[大嶼山好去處] 全港最長芝麻灣郊遊徑 邊行邊打卡兼遊澄碧邨

之前喺網絡有人分享，港女女朋友約男朋友去行山打卡，男朋友滿心歡喜，但結果港女喺港鐵站會合男朋友後就坐的士直達山頂，半個鐘打完卡就坐的士回程。好彩A姐每次都堅持自己行，佢話好enjoy行到好攰但見到目的地嘅成功感。見佢嘅行山郊遊經驗多咗，今次就挑戰自己，嚟到全港最長嘅芝麻灣郊遊徑，邊行邊打卡兼行埋澄碧邨，比預期輕輕鬆鬆就完成今次行程。

提提你
1. 芝麻灣郊遊徑全長18.5公里，大部份人選擇由十塱營地出發，環繞一圈兼上埋老人山，全程超過8小時。山徑大部分為碎石路、沙地路及草地路，全程上落波度唔算大，不過，由於步行時間長，部份路段毫無遮擋，極需體力，屬於中級路線，字母粉記住量力以為
2. 除咗喺老圍村巴士站設有洗手間之外，沿途將不設任何洗手間及補給站，記住自備足夠飲品及乾糧
3.大家記住保持環境清潔，自己垃圾自己帶走，絕對唔可以破壞大自然環境
4.沿途勁多牛屎，大家行嘅時候要小心踩金啊

+

前往方法
1.由東涌或梅窩乘坐新大嶼山巴士至貝澳老圍村巴士站起步
2.喺梅窩、長洲或坪洲乘坐新渡輪橫水渡至芝麻灣碼頭作起點，不過要留意嘅係，途經芝麻灣嘅班次相對較少

路線簡介
由於A姐嘅郊遊經驗唔多，所以我哋選擇咗其中一段嚟行，由貝澳出發，玩埋澄碧邨，去到芝麻灣碼頭坐船離開，都有唔少影相打卡位，全程5個半鐘。

梅窩 › 老圍村巴士站 › 貝澳沙灘 › 天后廟 › 望東灣 › 澄碧邨 › 龍尾 › 十塱水塘 › 芝麻灣懲教所 › 芝麻灣碼頭 › 梅窩

老圍村巴士站
由梅窩出發，坐新大嶼山巴士去到老圍村巴士站，巴士有分段收費，上車前記住同司機講聲再拍八達通。老圍村巴士站對面有全程唯一嘅公廁同餐廳，大家記住做足補給準備再出發。

貝澳沙灘
貝澳沙灘水清沙幼，午後波平如鏡，係其中一個被譽為香港天空之鏡嘅地方。另外，芝麻灣最高嘅山係海拔303米嘅老人山，雖然今日並無計劃登山，但喺貝澳已可遠觀呢座芝麻灣半島嘅高峰。

天后廟
天后廟超過200年歷史，廟內除咗供奉天后娘娘，仲有金花娘娘同財帛星君，而最有欣賞價值嘅係嘉興四年所建嘅洪鐘。

望東灣
喺天后廟對面就有一條小路前往望東灣，呢條小路上落波幅唔算大，相對輕鬆易行。嚟到望東灣呢度有一條小村同碼頭，仲有一個隱世沙灘，如果唔想行山嘅，喺呢度曬吓太陽都係一個唔錯選擇。至於呢個望住西面嘅海灣，點解唔係叫望西灣呢？全因為西方有極樂世界嘅意思，所以就叫做望東灣。

澄碧邨
澄碧邨係全港最平又望海嘅「豪宅」，所以特登同A姐去睇吓樓啦！由郊遊徑嘅分叉路前往澄碧邨，大家要特別留意山路係碎石路，落山嘅時候非常跣，建議攜帶行山拐杖！

澄碧邨1979年落成入伙，係70年代由和記黃埔策劃，以渡假村模式興建嘅一個私人屋苑，設20幢4層高，共220個單位嘅臨海別墅。雖然坐擁一望無際嘅海景同沙灘，但因為交通極度唔方便，加上屋苑並無餐廳、士多、超市同街市，甚至汽水機都無，連屋苑唯一嘅私人會所都已經結業，所以樓價一直偏低。

但喺度住嘅邨民，可以乘坐專用嘅渡輪往返長洲，雖然班次疏落，但勝在免費（其實係管理費包埋）。由於交通唔算方便，所以澄碧邨非常寧靜，就連呢個水清沙幼嘅沙灘，都無外來遊客，可以輕輕鬆鬆影相打卡。

龍尾
所謂龍尾其實只係一個check point同芝麻灣郊遊徑交匯站，因為呢度有一條三叉岔道，可以前往下徑、拾塱水塘或老人山。另外，龍尾名副其名，真係有個龍尾塑像，影相打卡再出發啦。

十塱水塘
建於1955年嘅十塱水塘曾為長洲、坪洲同喜靈洲居民供水，直至1970年代改為灌溉水塘至今。主壩長約91米，而水塘因為偏遠，污染相對較少，所以水源乾淨。加上人流極少，慢慢影相打卡都無問題。

芝麻灣懲教所
上次大嶼山自駕遊曾經嚟過，今次就用行山嘅方法再次嚟度呢個荒廢咗嘅懲教所，反而會經過上次無行過嘅地方。因為懲教所位置偏遠，所以除咗員工宿舍，今次仲途經員工娛樂嘅地方，好似呢個員工酒吧，仲有一陣荒廢咗嘅味道。

芝麻灣懲教所喺1956年啟用，後嚟因為香港成為第一收容港，所以芝麻灣監獄改建成越南難民營。隨住船民被遣返，難民營改建為專收容女性嘅芝麻灣懲教所同芝新懲教所。後嚟由於超收嚴重，加上設施老舊，署方決定將兩間懲教所嘅女性犯人調遷到羅湖懲教所，並於2010年關閉。雖然早年曾有計劃重建，不過喺芝麻灣半島曾發現考古遺址，所以重建計劃暫時停止至今。
詳情：時間停頓無人之境 大嶼山芝麻灣懲教所

芝麻灣碼頭
喺芝麻灣碼頭有橫水渡前往梅窩、長洲或坪洲，不過要留意嘅係，途經芝麻灣嘅班次相對較少。如果遇唔啱時間，可以call藍色的士返去梅窩，車費約$100。又或者繼續行芝麻灣郊遊徑，往十塱營地出發。

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

芝麻灣郊遊徑 Chi Ma Wan Country Trail

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com