山頂大富翁夢想世界 週末拍拖打卡好去處

A姐成日都話求包養，我就包養唔起佢架喇，所以今個weekend，一於介紹個鑽石王老五俾佢識啦！呢個人住喺山頂，有錢到人人都識，佢就係大富翁喇！位於山頂廣場嘅大富翁夢想世界 Monopoly Dreams Hong Kong 係全球第一個大富翁主題館，裡面有唔同嘅打卡位同娛樂設施，無論一家大細定拍拖去玩都啱晒。今日我哋就去拜訪一吓大富翁先生，參觀一吓佢嘅大宅啦！

大富翁主題館位於山頂廣場 The Peak Galleria，大家除咗可以自駕遊，公共交通方面都有以下選擇：
1. 山頂纜車：於中環花園道纜車站乘山頂纜車
2. 巴士：於中環五號碼頭或港鐵香港站D出口的中環交易廣場巴士總站，乘搭新巴15號巴士
3. 小巴：於港鐵香港站E出口的公共運輸交匯處，乘搭1號綠色小巴。

經過翻新嘅山頂廣場，多咗好多舖頭，而大富翁夢想世界主題館就位於山頂廣場3樓。

首先，喺進入大富翁夢想世界之前，由職員帶我哋搭觀光𨋢，呢部觀光𨋢睇到大富翁屋企嘅唔同樓層，之後就會去到大富翁嘅大宅喇。

喺大宅嘅第一間房，就係佢嘅書房，仲見到大富翁先生出嚟迎接我哋！原來大富翁未發達之前，佢係一個汽車維修員，而佢最好嘅朋友，就係Scottie Dog。聽職員講，呢隻Scottie Dog，就係平時我哋玩大富翁桌上遊戲時嗰隻狗仔嘅棋子喇。

之後，我哋去到佢嘅衣帽間，裡面收藏咗唔同年代同唔同地區嘅大富翁桌上遊戲，仲有大富翁嘅各種小知識，想求包養嘅A姐就一定要惡補一吓啦！而最大亮點就係，佢架銀色跑車！呢架跑車，仲獲得世界紀錄，係全球最大嘅大富翁棋子！

參觀完佢嘅大宅，嚟到Pass Go隧道。透過霓虹燈牌，可以從光影玩到好多打卡靚相！

離開Pass Go隧道，就會去到大富翁市鎮喇！喺市鎮內將會親歷奇景，感受桌上遊戲嘅真實設定。好似有銀行、地契、水務局、電燈公司、機會等，真係可以瘋狂影相呀。

而嚟到市鎮嘅第一件事，就一定要先去火車站，透過4D影院同大富翁經歷一段刺激旅程。旅程俾想像中驚喜，我就唔劇透太多，但呢個影院絕對係必玩項目。

另一個大家發夢都想玩嘅，當然係搶天跌落嚟嘅錢啦！嚟到大富翁銀行，只要係限時之內，用手去搶飛緊嘅錢，記住出盡力咁去搶，因為下一個富翁可能就係你喇！遊戲內，最高嘅幣值係$100大富翁紙幣，之後係$50、$20同$10。我同A姐夾埋都搶咗$500大富翁幣，除咗可以留念，原來仲可以兌換成港幣（但你唔駛帶你屋企啲大富翁錢入去喇）！點兌？陣間話你知！

而另一個手信位就係去攞一張屬於你嘅地契，輸入自己個名，系統就會隨機咁派一個地契俾你，我哋就得到咗長洲，所以你哋下次入長洲食大魚蛋，記住俾過路費我哋喇！

除此之外，又點少得去到監獄同水務局打卡呢？

市鎮內仲有唔少小遊戲同場景俾你慢慢玩。當然要記得同大富翁同Scottie Dog影番張相啦。

市鎮內另外一個影相位，就係金庫！影相嘅時候同A姐講：雖然我依家未有金庫，亦唔係大富翁，但我會將我畢生嘅運氣都俾晒你，一直都會喺你身邊，保護你，我哋一定會有一個幸福嘅將來。（A姐即刻冧晒啦，我就咁輕易羸咗有錢嘅大富翁啦！）

而最後一個場景就係抽獎遊戲。A姐抽到Pandora購物券，而我就得到一架車！真係好多謝大富翁為我哋帶嚟呢個驚喜呀！

離開前，記住去到紀念品區shopping或去cafe食吓嘢。喺紀念品區有好多香港限定嘅大富翁產品，無論係攞嚟玩定收藏都得！記住呀，頭先喺大富翁銀行玩嘅搶錢遊戲，執到嘅大富翁紙幣，就可以以10: 1兌換港幣作消費使用喇！好似我同A姐夾埋搶咗$500大富翁幣，折合為HK$50，咁就可以又食又拎啦（每次消費只可以使用三張大富翁紙幣）！

期間限定：為慶祝大富翁85週年，大富翁夢想世界推出香港首套大富翁85週年主題郵票！由即日起至2021年3月18日，入場即可獲贈85週年明信片1張，購買紀念版主題郵票，就可以投遞至場內金郵筒，寄俾未來嘅自己或朋友啦！

大富翁夢想世界 Monopoly Dreams Hong Kong
地址：香港山頂道118號山頂廣場3樓301號舖
電話：+852 5632 9329
門券：成人 HK$ 260、兒童（3-11歲）及長者（65歲及以上）HK$ 220（官方網站亦設有不同套栗及早鳥優惠）
開放時間：星期一至日 10:00 – 20:00（最後入場時間為19:00）
網址：www.monopolydreams.com

另外，提提你，想買到最抵玩嘅門飛，可以留意官網嘅套票同早鳥優惠，或經由Klook買飛，比現場買飛平啲架！

Klook
於Klook購買可享優惠：成人 HK$ 208、兒童（3-11歲）及長者（65歲及以上）HK$ 176
網址：www.klook.com

而近期官網推出嘅網上優惠套票：組合A，除咗已包1張成人門票，更包一盒大富翁夢想世界 – 香港特別版（旅行裝），但最值回票優嘅係已包1.5小時大富翁教室名額x2，想了解更多大富翁遊戲嘅技巧，呢個package值得你體驗。

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com