[馬鞍山好去處] 鞍山探索館 兼遊240礦洞秘景
以前去台灣旅行，我同A姐都有去過觀光礦洞參觀打卡，但原來位於香港馬鞍山都有一個以礦洞為主題嘅鞍山探索館；所以今次週末好去處，我哋就自駕遊嚟到鞍山探索館。呢度除咗有唔少打卡位同cafe之外，我哋仲去咗旁邊鮮為人知，已經荒廢嘅原址秘景：240礦洞，一齊探究香港嘅石礦歷史啦！
前往方法
1. 行山：由馬鞍山村路出發，接駁至馬鞍山郊遊徑
2. 村巴：於馬鞍山鞍祿街，乘坐NR84號村巴，收費每位$7，至總站落車
馬鞍山鞍祿街 → 馬鞍山村
每日 08:00、09:30、10:30、13:00、16:00、16:40、17:30、19:00
馬鞍山村 → 馬鞍山鞍祿街
每日 07:00、08:30、10:00、11:30、13:30、16:30、17:00、18:00
3. 由於村巴班次稀疏，及村民可優先乘坐，不如選擇乘坐的士
4. 自駕遊：馬鞍山村內不設公眾停車位，我哋亦唔建議泊入村內，以免抄牌及與村民發生爭執。另外，路段為單線雙程行車，技術唔好嘅，就盡量唔好揸入村喇。我哋建議泊喺郊野公園停車場再行入去（Ma On Shan BBQ site）
提提你
1. 作為旅客嘅我哋記住要保持寧靜，唔好影響當地人嘅生活呀
2. 探索館內設有洗手間及餐廳以作補給
3. 大家記住保持環境清潔，自己垃圾自己帶走，絕對唔可以破壞大自然環境
4. 240礦洞遺址入口已被磚牆擋住，並豎立警告字句，洞內漆黑一片，而且有隨時倒塌危機，絕不建議入礦洞探險
平安橋
平安橋係往返是礦場同屋企嘅必經之路，所以平安橋寓意平安上班，安全回家。
信義會禮拜堂
探索館嘅前身為建於1952年嘅信義會禮拜堂，主要向居住喺馬鞍山村嘅居民宣揚福音，舉辦宗教活動及為當時貧苦礦工提供福利，解決生活問題。另外，當時有唔少礦工住喺馬鞍山村，所以信義會喺禮拜堂嘅旁邊興建咗一間學校，讓礦工嘅小朋友喺度讀書學習。
鞍山探索館
約喺1億4000萬年前，香港經歷過一連串猛烈嘅火山爆發，令香港除咗有獨特嘅地貌奇觀，更令香港嘅地質含有豐富嘅礦物。其中馬鞍山就曾經係香港重要嘅採礦基地，由1906年起開始至1976年結業，全盛時期礦工高達3,000人。所以教會將建築物活化成鞍山探索館，讓市民可以認識馬鞍山嘅採礦工業。
係人都知，喺礦洞裏面工作辛苦又危險，所以喺礦洞前會放有一個名表牌，萬一洞內發生意外，就可以透過名牌表知道被困嘅人數。
礦工Cafe
Cafe以少見嘅礦場為主題，嚟到就梗係要試吓呢度嘅名物：腐乳饅頭、礦石曲奇啦！其中腐乳饅頭係昔日礦工嘅充飢糧食，配合埋餐廳牆上嘅紀錄相片，真係感受到當時嘅礦工，每一啖都係有血有汗。
240礦洞入口（模擬）
喺探索館外有一個模擬嘅240礦洞入口，平時呢度會舉辦活動，等大家了解當其時礦洞嘅工作情景。當然亦可以喺呢度影張打卡相啦！另外除咗呢個模擬礦洞，旁邊亦有唔少壁畫，都係一個唔錯嘅影相留念熱點。
240礦洞入口（遺址）
離開鞍山探索館，經平安橋返回三叉口，就會嚟到呢個240礦洞入口嘅原址。入口已被磚牆擋住，並豎立警告字句，洞內漆黑一片，據講仲有勁多蝙蝠，而且有隨時倒塌危機，絕不建議入礦洞探險。所以我哋喺洞外影相，感受由洞內吹出嚟嘅涼風，真係好似歎緊冷氣咁，但其實呢度就喺礦工辛勞工作嘅地方。
世界各地／香港景點門票邊度買至平？
–> Klook：www.klook.com <–
–> Trip.com：www.trip.com <–
–> KKday：www.kkday.com <–
鞍山探索館 Grace Youth Camp
開放時間：逢星期五、六、日及公眾假期 10:00-16:00
網址：www.gyc.elchk.org.hk
（記住Like同Share畀朋友）
想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
Youtube：A姐M佬玩樂日記
報料或合作：keepintouch@aandmdiary.com
