置身歷史遊走大自然 鰂魚涌樹木研習徑

想尋找輕鬆嘅市區郊遊路線？我哋就推介鰂魚涌樹木研習徑喇！因為呢條鰂魚涌樹木研習徑，非常輕鬆，而且集大自然同歷史於一身，適合小朋友置身歷史，接觸大自然，順便同佢哋上一堂通識教育課啦！雖然我同M佬就無小朋友，但呢度都有唔少打卡點，而且行山又可以順便減吓肥，一舉幾得啦！

前往方法
1. 喺鰂魚涌港鐵站落車，行至海山樓旁邊嘅鰂魚涌市政大廈，就係今次路程嘅起步點
2. 柏架山道雖然係行車嘅水泥路，但除咗的士、具通行證同政府車輛外，其他車輛係唔入得，自駕遊嘅字母粉可以泊喺鰂魚涌區內停車場

提提你
1. 鰂魚涌樹木研習徑內為山徑，以平路為主，難道屬於初級路線，但都要記住量力以為
2. 鰂魚涌樹木研習徑內不設洗手間同補給站，記住自備足夠飲品
3. 大家記住保持環境清潔，自己垃圾自己帶走，絕對唔可以破壞大自然環境

柏架山徑
詳情：絕美東區打卡靚景 90分鐘登上柏架山
由鰂魚涌市政大廈起步，之後就係全程所謂最辛苦嘅水泥斜路。沿住斜路行就會睇到鰂魚涌一帶嘅城市景色，都幾靚架！如果時間同體力許可，仲可以一路上山，行去柏架山山頂。

林邊生物多樣性自然教育中心
詳情：活化鰂魚涌紅磚屋由通識開始 林邊生物多樣性自然教育中心
林邊生物多樣性自然教育中心又名「紅屋」係二級歷史古蹟。前身為1922年嘅林邊屋，係太古糖廠及太古船塢歐藉職員宿舍，樓高兩層，外牆由紅磚建成，屬早期英式建築設計。1972年因為太古糖廠結束營業而被空置。曾經活化成國際文化事務協會嘅紅屋藝術展覽中心，後嚟喺2012年由漁農自然護理署接手管理，並改建為林邊生物多樣性自然教育中心。教育中心內有唔少喺叢林生活嘅動植物介紹，絕對一個適合親子參觀同學習通識嘅地方。另外，外牆嘅英式紅磚設計亦係一個A姐推介嘅打卡熱點！順帶一提，林邊生物多樣性自然教育中心內設有行程中唯一嘅洗手間同提供免費斟水嘅地方，臨走前記住先補給吓啦！

開放時間：星期一、星期三至星期日及公眾假期 09:30-16:30

鰂魚涌海水配水庫公園
喺林邊生物多樣性自然教育中心嘅對面就係海水配水庫公園，公園同設有唔同嘅健身器械，吸引好多附近嘅居民嚟晨運架！

鰂魚涌樹木研習徑
離開海水配水庫公園，再往前行10分鐘，就係鰂魚涌樹木研習徑嘅入口（提提你：如遇上林邊生物多樣性自然教育中心閉館或需要再使用洗手間，可以再往前行5分鐘，設有洗手間同觀景台）。鰂魚涌樹木研習徑全長約1.1公里，係香港第二條最接近市區嘅樹木研習徑，裡面種咗好多唔同而且特別嘅植物，當中有廿多種植物品種，包括大頭菜、鴨腳木、黃牙果、豺皮樟、葉紅豆等，全部都有清楚介紹，等大家可以更詳盡了解。

儲糧倉
行咗入樹木研習徑無耐，就會見到儲糧倉。儲糧倉係當時英軍為咗抵抗二戰時日軍侵略所建立嘅，正所謂「兵馬未動，糧草先行」！

戰時爐灶
爐灶分為兩部份，但因為當年日本以閃電戰攻擊黃泥涌峽，所以呢度所有爐灶都無用過。

康柏橋
康柏橋下嘅大水渠將柏架山嘅雨水會合，但每逢落雨後，呢度嘅水流洶湧湍急，不時發生意外，大家記住要安全呀！

離開康柏橋，不走回頭路就會去到南豐新邨，全程輕鬆易行，適合一家大細。

世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–

鰂魚涌樹木研習徑

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com