週末郊遊苦路之旅 大嶼山聖母神樂院

今個假期同A姐嚟個港版跳島遊（Island Hopping），玩完坪洲就坐街渡去埋愉景灣啦！街渡設有一個中途站，仲係一個我哋熟悉嘅地方：熙篤會聖母神樂院。話說上次去梅窩都已經想行山去埋，但因為時間關係無奈放棄，難得今次街渡途經聖母神樂院，絕對係今個旅程嘅bonus！

提提你
1. 聖母神樂院係一個寧修嘅地方，遊覽時保持聲浪，唔好騷擾居民
2. 大家記住保持環境清潔，自己垃圾自己帶走，絕對唔可以破壞大自然環境
3. 尊重自己，尊重宗教
4. 聖母神樂院嘅行山路線難度唔高，適合行山初哥同一家大細，但都要量力以為

前往方法
1. 由梅窩經東灣頭以山路前往愉景灣方向，聖母神樂院位於整段山徑之中間位置（由梅窩出發，大部份都係往上樓梯級，但難過不高）
2. 由愉景灣經稔樹灣以山徑前往梅窩方向，聖母神樂院位於整段山徑之中間位置（由愉景灣出發，大部份都係平路為主）
3. 喺坪洲坐往愉景灣街渡，部份班次停聖母神樂院碼頭（船期表）

聖母神樂院碼頭
聖母神樂院係梅窩至愉景灣行山路線嘅中途站，行晒全程約兩個鐘頭，如果一心只係想去聖母神樂院，建議就喺坪洲坐街渡過海喇！落咗街渡之後，由聖母神樂院碼頭行20分鐘嘅石屎大斜路往教堂出發，路線係上斜但唔算太難行，而且仲會有意外驚喜！因為呢條大斜路亦係港版苦路十四站起點；相反，如果你係行梅窩至愉景灣郊遊路線就只會經過某幾個苦路站，所以想行晒14個站，最順路就係坐街渡喇！

苦路
聖母神樂院碼頭係苦路十四站嘅起點，由第一站「耶穌被判死刑」、第二站「耶穌背負十架」、第三站「耶穌跌倒」、第四站「耶穌遇見母親」、第五站「西門幫助耶穌背十架」、第六站「慈婦為耶穌抹面」、第七站「耶穌第二次跌倒」、第八站「耶穌向婦女說話」、第九站「耶穌三次跌倒」、第十站「耶穌被剝去衣服」、第十一站「耶穌被釘十字架」、第十二站「耶穌死在十字架上」、第十三站「耶穌屍體從十字架卸下」及第十四站「耶穌被埋葬」。大家行嘅時候可以邊行邊默想耶穌基督受難嘅過程，而神樂院喺每年嘅復活節前都會舉辨活動紀念耶穌受難。

熙篤會聖母神樂院
於1951年落成，係香港唯一中世紀建築模式嘅天主教隱修院。神樂院以石塊建成，具有歐洲鄉郊中古時代建築風格，而神樂院養咗六隻牛，亦有耕地同水塘，可以自給自足。

小花園
聖母亭採用中式亭台樓閣設計，充分展現中西文化交融。

聖堂
聖堂以岩石建成，簡樸莊嚴。

宿舍
宿舍係私人地方，而聖母神樂院亦有避靜留宿活動，可以參加。

十字牌牛奶
神樂院初期設有牛房，生產牛奶自給自足。至六十年代後期，牛房最高峰多達80隻年，可以售賣至市區指定商戶。至七十年代後期，神樂院建立十字牌牛奶，每日產量3000樽，亦有生產雞蛋同出產餅乾。直到八十年代，因牛奶需求越嚟越大，所以牛奶廠搬搬到元朗，神樂院就由生產基地變成十字牌董事。

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

熙篤會聖母神樂院 Our Lady of Joy Abbey
地址： 香港大嶼山大水坑

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com