人氣壽司店 佐敦壽司郎

兩個月前嘅某一天星期日早上，A姐見到網上有人介紹日本過江龍壽司店 – 壽司郎，就驚喜大叫，而當時仲瞓緊覺嘅我，就被9秒9拍醒，即刻換衫同佢去佐敦彌敦道嘅壽司郎朝聖喇。未夠12點就到佐敦站，當我仲諗緊早餐都無食，直接食生野會唔會肚痛嘅時候，餐廳已貼上全日已滿嘅告示，仲提醒我哋可以用apps訂位架！WHAT！有無咁誇張呀！A姐嬲爆爆咁，即刻downloads apps，但想預約平日晚餐或weekend？時間選擇唔多，仲要係2個月後……由於時間關係，2個月後……我哋終於重臨壽司郎，大量食客塞滿門口，由於我哋係預約時間前到達，所以等咗1分鐘，就可以直接入餐廳面聖喇。

壽司郎係迴轉壽司店，喺長長嘅運輸帶上，擺上唔同嘅壽司，雖然擺得唔滿，但你可以用枱上面嘅屏幕order你想食嘅壽司！呢度提供超過100款壽司及日式料理，價錢由12蚊一碟起，非常吸引！而由於呢度嘅人流超多，所以壽司夠晒新鮮！但留意返，於人流眾多嘅時候，用餐時間只有60分鐘咋！

抵食推介
蝦三味壽司：超級抵食！有齊赤蝦、熟蝦同甜蝦。赤蝦係超彈牙又膠口，而甜蝦有3隻，好鮮甜。
厚切三文魚壽司：切得厚身，三文魚夠肥！
特選中吞拿魚腩壽司：中吞拿魚腩嘅油脂比例豐富，性價比超高。
花之戀：好大粒嘅花之戀，有成3塊三文魚，一啖係食唔晒！
茶碗蒸：好大杯，而且入面好足料，仲有成粒大扇貝！

必食推介
大吞拿魚腩壽司：油脂比例比中吞拿魚腩更豐富，油香十足，入口即溶！
灸燒三文魚腩壽司：灸燒三文魚腩帶有微微嘅焦香，入口即溶！
鰻魚卷：鰻魚無骨，肉質嫩滑，鋪上鰻魚汁，好香濃。
油甘魚壽司：好！肥！美！

其他選擇
飛魚子軍艦：飛魚子份量足，少少鹹又爽脆，配上脆口嘅紫菜，口感一流。
壽喜燒牛排壽司：牛排即肥牛，索晒壽喜燒汁，好滋味。
咖哩雞扒壽司：咖哩汁好香，但略嫌雞扒唔夠熱。下次會唔會考慮豆腐火腩壽司？
帆立貝壽司：細細嘅一粒，同爭鮮相差無幾，唔食都得。

壽司郎 Sushiro
地址：佐敦彌敦道348號彌敦坊UG樓
營業時間：星期一至日 11:00 – 23:00
電話：+852 2388 7887

（記住Like同Share畀朋友）

想緊貼A姐M佬嘅吃喝玩樂資訊，快啲Follow埋下面嘅Channel啦！
Facebook：A姐M佬 玩樂日記
Instagram：AandMDiary
Openrice：A姐M佬
大眾點評：A姐M佬
Trip Advisor：AandMDiary
報料或合作：keepintouch@aandmdiary.com