金鐘無料藝術秘景 亞洲協會香港中心

金鐘係香港嘅商業中心，亦係一個好重要嘅轉車站，但除此之外，原來金鐘仲有呢個秘景！今日我同A姐嚟到金鐘嘅JW萬豪酒店（JW Marriott）玩Staycation，其實我哋每次玩Staycation都會睇吓附近有咩景點參觀，隨搜尋而發現呢個前身為域多利軍營嘅軍火庫，經活化後成為依家嘅亞洲協會香港中心。中心推動亞洲藝術文化，引進藝術同文化界人士嘅作品，不定時會舉辦展覽同學術活動，加上建築物本身係軍火庫古蹟，真係好適合大家weekend一家大細嚟打卡㗎！

香港賽馬會廳
一踏入亞洲協會香港中心，reception職員就詢問我哋之前有無嚟過，仲俾埋地圖同介紹參觀路線添，細心之餘呢度，仲要係免費參觀㗎！至於喺reception counter嘅後面就係香港賽馬會廳，呢度不定期都會舉辦展覽，大家可以留意佢嘅網站update再嚟參觀。至於下層就係餐廳AMMO同紀念品店，而上層就係劉鑾雄 ‧ 劉秀樺空中花園。

劉鑾雄 ‧ 劉秀樺空中花園
呢個空中花園景觀好靚，一邊係山景，另一邊就係城市大廈同維港景色，真正係背山面海。空中花園有唔同嘅展品，介紹其中兩件最吸引到我哋嘅展品啦！

呢個大佛嘅雕塑由中國當代藝術家張洹的鑄造。

另外，呢個企喺大廈頂樓嘅人，唔知係未有啲咩諗唔開呢？

康本橋
呢座橋分為上下兩層，連接新建嘅主樓同活化嘅古蹟，喺橋嘅唔同角度，可以構成一幅又一幅嘅打卡靚相。

火藥軌
一踏入古蹟區就會見到被保留嘅路軌，呢條路軌主要係運送軍火庫內嘅火藥。

史帶-格林伯格樓（軍火工場舊址）
呢個史帶-格林伯格樓以前係混合炸藥嘅工場，旁邊有保留落嚟嘅海軍界石。至於舊工場依家係辦公室，唔可以入內參觀，但佢嘅外觀甚有殖民地色彩，記住喺門口擺個pose影番張相。

麥禮賢夫人藝術館
曾用作儲存火藥嘅麥禮賢夫人藝術館，以本地花崗岩為建材，加上原拱型設計，入到去好似去咗歐洲嘅博物館呀！同樣地展品不定期更新，大家可以留意佢嘅網站update再嚟參觀。

麥禮賢劇場
同樣曾用作儲存火藥嘅麥禮賢劇場，依家係一間可以容納100名觀眾嘅表演場地。不過，我哋就未有欣賞表演喇。

世界各地／香港景點門票邊度買至平？
–> 詳情請睇：https://wp.me/p8vzXP-6G <–

亞洲協會香港中心 Asia Society Hong Kong Center
地址：金鐘正義道9號
開放時間：星期二至日 11:00-18:00
網址：www.asiasociety.org

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com