手工啤酒見學體驗 Deadman Brewery釀酒廠導賞團
近年手工啤酒大受歡迎， 喺唔少餐廳同酒吧，都唔難見到手工啤酒嘅蹤影。加上手工啤酒夠新鮮之餘，仲經常推出創新口味，為大家帶嚟驚喜。但其實手工啤酒同普通啤酒嘅釀製過程、種類、成份又有咩分別呢？今日我哋就以見學體驗，認識香港製造嘅手工啤酒，參加Deadman Brewery釀酒廠嘅導賞團。
Deadman Brewery釀酒廠
一直以嚟，大眾所認識嘅啤酒品牌都係嚟自歐洲嘅德國、比利時、荷蘭、丹麥，或者亞洲嘅日本、菲律賓、中國等等。至於手工啤酒因為產量少，品質期唔會太長，所以絕大部份嘅手工啤酒都只作本地銷售。至於我哋今次參加嘅導賞團，就係位於新蒲崗嘅Deadman Brewery釀酒廠，佢係其中一間Made in Hong Kong嘅手工啤酒品牌。
產品展覽室
釀酒廠分為幾個部份，喺入門口嘅長走廊，就展示咗Deadman Brewery唔同手工啤酒嘅產品同獎項。手工啤酒以全麥芽精心釀製，而每年產量唔可以多過600萬桶、大酒廠更唔可以持控超過25%股份，要完全符合晒以上嘅條件，先至可以稱為手工啤酒。
另外，作為Made in Hong Kong嘅手工啤酒品牌，喺唔同方面亦見到本土嘅元素，充滿香港特色。我哋就特別鍾意Deadman Brewery嘅包裝，因為每罐嘅罐身同樽身都畫上漫畫風格嘅骷髏骨同怪獸等公仔，夠晒趣怪得意。但原來入面仲有唔少意思，我哋就唔劇透太多，嚟到參加導賞團，就記住問吓導賞員啦！
釀酒工場區
喺Deadman Brewery釀酒廠嘅釀酒工場放有13個釀酒桶，每個釀酒桶500升，可以製造大約1200罐手工啤酒。而參加導賞團最吸引就係可以即場試飲酒桶內最新鮮釀製嘅手工啤酒，當中有唔少手工啤酒更加係未推出市場架！
唔講唔知，原來啤酒主要係由四個材料所組成，分別係：麥、啤酒花、酵母同水，而因應唔同嘅麥，釀製出嚟嘅啤酒就會有唔同顏色。另外，啤酒會根據發酵過程，分為兩大類：ale、lager，一種嘅啤酒果香會比較重，另一種就會比較清爽甘甜。至於手工啤酒常見嘅IPA，其實係Pale Ale嘅其中一種，IPA嘅特色係加入大量嘅啤酒花，所以味道較重，而層次相對豐富。當然手工啤酒都會加入唔同嘅水果或者香料，令味道更加創新。不過，由於手工啤酒產量少，保存期唔長，所以相對普通啤酒嚟講，就更新鮮喇！
喺釀酒工場入邊，除咗釀酒桶，當然仲有包裝嘅機器同人手品質監控嘅程序，以確保每罐手工啤酒嘅質量，都係最佳嘅狀態！
試酒區
了解完釀酒嘅過程，就係最開心嘅試酒環節喇！喺釀酒廠入邊嘅試酒區，每日都會提供2-4款嘅手工啤酒、紅酒同白酒，每一位參觀人士都可以無限暢飲架！就算唔係參加導賞團，都可以上嚟Deadman Brewery試吓新鮮嘅手工啤酒或者包場開party架！另外，試酒區入面亦有桌球、遊戲機、board game、卡拉OK等設施，可以邊飲邊玩，夠晒chill啦！
最後，試完唔同嘅手工啤酒，相信總有一款係最啱你口味，鍾意嘅可以將味道帶返屋企，買幾罐做手信或者送俾朋友都唔錯㗎！
提提你
根據香港法律，不得在業務過程中，向未成年人售賣或供應令人醺醉的酒類。
世界各地／香港景點門票邊度買至平？
詳情請睇：https://wp.me/p8vzXP-6G
Deadman Brewery釀酒廠導賞團
地址：九龍新蒲崗利中工業大廈七寶街7號2B室
參觀時間：逢星期五 18:00 – 22:00 （約4小時）
參加對象：18歲或以上成年人
收費：HK$300（立即報名）
行程內容：參觀Deadman Brewery啤酒廠、了解手工啤酒嘅生產過程、產品特色同品嚐半製成品、任試任添嘅free flow環節
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
