[香港Staycation] 仲玩Camping? 識玩一定去長洲西園歎Glamping

長洲係最受旅客同香港人歡迎嘅離島之一，而身為80後嘅我哋，一定有試過同成班同學仔入長洲租間渡假屋玩番晚！而呢一晚你仲唔記得呀？諗番起以前，呃住A爸A媽話去同學屋企溫書，其實就係同成班姊妹去長洲過夜；又有一晚，係同初戀男朋友去長洲 (千祈唔可以俾M佬知㗎)……而今個假期就約咗班舊同學 (真係舊同學)，一齊「如何回到當時」，依家當然唔會再住出晒名嘅渡假屋啦，識玩嘅我哋，又想尋求酒店服務又想有露營嘅冒險感覺，今次就去到長洲西園玩Glamping啦！

預訂網址：hk.trip.com

其實所謂Glamping就係唔洗自己帶露營用品，但又有露營嘅感覺，好似如果要我哋呢班弱質纖纖嘅女仔們左孭一個睡袋，右孭一個tent，仲有一袋二袋物資，我諗佢哋真係寧願留喺屋企湊仔囉！

而由中環5號碼頭出發，坐船嚟到長洲之後，向張保仔洞方向出發，大概行15至20分鐘或由長洲公眾碼頭坐街渡，大概5分鐘就到西灣碼頭，再行3分鐘就到西園大門口！而為咗方便往來西園至長洲市區嘅吃喝玩樂，建議喺租架單車踩去西園啦。

西園面積有成十一英畝，除咗唔同嘅營區，仲有好多戸外活動同工作坊俾大家參加，咁就可以輕輕鬆鬆同大自然享受一次生態丶教育同休閒嘅長洲假期啦。

喺長洲西園分為四大營區：印第安營、南非營、觀星圓拱屋、蒙古包合共40個營，各具特色，視乎你嘅個人喜好同人數而定啦。西園會為住客提供沐浴用品、毛巾等等個人用品，而所有營內都備有燈、牀同被鋪，而部份營內仲有獨立洗手間、水冷空調同風扇等設備，夠晒貼心，好似我哋呢班港女都無問題啦！

觀星圓拱屋營區
觀星圓拱屋營區喺長洲西園最受歡迎嘅營區，朝早可以好休閒咁欣賞海景、黃昏仲睇到日落美景，而夜晚仲可以睇到星海架，下次要帶M佬嚟同我二人世界先得。

蒙古包營區
未去過蒙古又想感受吓大漠風情嘅就必揀蒙古包營區，而蒙古包營區係四大營區，我A姐覺得係最適合初階玩Glamping嘅朋友，因為係最有住酒店嘅感覺。

印第安營區
想去影相呃like就一定要去印第安營區喇，除咗外觀之外，連每個圖案都係細心繪畫，好特色。亦係四個營區中，價錢最平嘅一個，適合高階玩Glamping嘅朋友。

南非營區
我哋今次嘅選擇就係南非營區，每營仲有陽台、野餐枱，啱晒我哋一大班朋友一齊去玩啦。

雖然部份營地未有提供獨立洗手間，但呢度嘅洗手間同沖涼地方都好乾淨㗎！

講完住嘅環境，西園仲提供唔同嘅活動俾大家參加，每項活動都有專業教練同導師講解同照顧，夠晒安全㗎。

其中包括越野平衡車歷奇、草地障礙弓防箭、森林弓防箭、泡泡足球、沿繩垂降體驗、馬騮上樹、手工藝工作坊、野外製作叫化雞、幼童滑步車、非洲擊鼓互動工作坊、營火會、脆脆雞蛋仔DIY、遙控機動船及風帆船等。

夏日限定：40米高速滑水梯

夏天又點可以唔玩水呢？嚟到西園就一定要玩呢條全新嘅滑水梯喇！滑水梯高40米，坐住個水泡高速滑行，真係好好玩呀！

樹頂走廊．空中樹林歷奇

樹頂走廊係長洲西園嘅招牌項目，參加者要喺過程經過唔同難度嘅繩網同獨木橋，最後再玩埋飛索，絕對係考擔量同智慧嘅遊戲。

羊圈餵飼體驗

想同小動物玩旅戲，可以買飼料餵羊，啱晒一家大細，齊齊親近大自然！

另外，園區亦提供唔同嘅桌上遊戲，好動好靜嘅朋友都唔怕悶啦。

而喺西園仲有個士多，想補給日用品或飲品都得，咁就唔洗特登出番長洲市區。而西園亦提供自助燒烤餐，亦可以自備食物，入嚟租燒烤爐㗎。而預訂南非加大營、觀星圓拱屋同蒙古包，仲會贈送DIY自助早餐，享受Glamping嘅樂趣。

但大家要留意喇，營地範圍並無提供Wifi，而訊號接收都比較差，所以……M佬完全搵我唔到，佢差啲要入長洲尋親呀！

世界各地／香港景點門票邊度買至平？
–> 詳情請睇：https://wp.me/p8vzXP-6G <–

西園 Sai Yuen
地址：香港長洲西灣DD CC Lot 12
電話：+852 2666 9556
預訂網址：hk.trip.com

（記住Like同Share畀朋友）