【免費燒烤場推介】10個我最喜愛的免費燒烤場，邊個燒烤場可以賞楓放風箏
【免費燒烤場推介】鍾意燒雞翼嘅你，趁住好天氣，又係時候去BBQ喇！香港嘅免費燒烤場由漁護署同康文署管理，多數設於郊野公園同沙灘邊，總數超過200個！數量咁多點樣楝？我哋挑選咗10個我最喜愛的燒燒場，由至方便、易霸爐、至隱蔽、賞紅葉，甚至好風水嘅燒烤場又係邊一個呢？
1. 免費燒烤場推介 | 我最喜愛的靚海景燒烤場：大浪灣泳灘燒烤場
香港有唔少免費燒烤場都設於沙灘邊，但講到海景嘅燒烤場，我最喜愛嘅就係大浪灣喇！喺大浪灣泳灘燒烤區可以聽住海浪聲，望住大浪灣嘅南中國海景色，再食住燒得啱啱好嘅雞翼，真係特別好味呀！不過大浪灣泳灘燒烤區只有34個燒烤爐，所以假日期間一爐難求，記住早啲去霸位呀！
相關文章：[郊遊好去處] 由大浪灣行去小西灣 必到海景大電視打卡
2. 免費燒烤場推介 | 我最喜愛的易霸爐燒烤場：蝴蝶灣公園燒烤場
免費燒烤場嘅燒烤爐採先到先得，如果想霸爐BBQ但又唔想晨早起身，就要揀啲燒烤爐數量多嘅場地。設有80個燒烤爐嘅屯門蝴蝶灣公園，係全港之最，燒烤爐數量多自然就易啲霸爐BBQ啦！
相關文章：[屯門好去處] 情侶打卡熱點 屯門海濱幻愛橋
3. 免費燒烤場推介 | 我最喜愛的放風箏燒烤場：大坑墩燒烤區
大坑墩你未必聽過，但大坳門就肯定你聽過。喺香港讀書成長嘅你，學校秋季旅行嘅目的地，當然唔少得大坳門啦！大坑墩燒烤區（大坳門）除咗燒烤區，仲有大草原可以放風箏，啱晒小朋友盡情放電啦！
相關文章：當風箏遇上風 清水灣大坳門
4. 免費燒烤場推介 | 我最喜愛的多車位燒烤場：南灣泳灘燒烤場
毗鄰淺水灣同深水灣嘅南灣泳灘，因為無直達嘅公共交通工具，所以就算夏天，沙灘都比較少泳客，就連燒烤場同咪錶位都一樣，經常都有大把位，咁就唔怕有爐無車位啦！
5. 免費燒烤場推介 | 我最喜愛的至方便燒烤場：獅子山公園燒烤場
講到最方便嘅市區免費燒烤場，當然就係位於黃大仙嘅獅子山公園燒烤場啦！獅子山公園燒烤場位於獅子山嘅山腳，由廣播道或黃大仙天馬苑出發，大概行10分鐘就會到達，就算拎住好多燒烤食物同用具，都唔怕行餐懵啦！
6. 免費燒烤場推介 | 我最喜愛的賞紅葉燒烤場：大棠燒烤區
如果撞啱每年12月至翌年1月嘅紅葉季，喺元朗嘅大棠燒烤區，燒完嘢食，仲可以順便睇埋紅葉添！不過，紅葉季期間將會封路，駕駛人士可能要轉公共交通工具去大棠燒烤區喇！
相關文章：【大棠紅葉情報】全港最大紅葉林 元朗大棠楓香林
7. 免費燒烤場推介 | 我最喜愛的少人去燒烤場：樂信徑燒烤場
少人去嘅免費燒烤場都唔一定山旮旯，由火炭港鐵站轉巴士/小巴，再行10分鐘左右就到達樂信徑燒烤場。燒烤場被火炭嘅豪宅區包圍，雖然只有六個燒烤爐，但因為夠隱世，所以真係唔會有咩人去，絕對係最少人去嘅免費燒烤場。
相關文章：沙田絕密秘景 輕遊獅子亭
8. 免費燒烤場推介 | 我最喜愛的至隱蔽燒烤場：塘福引水道燒烤區
位於大嶼山嘅塘福真係非常隔涉，所以被我哋評為我最喜愛的至隱蔽燒烤場！去塘福引水道燒烤區真係要做足準備，因為附近無超級市場或士多補給，所以建議由梅窩或東涌出發嘅時候，就要買齊所需要嘅用品喇！另外，想輕鬆啲嘅話，不妨喺塘福租間度假屋（塘福度假屋推介），玩番兩日一夜都唔錯。
9. 免費燒烤場推介 | 我最喜愛的輕井澤燒烤場：流水響水塘燒烤區
鶴藪燒烤區係其中一個人氣熱門嘅免費燒烤場，經常一爐難求。而位於鶴藪燒烤區旁邊嘅流水響水塘燒烤區，因為交通無咁方便，所以相對少人。但其實流水響水塘被松樹同白千層包圍，可以一邊燒烤，一邊享受有港版輕井澤之稱嘅大自然風景。
相關文章：流水響水塘賞落羽松天空之鏡 零難度粉嶺行山郊遊打卡路線
10. 免費燒烤場推介 | 我最喜愛的好風水燒烤場：大尾督燒烤區
講到燒嘢食，又點可以唔提大尾督呢！踩單車入大尾督，順便燒埋嘢食，係唔少人嘅假日好節目。大尾督多達40個燒烤爐，係全港第二多燒烤爐嘅免費燒烤場，加上旁邊設有大量車位，非常方便。不得不提，大尾督燒烤區背靠八仙嶺，面向吐露港，背山面海，絕對係最好風水嘅燒烤場啦！
其他免費燒烤場：漁護署郊野公園燒烤場、康文署燒烤場
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
