café 100近期更推出以士多啤梨為主題嘅「粉紅春日二人下午茶」，每件甜點同鹹點都非常精美，加上點心以粉紅色為主題，我就特別鍾意卷成玫瑰花形狀嘅辣紅桑子醬迷你餅，賣相一流就當然係相機食先啦！精緻嘅下午餐點心遇上無敵海景，呢張打卡相真係點影都咁靚，絕對可以滿足大家嘅少女心。
6. 6大天際100食買玩攻略：「愛在天際」光影匯演
嘆完Café 100嘅下午茶，記住唔好趕住走呀，如果唔係你就會錯過天際100最靚嘅一刻喇！望住港島西區至大嶼山一帶嘅景色，鹹蛋黃緩緩落下，黃昏日落嘅景色真係美不勝收；夜幕低垂，取而代之係世界聞名嘅香港百萬夜景。為咗增加視聽效果，天際100更邀請由「繽紛悉尼燈光音樂節」嘅製作團隊打造，以夜空及香港特色圖案為主題嘅「愛在天際」光影匯演。「愛在天際」光影匯演期間，部份嘅天際100玻璃窗亦將化身成巨型銀幕，利用光同影將窗外嘅景色融合，每晚18:30開始，每隔半小時播放一次，絕對值回票價。
7. 6大天際100食買玩攻略：期間限定活動
天際100亦有唔少恆常嘅主題活動，亦會因應唔同節日為主題，推出期間限定活動。今年農曆新年就以「迎春接福在天際」為主題，一家人過年登上全港最高嘅天際100香港觀景台，寓意大家步步高陞、學業猛進！另外，天際100嘅佈置亦充滿濃厚嘅過年氣氛，我哋今日仲欣賞到期間限定，非常精彩嘅國粹級變臉表演添，真係啱晒一家大細喺新年期間賞美景兼行大運，寓意大家笑口常開、家和興旺。最後，大家仲可以去到天際100紀念品店外嘅櫻花樹，寫上新年祝褔或新年願望，寓意大家心想事成、新年快樂！
8. 天際100攻略：門票優惠
- 粉紅春日下午茶套票（立即預訂）
「粉紅春日二人下午茶」為Café 100 by The Ritz-Carlton, Hong Kong喺1月3日至4月3日期間嘅主題，並瞬間成為近期人氣大熱嘅下午茶，想嘆下午茶建議預先透過Sky100官網預訂。
二人用收費：星期一至星期五 HK$568起、星期六、日、公衆假期及節慶日 HK$628起（免加一服務費）
用餐時段：12:00 – 18:00
粉紅春日下午茶套票內容：天際100成人標準門票兩張、粉紅春日二人下午茶、咖啡或茶兩杯
- 香港人半價門票優惠（立即預訂）
為慶祝香港回歸25週年，天際100推出半價優惠登上全港最高嘅觀景台，感受天際100嘅高空體驗。
收費：成人HK$99、小童或長者HK$64
優惠期：2022年6月28日至2023年6月30日
- 1+1童遊天際（立即預訂）
放假同小朋友去天際100玩，除咗令小朋友體驗難忘嘅高空視野，仲可以認識香港著名地標，加上AR和VR設施，絕對啱晒佢哋放電啦！
收費：購買天際100成人門票，即可免費換領小童門票一張（適用於訪客購買標準成人門票、半價本地門票優惠或海外遊客七折門票）
優惠期：2023年1月15日至2月28日
更多門票優惠，可瀏覽以下天際100官網。
天際100香港觀景台 sky100 Hong Kong Observation Deck
地址：西九龍柯士甸道西1號環球貿易廣場的第100層
開放時間：星期一至星期日 10:00 – 20:30（最後入場時間：20:00）
門票：https://sky100.com.hk
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
