生日怕悶記：首玩愉景灣Discoveryland
問吓大家啦：「男/女朋友生日去邊度玩？」，唔知呢條問題對你黎講，難唔難答呢？我其實真係唔識答！海洋公園？迪士尼？蠟像館？都得嘅，但男人都係貪新鮮，呢啲又點會滿足到M佬追求嘅新奇、好玩、刺激呢？左搵搵，右搵搵，搵到喇！！一於帶佢去愉景灣玩啦！不過天寒地凍，唔駛旨意我會著比堅尼架喇，一於留喺室內啦！呢度就係全港最大嘅室內遊樂場：歷奇王國（Discovery Land），面積足足有成14,000平方呎，除咗適合小朋友之外，其實都啱M佬呢啲大細路架！
出發喇，喺大門口買張pass就可以玩足一日，但提提大家，由於場內亦講求衛生，所以入場前要先存放好鞋仔同記住著襪入場呀！
一入到去，尖叫聲不斷，咩事？過山車？海盜船？通通都唔係！係呢個2層樓高嘅Air Trek，M佬二話不說就拉咗我去排隊，明知人哋畏高架啦，但M佬話生日大哂，就捉咗我去報名喇！建議大家如果想玩多幾轉嘅就要早啲入場，因為下午過後，係人流高峯期，我哋就排咗3個鐘先有得玩！
不過，等嘅過程又唔會悶，因為真係有好多嘢玩，其中首推「黑洞」！呢個係全港最長嘅室內滑梯，喺5-8秒嘅過程中，除咗黑到咩都睇唔到，仲有2吓離心力，你都未話唔驚！而旁邊仲有3條30米長嘅彩色滑梯，就啱哂一家大細玩喇！
除咗瀡滑梯，呢度仲有得玩攀石同跳彈床，又考耐性又可以減肥！而場內仲有小食店，一於跳完瘦咗又再食過肥過！
另外，場內亦有高爾夫球球道、啱小朋友玩嘅迷宮、鐳射槍war game等等。
而終於嚟到今日嘅重點喇！就係Air Terk（驚）！！！我哋先要做好安全嘅保護，踏住工作人員行上5米高嘅高台，企喺高台邊，我真係忍唔住深呼吸然後大叫！我完全唔明，典解我前面嘅小朋友可以咁輕易就行過去架？佢地行5步就可以去下一個check point，我就行咗成3分鐘；我又唔明，典解M佬可以一路行一路笑，我真係好驚呀。而每個關卡嘅難度各異，M佬話只要對安全帶有信心嘅話，踏出第一步之後，係無想像中咁驚喎，仲愈玩愈上手，但問題係我畏高呀！不過，一開始玩呢個遊戲就冇得番轉頭，至少要玩一半可以放棄（當然我都無放棄啦），所以只可以一路叫一路行啦！最後，我前行咗20分鐘，先玩完八個關卡，連下面嘅‘觀眾’都笑我喇……
驚完一輪，M佬就同我玩波波大戰，上層左右各4把波波槍對戰，而地面就係小朋友至愛嘅噴波波機，大家都著迷般不停執波波落部機，然後按制，噴噴噴噴噴!!!!
而呢度仲有3間party room ，最多可容納百人派對，所以無論係拍拖定成班朋友嚟玩，都一定會玩得好開心姐。
歷奇王國 Discovery Land
地址：大嶼山北愉景灣海澄湖畔路96號地下G31號舖
營業時間：星期一至四 早上9時30分至晚上7時30分
星期五、六及公眾假期前夕 早上9時30分至晚上8時
星期日及公眾假期 早上9時至晚上7時30分
收費：星期一至五 ：小童 (12歲或以下)$148、成人：$168
星期六、日及公眾假期：小童：$188、成人：$200
小童價錢已包一位成人陪同入場（但該成人不能參與任何活動）
電話：+852 2441 0098
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMdiary
Pinterest：AandMDiary
Openrice：A姐M佬
報料或合作：aandmdiaryhk@gmail.com
