【大埔嘉道理農場2023】郊遊探索自然生態一日遊 大埔嘉道理農場暨植物園
【大埔嘉道理農場2023】Weekend放假我哋就鍾意出身汗，同陽光及大自然玩遊戲，所以我哋嚟到大埔嘅嘉道理農場暨植物園。園內分為唔同景區，亦有唔同動植物保育活動同展覽，絕對係一個適合親子探索自然生態嘅好地方。加上園內一年四季都有唔同品種嘅花卉盛開，打卡check-in，玩足一日都得㗎！
大埔嘉道理農場2023 | 前往方法
1. 自駕遊：嘉道理農場僅提供幾個泊車位，可以經官網預約即日起30天內嘅車位預約服務，名額有限，先到先得
2. 巴士：乘搭九巴64K巴士，於嘉道理農場暨植物園站落車
大埔嘉道理農場2023 | 提提你
1. 園內設有洗手間、小食亭及飲水機，供大家補給之用
2. 大家記住保持環境清潔，絕對唔可以破壞大自然環境
大埔嘉道理農場2023 | 嘉道理農場暨植物園
大埔嘉道理農場2023 | 整個園區佔地148公頃，由羅蘭士勳爵、賀理士爵士、胡禮先生及胡挺生先生於1951年創立「嘉道理農業輔助會」，亦即係嘉道理農場暨植物園嘅前身。嘉道理農場除咗推廣保育之外，亦提供全港唯一野生動物拯救服務，治療受傷嘅野生動物，康復後嘅動物會送歸原本嘅棲息地。
大埔嘉道理農場2023 | 觀光巴士
大埔嘉道理農場2023 | 園區分為山上同山下兩大區域，當然你可以徒步上落山，但亦可以乘坐園區觀光巴士，直接前往山上景點。不過，巴士班次不多，而且座位有限，記得預留時間前往巴士站等車喇！
大埔嘉道理農場2023 | 廣場
大埔嘉道理農場2023 | 入到嚟嘉道理農場暨植物園嘅第一站就會嚟到廣場，喺廣場除咗可以野餐之外，亦可以了解有關自然環保同永續生活嘅展版。除此之外，亦可以同創辦人賀理士爵士嘅雕像影番張相。而位於廣場嘅旁邊亦有一個素食亭，大家可以喺度買啲嘢食吓或作補給。
大埔嘉道理農場2023 | 映日園動物展覽館
大埔嘉道理農場2023 | 喺素食亭旁邊，就有呢個映日園動物展覽館，呢度絕大部份係收留自非法捕獵同非法販賣嘅動物。其實市場上出售嘅每一隻寵物，就算合法，但背後嘅故事都唔簡單，所以盡量唔好購買動物，想養寵物嘅不妨考慮收養，但記住要做一個有責任心嘅主人。
大埔嘉道理農場2023 | 翟克誠野生動物護理中心
大埔嘉道理農場2023 | 喺呢個護理中心內，居住咗香港常見嘅野生動物，包括赤麂同短吻果蝠等。因為赤麂被拯救時係孤兒，唔適合放歸野外，所以佢就定居喺呢個模仿野外環境嘅護理中心。
大埔嘉道理農場2023 | 猛禽之家
大埔嘉道理農場2023 | 香港係候鳥遷徙嘅一個中途站，但有唔少雀鳥嚟到香港之後，會被高樓大廈嘅鏡面引致迷失方向，部份更會誤撞大廈玻璃受傷；亦有一部分禽鳥被非法飼養作寵物，再遭遺棄。所以經護理後嘅猛禽喺放歸野外前會住喺猛禽之家，喺呢度練習飛行，直至確定有能力喺野外生活，就會放歸野外。而發現不適合放歸野外嘅雀鳥就留喺呢度永久居住。
大埔嘉道理農場2023 | 鸚鵡護理中心
大埔嘉道理農場2023 | 鸚鵡係最多人飼養嘅雀鳥，但亦係最多人遺棄或放生嘅雀鳥之一。喺鸚鵡護理中心主要接收遭遺棄同流浪嘅鸚鵡，呢庿即鸚鵡品種包括：藍黃金剛鸚鵡、非洲灰鸚鵡、橙翅鸚哥同小葵花鳳頭鸚鵡等。
大埔嘉道理農場2023 | 農場博物館
大埔嘉道理農場2023 | 博物館原本係豬舍，喺2006年嘅時候加設展覽回顧嘉道理農場暨植物園嘅歷史。喺博物館內除咗可以睇到農場嘅歷史，呢度仲有小賣店提供新鮮農場產品、環保產品、書籍和雜誌，更設有經淨化嘅溪水飲水機。
大埔嘉道理農場2023 | 森林果園
大埔嘉道理農場2023 | 嘉道理農場暨植物園除咗收留唔少動物之外，亦培育唔少植物。其中森林果園就採用農林耕作方法，可以減少運用化學肥料同避免害蟲侵襲。
大埔嘉道理農場2023 | 植物與我溫室
大埔嘉道理農場2023 | 其實植物喺我哋嘅生活不可或缺，除咗可以係我哋嘅食物、調味品之外，更加可以係裝飾品，令我哋嘅生活多姿多彩，加添色彩同香氣；更重要係透過植物嘅光合作用，吸收二氧化碳並補充氧氣。所以入到嚟呢個溫室，見到色彩繽紛嘅花卉，令我哋嘅心情同生活節奏都大大放緩。
大埔嘉道理農場2023 | 白理桃蘭花保育園
大埔嘉道理農場2023 | 離開山下嘅景點，之後我哋就嚟到山上嘅景區。蘭花保育園展示各種各樣嘅蘭花，包括本地物種同嚟自印度緬甸地區嘅蘭花。
大埔嘉道理農場2023 | 蕨類植物小徑
大埔嘉道理農場2023 | 喺呢條短短嘅小徑就可以觀賞到130多種蕨類植物。
大埔嘉道理農場2023 | 蝴蝶園
大埔嘉道理農場2023 | 香港有超過230種蝴蝶同2000幾種飛蛾，而喺嘉道理農場暨植物園就記錄咗171種蝴蝶同1300種飛蛾喇！嘉道理農場之所以吸引咁多蝴蝶主要係因為園內種植咗唔同嘅植物，為蝴蝶同幼蟲提供花蜜、葉子作為食物。
大埔嘉道理農場2023 | 嘉道理兄弟紀念亭
大埔嘉道理農場2023 | 紀念創辦人賀理士爵士同羅蘭士勳爵。紀念亭以雙頂設計，象徵兩人深厚嘅手足情誼， 而喺紀念亭嘅頂部就出現咗象徵猶太人嘅六角星。喺呢個接近嘉道理農場暨植物園最高點嘅位置，可以俯瞰整個農場和新界西北部。
大埔嘉道理農場2023 | 世界主要城市指示牌
大埔嘉道理農場2023 | 70年代嘅時候，可能航空同船運嘅發展未係依家咁方便，所以呢類型嘅指示牌十分流行。呢個城市指示牌除咗見到唔少大城市嘅方向同距離之外，連灣仔都有被標示，可見當時嘅灣仔已經發展唔錯。
大埔嘉道理農場2023 | 四柱擎天
大埔嘉道理農場2023 | 呢四條柱本身係前香港中央郵政總局嘅門柱，當年郵政總局拆卸後，由梁潤昌先生喺拆卸工程公司攞番四支大圓柱，以逃過堆填厄運，並送贈予賀理士爵士以證雙方友誼。
大埔嘉道理農場2023 | 觀音山
大埔嘉道理農場2023 | 海拔550米嘅觀音山頂峰，可以俯瞰新界北同大埔嘅美景。山頂的大門嘅龍鳳柱象徵繁華、長壽同和諧。以前嘅農夫會特意登山拜奉觀音，祈求平安、子嗣同豐收。
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
嘉道理農場暨植物園 Kadoorie Farm and Botanic Garden
開放時間：星期一至日 09:30-17:00
入場費：12至59歲 HK$30、5至11歲 HK$15、5歲以下、60歲或以上長者及合資格殘疾人士免費
網址：www.kfbg.org
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
