【沙頭角禁區一日遊】禁區培慾 沙頭角一天遊9大景點

【沙頭角禁區一日遊】想去沙頭角禁區玩？首先，你要先搵到一位持有禁區證嘅當地居民做你嘅擔保人喇！而申請禁區證嘅詳細資料，可參考香港警務處網頁。如果無人做你嘅擔保人，咁你只可以睇我哋以下嘅分享，嚟一次眼睛去旅行。

沙頭角禁區一日遊 | 交通

沙頭角禁區一日遊 | 去沙頭角，最方便係喺粉嶺火車站坐78K巴士直入沙頭角禁區。而自從2016年1月4日，縮減邊境禁區範圍第3階段實施後，去到沙頭角巴士總站前嘅禁區閘口，先會有警察上車檢查乘客嘅禁區證。唔知點解我哋有一種莫名嘅興奮同緊張感。

沙頭角禁區一日遊 | 景點一：海山酒樓

沙頭角禁區一日遊 | 落車後嘅第一站當然直奔去中英街啦，但去到中英街嘅大門口見到又有警崗，先發現原來持有沙頭角禁區紙，都唔可以入中英街，只有持有中英街禁區紙嘅沙頭角居民先可以入街或由深圳方面進入，所以中英街又被稱為禁區中嘅禁區。

但想近距離眺望中英街都唔係無辦法，有錢就得！（A姐：唔通你想賄賂警員？）係只要有錢食飯就得！（A姐：吓？）

只要喺檢查站前同中英街警察講聲，你想去海山酒樓食飯就得。臨行前，警員會再三提醒，你只可以去海山酒樓食飯，而唔可以越境去中英街。為免警員難做，所以我哋都奉公守法，過咗檢查站直入餐廳。

海山酒樓自從易手後，由以前嘅中式點心演變為港式茶餐廳。講真呢度嘅食物唔算特別，亦都無咩推介俾大家，不過，值得一嚟嘅除咗係呢度嘅人情味同歷史見證之外，更重要係呢度嘅地段。因為海山酒樓位於中英街門口，意味住我哋已經離開香港，但又未進入中國境內，絕對係一個「無國界」地域。

食飽飽後，店員仲歡迎我哋上2樓睇睇中英街嘅市景。自從回歸同自由行大量開放後，中英街嘅江湖地位開始退色，望到街上面嘅人流唔多，或者有一日，呢個禁區中嘅禁區只會係一條普通嘅街道。

後篇：我哋終於入到中英街喇！
（禁區再培慾 沙頭角中英街一天遊，詳情：https://wp.me/p8vzXP-4sh）

沙頭角禁區一日遊 | 景點二：沙頭角公共圖書館

沙頭角禁區一日遊 | 山長水遠去到沙頭角，竟然去圖書館？係呀，我哋之前仲特登喺中央圖書館借咗本書嚟睇，睇完就拎去沙頭角還書。

話說我哋13:50去到門口，已經見到有條人龍，雖然人數唔多，但就感覺到一陣書卷味。

終於等到14:00開門，原來圖書館面積唔大，館藏量都唔多，座位亦只有大概6個，職員都係得1個。但因為沙頭角市內嘅娛樂設施唔多，所以沙頭角公共圖書館成為市民嘅休閒好去處。

開放時間：
星期一、三、六 10:00 – 13:00、14:00 – 18:00；星期二、五 13:00 – 20:00；星期日及公眾假期 09:00 – 13:00
地址：沙頭角邨第20座地下1 號舖
電話：2674 0870

沙頭角禁區一日遊 | 景點三：英女皇郵筒

沙頭角禁區一日遊 | 全香港仲用緊嘅郵筒有1,019個，而其中英治時期鑄有君主標記嘅郵筒只剩返大概59個，包括GRV、GRVI和ERII，而呢個英治郵筒更加係全香港最後一個印有伊利莎白二世皇徽(ERII)標記嘅嵌牆型郵筒。而且仲係由鐵鑄成，非常耐用。

所以你下次嚟，呢個郵筒可能已經不存在，你知啦，香港每日都在變，變到越嚟越陌生。喺不久嘅將來，呢59個郵筒都會慢慢消失，如果嚟到沙頭角仲見到佢嘅身影，不如去潮拜一吓啦。

沙頭角禁區一日遊 | 景點四：沙頭角海濱

沙頭角禁區一日遊 | 點解叫沙頭角？相傳一名清朝大臣巡視沙頭角一帶時候，見到大鵬灣嘅優美風光，而題咗兩句詩：「日出沙頭，月懸海角」，所以拖住A姐喺沙頭角海濱慢步，真係好sweet好寫意好寧靜呀，霎時覺得呢個世界好似得番我同佢。

避風塘停泊咗好多漁船，配合埋後面嘅彩色樓房，影相真係一流㗎。

有緣嘅話仲見到漁民帶住魚穫歸來，我哋今日就幸運見到流動海鮮檔，一於買條新鮮海魚做晚餐啦。

沙頭角禁區一日遊 | 景點五：沙頭角街市

沙頭角禁區一日遊 | 沙頭角居民一般都會去到上水／粉嶺買餸，所以沙頭角街市謍業嘅檔口唔多。但嚟到沙頭角如果想買手信，就一定要去沙頭角街市，呢到主打海味雜貨：花膠、魚鰾、鹹魚、螺片等全部都係自家製，一於買啲俾未來外母大人做手信啦。

另外沙頭角街市仲有最地道最經濟嘅市民食堂：沙頭角街市熟食中心。呢到總共有8間食店，各有特色，但想幫襯就要趁早，只為好多食肆喺4點後就會陸續關門，所以想食就要趁早喇。

沙頭角禁區一日遊 | 景點六：新樓街

沙頭角禁區一日遊 | 一渠之隔就係中英街嘅新樓街，因為住喺沙頭角嘅居民唔多，所以警員唔駛佢哋出示中英街禁區紙都已經認得佢哋，自由通行。而我哋當然只可以喺門口自拍自high。

新樓街係昔日九廣鐵路沙頭角支線嘅總站，喺1928年4月1日停駛，並開始逐步改建為廣州式唐樓。呢度嘅唐樓由22幢，每幢得兩層高，但就係香港現存最大嘅唐樓群，而古物詻詢委員會更加喺2012年6月14日將佢列為二級歷史建築。

新樓街嘅每幢唐樓一樓都係地舖，而二樓就係住所。不過，依家嘅商舖已經十室九空，但從店舖嘅招牌知道呢度曾經風光過，經營糧油雜貨、瓷器、茶樓、火水油渣等等。

沙頭角禁區一日遊 | 景點七：沙頭角邨

沙頭角禁區一日遊 | 沙頭角邨係全港最北而且係唯一一個位於禁區內嘅公共屋邨，最後一期喺1991年4月入伙，呢度以獨有嘅T字型同L字型作設計，全邨共有51座5-6層嘅大廈，合共提供662個單位，不過，全部樓宇都無電梯同無大閘保安架，行過邨內會隱約聽到邨民嘅交談同麻雀聲，但作為旅客嘅我哋記住要保持寧靜，唔好影響當地人嘅生活呀。

而邨內嘅配套都算齊全，有2間超級市場、銀行、餅店、士多、雜誌社、茶餐廳同藥房等等，都算照顧到居民嘅日常所需。

沙頭角禁區一日遊 | 景點八：天后廟

沙頭角禁區一日遊 | 香港現存嘅天后廟有102間，而僅僅位於沙頭角就有2間。呢間鄰近海濱嘅天后廟，建於嘉慶年間，原址喺華界嘅沙欄下，至1950年後搬到英界嘅圓敦山下，直至1993年搬到現址。

呢間天后廟實而不華，雖然唔係金碧輝煌亦無任何精巧嘅浮雕裝飾，但天后娘娘每日都望住沙頭角海，守護住每位漁民嘅平安歸來。

沙頭角禁區一日遊 | 景點九：沙頭角公眾碼頭

沙頭角禁區一日遊 | 2007年落成耗資四千六百萬嘅沙頭角公眾碼頭，係全香港最長嘅公眾碼頭，影相自拍都相當唔錯㗎。

而我哋今日就順便去埋鴨州睇睇大自然嘅鬼斧神工。

世界各地／香港景點門票邊度買至平？
–> 詳情請睇：https://wp.me/p8vzXP-6G <–

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
報料或合作：keepintouch@aandmdiary.com