香港歷史深度一天團 香港墳場歷史導賞團
我哋曾經去過歐洲嘅墳場參拜名人畫家，其實歐洲啲墳場真係好靚，每個逝者墓地都好似一件藝術品，氣氛雖然莊嚴，卻又非常閒適平和。喺跑馬地就有一個香港少見嘅歐陸式墳場，但嚟到華人社會，大家對於墳場就會有好多避忌，去墳場參觀？「大吉利是」咩！其實每個逝者背後都有一個故事，當中有唔少故事更影響深遠。我哋近期就參加Hidden Gems Travel舉辦嘅銅鑼灣與香港墳場歷史導賞團，認識安葬喺香港嘅歷史人物故事，深度了解香港嘅本土歷史。
行程
銅鑼灣維園女皇像->途經善樂施大廈->途經回教墳場->途經天主教聖彌額爾墳場->香港墳場
提提你
1. 今次嘅旅程並唔係探靈之旅，行程以了解前人為香港作出嘅貢獻，認識香港歷史
2. 行程中會參觀唔少墓園及宗教場所，為咗尊重場合及墳場範圍蚊蟲眾多，請唔好著背心、吊帶、短裙、短褲、拖鞋、透視服裝
3. 所有墓園及宗教場所都係一個莊嚴嘅地方，遊覽時保持聲浪，保持應有嘅尊重，唔好騷擾其他人嘅儀式和活動，亦唔好騷擾長眠嘅逝者
4. 尊重自己，尊重宗教
5. 大家記住保持環境清潔，自己垃圾自己帶走
6. 行程以行路為主，所以大家要著得輕便舒適
銅鑼灣維多利亞公園 – 維多利亞女王銅像
行程嘅集合地點位於銅鑼灣嘅維多利亞公園，原來我哋成日經過，喺維園嘅維多利亞女王銅像，最初係設於中環嘅皇后像廣場呀！喺二戰嘅日佔時間，呢個維多利亞女王銅像仲差啲熔掉成為武器嘅原料，所以佢嘅旅程一啲都唔簡單，但幸運地喺1957年重置於新落成嘅維多利亞公園直至依家。亦由呢個故事開始，導遊帶領我哋由銅鑼灣深度了解香港嘅本土歷史。
善樂施大廈（途經）
第二站嚟到善樂施大廈，呢棟大廈又唔係香港最高，又唔係由名建築師設計，咁佢同香港歷史又有咩關係呢？原來善樂施大廈嘅英文名係Zoroastrian，而Zoroastrian就係拜火教嘅意思，大廈雖然經過改建，但5樓仍保留為拜火神廟，喺大廈外牆亦有拜火教標置架！雖然好多香港人可能唔認識拜火教，但其實拜火教歷史悠久，成立比伊斯蘭教更早，係當時中東最有具影響力嘅宗教。直至香港開埠初期，拜火教教徒遷移至香港，亦對香港嘅發展功不可沒。例如捐助15萬元創立香港大學嘅麼地爵士、提出粵劇團男女平等嘅羅旭龢、開辨天星小輪嘅遮打爵士，仲有碧荔、律敦治等等。
回教墳場（途經）
離開善樂施大廈之後，導遊沿路同我哋講解銅鑼灣及四環九約嘅香港歷史，聽吓聽吓就嚟到跑馬地墳場喇！跑馬地嘅英文名稱：Happy Valley，相信大家都好清楚，但Happy Valley原來係暗喻墳場嘅意思，而Happy Valley更加係世界少見位於城市中心，而同時容納多個宗教作比鄰嘅墳場。由最接近銅鑼灣，依次嘅就係回教墳場、天主教墳場、香港墳場、巴斯墳場、印度人墳場同猶太人墳場。
天主教聖彌額爾墳場（途經）
第二個途經嘅墳場就係天主教聖彌額爾墳場，相信呢個天主教聖彌額爾墳場最多人認識嘅應該係門外嘅一副對聯：「今夕吾軀歸故土 他朝君体也相同」。另外，天主教聖彌額爾墳場蘊含大量殖民地歲月痕蹟，同歐洲嘅墳場都有幾分相似，墓地以雕像、十字架、聖人、天使為主，莊嚴得嚟又充滿藝術氣息。不過，因為天主教墳場屬於私人地方，導遊只係喺外圍同我哋講解，了解一吓呢度嘅歷史同名人。而喺外觀墳場門口嘅時候，意外發現天使與魔龍嘅雕塑上面出現心心雲，真係好有意思呀！
香港墳場
建立於1845年嘅香港墳場，原來喺1841年就已經有人安葬？呢位住客就係英國軍艦響尾蛇號艦長William Brodie，當年嘅事情，我哋就唔劇透太多，等你哋參加行程嘅時候慢慢發掘啦！而香港墳場曾被稱為Protestant Cemetery（基督新教墳場）、Colonial Cemetery（殖民地墳場）、English Cemetery（英人墳場）等等，但一直以嚟都無中文名稱，主要係因為初期墳場唔歡迎華人，所以華人圈內叫呢個墳場做紅毛墳場，直到1913年先有華人落葬，及後命名為香港墳場。
香港墳場同好多墳場唔一樣，至少絕大部份墓碑都係無相嘅，點解呢？因為有唔少逝者嘅年代久遠，並未有相機，當然仲有好多其他原因，但同樣地等你哋自己發掘啦！
一踏入香港墳場，就會見到建於1845年嘅香港墳場教堂，係香港現存最古老嘅教堂，被列為一級歷史建築，裝飾反映都鐸復興式建築風格，依家主要係進行葬禮等嘅儀式，平時日子，教堂係唔會對外開放。
嚟呢個墳場入面，長眠咗唔少影響香港深遠嘅傳奇人物，其中包括鴉片戰爭時期嘅軍艦響尾蛇號艦長William Brodie、威林馬禮遜醫生、傳教士何顯理、信義宗傳教士郭士立、香港公立教育之父史釗域、德國納粹黨黨員Paul及富商何東及元配麥秀英等等，導遊都會講解每個人物嘅故事。
除咗長眠嘅傳奇人物，喺香港墳場入面仲有多個紀念碑，其中最有價值嘅當然就係第一次鴉片戰爭紀念碑同第二次鴉片戰爭紀念碑啦！呢幾座紀念碑對於英國人嚟講絕對係榮譽；對香港人嚟講亦係發展開埠嘅時期；對中國人嚟講，或者係國家嘅傷感時刻，所以絕對值得大家細味反思。
除咗墓地同紀念碑，香港墳場仲有一棵被稱為灣仔樹王嘅桃花心木，同香港第一個噴水池。呢個噴水池參考聖經創世記2章10節建造，由四個圓形組成，而上面就有一個噴水雕像。曾經呢個噴水池更加係香港嘅地標，不過今時今日都無再噴水喇！
銅鑼灣與香港墳場歷史導賞團 Hong Kong Cemetery Tour
網址：www.hiddengemstravelhk.com
Facebook：www.facebook.com/hiddengemstravell
Instagram：www.instagram.com/hiddengemstravell
時長：約3.5小時
人數：5人成團，上限12人（歡迎團體查詢）
語言：廣東話或普通話
收費：$360/人（已包括本地遊保險）
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
