週末遊車河：香港邊境禁區自駕遊 — 大水管、馬草壟、得月樓
今日A姐M佬又出發遊車河，嚟到香港最北嘅邊境禁區自駕遊，分別遊走梧桐河、大水管、得月樓警崗、馬草壟警崗、落馬洲瞭望台、美德家塾。今次嚟嘅地方，部份以前係禁區地帶，但由2013年6月10日次階段縮減邊境禁區範圍之後，唔需要禁區紙就可以嚟遊覽喇！如果你係選擇揸車入嚟，留意番呢度好多路段都係單線雙程行車，新牌仔或技術麻麻嘅，我哋就建議你選乘公共交通工具或自己踩單車入嚟啦！
第一站：鴻淘士多‧羅太豆花
嚟到上水河上鄉，第一站就先去鴻淘士多，食碗超滑嘅羅太豆花（詳情：https://wp.me/p8vzXP-57p）。
鴻淘士多‧羅太豆花
交通：上水鐵路站乘搭51K小巴於總站鄉公所下車
地址：上水河上鄉快景路
第二站：梧桐河大水管
食完豆腐花，第二站就係豆腐花店旁邊嘅梧桐河同雙魚河交界，河道嘅景色好靚，天氣好仲望到上水同深圳嘅景色。
如果想打卡，就要去到大水管喇！呢條大水管就係深圳東江水供港嘅輸水管道，由於水管建於地面，所以影相嘅線條構圖會好靚，而且旁邊就係上水去元朗嘅鐵路路段，如果撞啱火車經過，影相就更加有味道啦！
梧桐河大水管 Ng Tung River Big Pie
交通：上水鐵路站乘搭51K小巴於總站鄉公所下車
地址：梧桐河及雙魚河交界
第三站：得月樓警崗
得月樓警崗面對住港鐵羅湖站同深圳市，警崗主要用途係防止偷渡客，以及邊境禁區管制嘅用途。如果持有禁區紙就可以行過呢條天橋，大概4分鐘就會去到港鐵羅湖站喇！
睇開喪屍片嘅我哋，見到旁邊呢個圍欄，係咪覺得對面就係一班喪屍呢？當然佢嘅主要任務，就係守護一國兩制，防止啲人偷渡入境啦！但其實，而家嘅一國兩制只剩低所謂嘅邊境禁區。
得月樓警崗 Tak Yuet Lau Police Post
交通：上水鐵路站乘搭專綫小巴51B線，料壆村落車再步行30分鐘
地址：
第四站：馬草壟警崗
前往馬草壟警崗，將會途經料壆村，呢度有唔少村民居住，大家路過嘅時候記住保持寧靜，以免影響居民平常嘅生活。但呢度點解要介紹畀大家呢？因為村口有一個比較乾淨嘅洗手間，如果有需要嘅話，可以作為一個休息站。
如果你哋係坐專線小巴嚟，上車嘅時候可以同司機講聲落車嘅地方，如果唔係就好容易就錯過咗你嘅目的地，小巴只會停喺路口，再行15分鐘上山。如果你係自駕遊或者踩單車，呢度嘅山路比較斜同彎多，上落嘅時候，一定要小心！
上山嘅路段已經見到深圳嘅市景，深圳嘅高樓大廈，全部都一覽無遺。警崗下面，大概可以停5-6部車。行大概30級樓梯，就係山嘅嘅馬草壟警崗，以前主要用途係瞭望台，但聽講而家已經關閉咗。不過，佢嘅外型十足十南北韓軍事重地，簡直係愛的迫降。
而全日最靚嘅景色，就係從瞭望台旁邊嘅山路一直行入去，可以俯瞰落馬洲邊境魚塘，而遠處就係深圳繁華都市嘅高樓大廈景色，形成強烈嘅對比，景觀開揚，風景好靚。
好多人都會選擇黃昏時間嚟到，set定腳架影日落。隨住陽光嘅反射，魚塘由藍色變成金黃色；而深圳嘅市景亦會變成夜景。不過，我哋駕駛技術唔算精深，所以我哋選擇仲有陽光嘅時候回程。
馬草壟警崗 Ma Tso Lung Police Post
交通：上水鐵路站乘搭專綫小巴51B線，馬草壟警崗落車再步行15分鐘
地址：
第五站：落馬洲瞭望台
喺回歸之前，落馬洲瞭望台曾經係遊客嘅旅遊熱點，但依家已經完成歷史任務。揸車嚟嘅朋友，唔使擔心，出邊有10幾個老虎錶停車位，方便駕駛人士。呢個瞭望台嘅範圍唔算大，但駕駛比馬草壟方便，雖然景色比馬草壟差啲啲，但仍然睇到香港同深圳中間嘅河套區，以及深圳嘅繁華鬧市。
落馬洲瞭望台 Lok Ma Chau Lookout
交通：元朗大馬路麥當勞乘75號下灣村專線小巴，邊境禁區口落車，上大斜路。
地址：
第六站：美德家塾
最後一站嚟到被列為二級歷史建築嘅美德家塾，旁邊係居民嘅村落，大家遊覽嘅時候記住要保持環境寧靜，以免影響居民嘅生活。所謂「家塾」就係指古人借祠堂用作課室教學。而呢度最大嘅驚喜，就係家塾前邊，嗰條荒廢咗嘅滑梯，影相出嚟，好有歷史嘅味道。
美德家塾 Mi Tak Study Hall
世界各地／香港景點門票邊度買至平？
–> 詳情請睇：https://wp.me/p8vzXP-6G <–
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
